Bloggfærslur mánaðarins, maí 2008

Frægasti Íslendingurinn níðir Ísland

Hvað gengur Björku nú til? Að nýta frægðina, sem áður bar hróður Íslands Bjork Swanút um víðan völl, nú til þess að níða Ísland á alþjóðagrundvelli og gera lítið úr óumdeildri forystu Íslendinga í nýtingu endurnýjanlegrar orku, heiminum öllum til hagsbóta? Frægðin hefur augsýnilega ruglað hana vel í ríminu.

Ímynd Íslands er góð, en Björk vill breyta því

Björku er tíðrætt um ímynd Íslands, að við hin séum að eyðileggja ímyndina með stöðugri fjölgun álvera hér á landi. Hvað ætlar hún þá að gera til þess að bæta þessa  skertu ímynd?  Hún vill „kynna þetta svolítið erlendis“, að við Íslendingar „megum ekki vera 30 árum á eftir“. Á meðan ímyndar- kynnendurnir Al Gore og Forseti Íslands segja Íslendinga standa fremst í heimi í nýtingu endurnýjanlegrar orku, þá mun Björk kynna þá verptu skoðun sína erlendis að Íslendingar séu að eyðileggja Ísland, sem hún hefur margtuggið í erlent fréttafólk, þyrst í að heyra hvað kemur næst úr viskubrunni söngkonunnar.

Bjork nattura Lewis orgFyrstu kynni af Íslandi eru batnandi, en Björk vill breyta því

Alla Bjarkar hunds- og kattartíð hafði ameríska herstöðin í allri sinni grábrúnu gaddavírs- braggafegurð verið fyrstu kynni útlendinga af Íslandi við komu ferðamannanna til landsins. Nýlega breyttist það og NATO, háskólasamfélag og fjölbreytt byggð og athafnalíf tók við. Þá telur Björk að álver í Helguvík (sem yrði ekki nálægt þjóðveginum) yrði slæm fyrstu kynni af landinu. Þar við bætist Straumsvík. „Það er bara verið að skjóta sig í fótinn og þetta er rosalega mótsagnakennt“. Ef einhverjar mótsagnir er að finna, þá er það í málflutningi Bjarkar. Vonandi ber rógsherferð hennar um heiminn engan árangur. Man hún ekkert hvað það er að vera Íslendingur, sem þarf að koma sér áfram í lífinu og borga skatta á Íslandi? Veit hún ekki af því að ál er aðal- útflutningsvara Íslands?

Þegar Björk þýtur landa á milli í álþotum og eyðir orku á við heilt þorp í Afríku á hverjum hljómleikum sínum, sem knúnir eru áfram af olíu og kolum, þá ætti henni að vera hugsað til gamla landsins, þar sem fólk háir enn lífsbaráttu sína og vill nýta orku sína og landsins til skapandi athafna eins og hún gerði forðum, ekki til niðurrifsstarfsemi á þjóðinni.

 


mbl.is Björk og Sigur Rós með útitónleika í Reykjavík
Tilkynna um óviðeigandi tengingu við frétt

Vopnum safnað

Skömmu eftir friðarferð Ingibjargar Sólrúnar til Afríku og IngibjorgSolrun RAXMið- Austurlanda gerði utanríkisráðherra Utanríkisráðherra BNABandaríkjanna stóra vopnasölusamninga við sömu lönd og báða andstæðingana. Nú er utanríkisráðherra okkar búinn að safna mörgum ríkjum SÞ í kippur til stuðnings okkur í kosningabaráttunni miklu til þess að komast í Öryggisráð SÞ.  Auðveldara er þá fyrir gestinn að semja við ISG heldur en að rassakastast sjálf út um öll spilltustu Afríkuríkin.

Þeim hlýtur að koma vel saman, öflugasta vopnasala jarðar og formanni Samfylkingarinnar.


mbl.is Condoleezza Rice á Íslandi
Tilkynna um óviðeigandi tengingu við frétt

Skjálftakort og töflur

Jarðskjálftarnir í dag sjást vel á Íslandskorti vedur.is. Skjalftakort 29 05 kl 22Þar er líka tafla yfir skjálftana, þar  sem sést að nokkrir þeirra áttu upptök sín norður og NA af Hveragerði á svæði þar sem Bitruvirkjun gæti orðið. Í fyrri umræðum hér um það hvort hægt sé að geyma sér háhitasvæði sagði ég:

„Vonlaust er að hugsa hundruð ára fram í tímann með háhitavirkjun. Allt er breytingum undirorpið, svæði hitna og kólna með jarðhræringum eins og sást með holurnar við Kröflu“: Aths: 23/5/2008.

Á næstu árum og áratugum mjakast þetta allt til og er ekkert á vísan að róa. Það er enn ein ástæðan til þess að nýta orkuna á vel könnuðum, samþykkjanlegum svæðum fljótlega eftir rannsóknirnar, sem þarf eflaust að endurtaka ella með öllum sínum tíma og kostnaði.


mbl.is Heimili í Hveragerði í rúst
Tilkynna um óviðeigandi tengingu við frétt

Virkjum og eflum alla dáð

Sú firra hefur einhvern veginn komist í kollinn á fólki að þensla sé hættuleg og að samdráttur sé æskilegur. Annað hvort hefur það þá ekki upplifað samdráttarskeið, hefur ekki orðið fyrir því eða er hreinlega búið að gleyma því eins og veðrinu. Hagvöxtur sem byggir á starfsemi heilbrigðs athafnalífs má alveg rjúka óhindraður áfram, því að vandræðin sem af slíku skapast eru barnaleikur miðað við samdráttarskeiðin. Sá eða sú sem hlakkar yfir komandi kreppu er ekki að hugsa dæmið til enda.

Gætum nú að atvinnuvegunum, höldum áfram með áætlaðar virkjanir ss. Bitru og önnur tækifæri sem gefast til þess að lina þjáningar næstu ára, sérstaklega fyrir ungt fólk í fasteignakaupum.


mbl.is Tveggja ára stöðnunarskeið hafið
Tilkynna um óviðeigandi tengingu við frétt

Hver tekur af skarið?

Borgarstjórastjóllinn og staðan í borgarstjórnarflokki SjálfstæðisflokksinsOlafur F Magnusson heldur hvorttveggja áfram í óvissu, þrátt fyrir afneitun flestra ráðamanna. Engin ein manneskja virðist leggja í það að taka af skarið. Hanna Birna Kristjánsdóttir er lang- líklegust til þess að hafa fjöldann á bak við sig í slíkri aðgerð skv. skoðanakönnun Fréttablaðsins þann 24/5/2008, en Vilhjálmur Vilhjálmsson heldur enn í vonina með stuðningi aðeins 15% Sjálfstæðisfólks. Á meðan hefur Sjálfstæðisflokkurinn misst rúm 20% af fylgi sínu í borginni ef könnunin er rétt en Samfylking aukið sitt fylgi um 58%, sem er jafn stórt hlutfall og Frjálslyndir hafa fallið um.

 

R- lista heilkennið

Ef borgarstjórnarflokkur Sjálfstæðisflokksins hreinsar ekki til í eigin ranni og ákveður sig strax á meðan enn er von, þá eru nær engar líkur til þess að næstu kosningar láti hann halda borginni. Borgarstjórnarflokkurinn stefnir hratt í „R-lista heilkennið“, að halda völdum sama hvað það kostar.

Flokkur í herkví

VÞVEn hvernig stendur á því að Vilhjálmi leyfist þetta enn áfram, að halda flokknum í herkví, að því er virðist til þess eins að fá virðulega brottför (e. „Grand exit“) sem borgarstjóri? Flestir telja að það mun ekki gerast hvort eð er, þar sem styrinn stendur mikið til um manneskjuna Villa Vill. Flokkurinn þarf að vísu líka að ákveða sig í málefnunum sem kljúfa hann sem stendur: Orkuveitu- og flugvallarmálin eru óútkljáð innan flokksins og ekki er hægt að ætlast til þess að aðilar utan hans skýri línurnar sem eru í kross innan hans. Þessi mál skipta sköpum og tel ég t.d. alvarlega skyssu að flytja flugvöllinn og að hætta við Bitruvirkjun. Margir aðrir flokksmenn og leiðtogar virðast vera ósammála mér.hanna_birna_544554.png

Höfuðlaus her á blogginu 

Skoðanakönnun hefur átt sér stað hér til hliðar á þessari bloggsíðu undanfarið um þessi málefni. Niðurstaðan er sú að um 75% þeirra sem lýst hafa áliti sínu telja að borgarstjórnarflokkur Sjálfstæðisflokksins sé höfuðlaus her, en 10% að hann sé undir öruggri stjórn. Lesendur þessa bloggs eru margir hverjir hægri sinnaðir, þannig að niðurstaðan hlýtur að teljast ábending um vandræði, nema að einungis andstæðingar flokksins sjái sig knúna til þess að kjósa.

Hver er lausnin? Eins og Intrum segir: „ekki gera ekki neitt“. Tökum af skarið.


mbl.is Flestir vilja Hönnu Birnu í embætti borgarstjóra
Tilkynna um óviðeigandi tengingu við frétt

Frí á miðvikudaginn?

Veðrið gælir við Austurland núna, en sjáið Hiti ISL 28 05 08 kl 18spána fyrir vesturhlutann á miðvikudaginn 28/5: 20°C og úrkomulaust. Ætli það verði lokað vegna góðviðris í höfuðborginni?

Vedur.is    veðurþáttaspá:


mbl.is Skýjað víða um land
Tilkynna um óviðeigandi tengingu við frétt

Sjóðandi sunnudagur

Veðurstofan spáir ótrúlegum hlýindum fyrir Vedur Island 17C hiti mainæsta sunnudag, 25/5 kl. 15:00 sbr. kortið hér til hliðar. Enn er enga vætu að ráði að finna í því, en uppgufun næstu daga hlýtur að skila sér niður. Ferðalangar í Ásbyrgi ættu að hafa sóláburðinn með sér. Við hin getum varla kvartað.

Hafið góða helgi, hvort sem það er úti á palli eða á næturvaktinni.

Krakkar i heimalauginni


mbl.is Næstum óraunveruleg veðurspá
Tilkynna um óviðeigandi tengingu við frétt

Dýr er hver Bitru- túristinn

Verðleggjum nú væntanlega túrista næstu 20 ára á Bitru- svæðið, þar sem jarðhitavirkjun átti að rísa. Þeir eru víst aðalástæðan fyrir þeirri arfavitlausu ákvörðun að hætta við virkjunina. Hver ferðamaður sem dáist að ósnortinni náttúrunni þarna í nálægð jarðhitamannnvirkjanna kostar okkur og niðja okkar hundruð þúsunda, auk fjölda tækifæra til athafna og vaxtar sem fara forgörðum vegna nokkurra þúfnaaðdáenda. RÚV lýsir tjóninu vel á síðu sinni RUV.is, birt hér að neðan því að tengilinn virkar illa.

OR mynd jardhitiNú missum við dampinn í frumkvöðulsstarfsemi jarðhitans, en allt í einu er Bitra orðin það langflottasta síðan niðurskorið brauð var fundið upp. Við erum sammála um Hveradal í Kerlingarfjöllum og aðra slíka staði, en Bitra hafði ekki annað með sér en öfgafulla náttúruverndarsinna sem langaði til þess að sýna vald sitt og tókst það. Þau sem þjást eru þegnar þessa lands, sem geta yljað sér við þá tilhugsun í kulda og athafnaleysi komandi vetra að nokkur hundruð græningjar hafi heillast af ákvörðuninni að hafa „bjargað“ svæðinu frá vondu körlunum með borina, sem allir dásömuðu fyrir stuttu.

Við skulum vona að sá stjórnmálamaður finnist, sem þori að taka beina afstöðu með Bitruvirkjun og að hún komi sem fyrst til framkvæmda.

Af RUV.is :

 

Bitruvirkjun: Mörg verkefni tapast

Ekkert verður af verkefnum fyrir tugi milljarða króna sem annars hefðu verið unnin við byggingu Bitruvirkjunar. Þeir sem missa af verkefnunum eru m.a. verkfræðistofur, vélsmiðjur, flutningafyrirtæki, ferðaþjónusta, auk iðnaðar- og verkamanna. Fulltrúar þeirra undrast fögnuð borgarfulltrúa vegna þessa.

Orkuveitan hefur ákveðið að ekkert verði af Bitruvirkjun eftir að álit Skipulagsstofnunar reyndist vera neikvætt í garð virkjunarinnar. Stjórnarformaður OR hefur m.a. sagt að fyrir liggi að ekkert verði af framkvæmdinni á þessu kjörtímabili.

Ljóst er því að hætt hefur verið við gerð virkjunarinnar þar til annað verður ákveðið og er ekki að sjá, miðað við yfirlýsingar stjórnenda OR og stjórnar fyrirtækisins, að slíkt sé í spilunum. Orkuveitan hefur þegar lagt um 1 milljarð króna í verkefnið.

Áætlað er að bygging virkjunarinnar kosti um 25 milljarða króna og taki um fimm ár að ljúka því. Samtals var gert ráð fyrir að við bygginguna mundu starfa þessi fimm ár um 500 manns frá ýmsum verktökum. Þeirra á meðal eru hönnuðir frá verkfræðistofum, eftirlitsverkfræðingar, jarðboranir, vélsmiðjur sem smíða rör og leiðslur, jarðvinnuverktakar, flutningafyrirtæki, fólksflutningar og veitingaþjónusta að ógleymdum iðnaðar- og verkamönnum.

Gert var ráð fyrir að orkan yrði seld til tveggja eða þriggja stórra fyrirtækja í Þorlákshöfn. Óvissa er nú um hvort sú starfsemi verður að veruleika. Kísilhreinsiverksmiðja, sem hefði orðið stærsti kaupandinn, kostar um 70 milljarða að byggja auk tækjakaupa frá útlöndum. Nokkur hundruð manns hefði þurft til að byggja hana og setja saman vélbúnaðinn, ófaglært fólk, faglært og háskólamenntað. Þá hefði þurft um 500 manns til langframa í verksmiðjuna, 300 í fyrra áfanga og 200 í þann seinni.

Ljóst er að allar líkur eru á að þarna hverfi störf fyrir nokkra tugi milljarða króna á byggingartímanum, auk hinna 500 framtíðarstarfa. Fulltrúar þessara atvinnugreina, sem rætt hefur verið við, undrast fljótaskriftina á ákvörðun OR að hætta við og lýsa jafnframt undrun á því að fulltrúar eigenda fyrirtækisins, borgarfulltrúar, skuli lýsa fögnuði yfir þessari niðurstöðu.

Fréttastofa Útvarps hefur heimildir fyrir því að menn líti nú í kring um sig eftir möguleikum á að af Bitruvirkjun geti orðið, með því að Orkuveitan selji verkefnið. Þannig nái hún inn kostnaðinum sem þegar er áfallinn upp á um milljarð. Þetta hefur verið óformlega rætt hjá öðrum orkufyrirtækjum, en ekki innan Orkuveitu Reykjavíkur. Ljóst þykir að sé gagnkvæmur vilji fyrir hendi hjá kaupanda, Orkuveitunni og sveitarfélaginu Ölfusi sé mögulegt að láta þessi verkefni verða að veruleika.

 


mbl.is Fögnuður stjórnarmanna á móti hagsmunum OR
Tilkynna um óviðeigandi tengingu við frétt

Framlengt vegna fjölda áskorana

Stýrivaxtavitleysa Seðlabanka Íslands heldur áfram og Leiksýningin stóratryggir öryggt framhald hávaxtastefnunnar, sem flest stjórnmálafólk þykist vera á móti, en styður í raun. Fólki er talið trú um, að „sterk“  króna sé eftirsóknarverð og að háir stýrivextir séu nauðsynlegir til aðhalds. Þessari gömlu leiksýningu átti að vera löngu lokið, en nú eru settar upp aukasýningar vegna fjölda áskorana bankanna og vaxtamunarspekúlanta, sem höfðu ekkert almennilegt til að græða á síðustu mánuði nema kaup og sölu krónunnar, þegar þeir eru vanir miklu öruggari viðskiptum, að kaupa íslensk ofurvaxtaskuldabréf og mala gull án vandræða á kostnað gjaldmiðilsins.

Skuldabréf að andvirði um 150 milljarða króna gengu út í gær, sem á víst að sýna það feikna- traust sem fjárfestar hafa á krónunni og á bankakerfinu.  Seðlabankar Norðurlanda hafa myndað öryggisnet þeirra sem lána hver öðrum í hring, þannig að spurt er, hvað getur klikkað?

Nú heldur þú því áfram að borga tugi prósenta í vexti og verðbætur. Inn á milli koma síðan gengisfellingar og verðbólguskot sem eru nauðsynleg til þess að greiða vaxtamuninn sem „fjárfestarnir“ mjólka út úr gjaldmiðlinum sem ber hæstu vexti „þróaðra“ ríkja. Gangi þér vel!


mbl.is Stýrivextir áfram 15,50%
Tilkynna um óviðeigandi tengingu við frétt

Þakkir til samstúdenta

Fagnaður 30 ára stúdenta Menntaskólans í Reykjavík (MR 1978) að Hótel Loftleiðum sl. Laugardagsvöld 17/5 gekk vel og honum lauk með líflegu spili hljómsveitarinnar Saga Class. Ég tók nokkrar myndir, en nokkrar þeirra eru núna hér inni á blogginu (myndaalbúm MR78). Hér á eftir fylgir hluti ræðu minnar, fyrir þann sem sofnaði fram á borðið og missti af henni. Trúlegt að hann vilji bæta sér það upp með lestrinum!.

Ég þakka þeim sem mættu fyrir að skemmta mér svo vel.

Bróðurpartur ræðunnar:

Það er gaman að sjá ykkur, kunnugleg andlit frá þeirri tíð er heimurinn var ostran manns. „The world’s mine oyster“ eins og Shakespeare sagði.   Hér er mættur hinn gjörvillegasti hópur áður efnilegs fólks, um 110 manns sem samanstendur af MR stúdentum árið 1978 og mökum þeirra. Ef einhver skyldi gera sér grein fyrir því núna að hann sé á rangri hátíð, þá er honum frjálst að fara, en líka jafnvel vera áfram og hlusta á okkur mæra gömlu MR gildin. Það hlýtur að vera óviðjafnanleg upplifun fyrir utanaðkomandi.

--------

MR stúdentar 1978 eru 150 talsins., en tveir þriðju hlutar, 100 manns, eru fæddir árið 1958. Um 23% hópsins eru fædd 1957 eða rétt fyrr (4), en 10% fæddust árið 1959. Við erum því rétt um fimmtugsaldurinn sem hópur. Þegar Skúli snillingur úr X- bekknum verður fimmtugur þann 26. maí næstkomandi, þá verður helmingur okkar hóps orðinn fimmtugur. Það síðasta en ekki síðsta okkar til þess að verða fimmtugt að aldri verður Gunnar J. Árnason heimspekingur, þann 27. nóvember á næsta ári, blessað barnið. Það er því enn möguleiki að snapa sér fimmtugsafmælisveislur hjá tugum manna næsta rúma árið, ef maður kemur ár sinni vel fyrir borð hér.

Mörg okkar hafa mætt nú þegar í nokkur fimmtugsafmælin og hafa því fengið sinn skerf af gríni og stríðni um þessi tímamót, ef þau eru þá einhver tímamót. Að vísu styður stjörnuspekin mín þá kenningu, því að nú erum við stödd þar sem við verðum að losa okkur við allt sem er úr sér gengið og halda einungis því sem traust er. Þá verður að vísu lítið eftir af mér, held ég!

En það felur líka í sér að taka til á háalofti hugans og þá fer nú að vandast málið. Þegar kassarnir eru opnaðir, þá er ómögulegt að ákveða hverju skal halda og hverju skal kasta. Því er gjarnan öllu haldið, bara til öryggis, en uppsöfnuð reynsla, nám og tilfinningar fimmtugrar manneskju getur tekið ansi mikið pláss á harða drifinu manns. Við erum því mörg í Limbólandi en komumst svo nær okkur sjálfum fljótlega.

Ef litið er til fæðingartímans, þá koma kannski skýringar á því hver við erum. Þá var Spútnikk skotið upp í geim og NASA var stofnað, rafsegulsvið jarðar uppgötvaðist, sólin mældist í hámarki sínu og allt var útúrspeisað. Örgjörvinn var fundinn upp, og núðlurnar mikilvægu. Bobbý Fisher vann Bandarísku skákmótaröðina 14 ára gamall. Þróun kjarnorkusprengja var á fullu og tilraunasprengingar áttu sér stað yfir Suður- Atlantshafi, en meðhöndlun sprengjanna var eitthvað slöpp, því að Kanarnir misstu eina á hús í Suður Karólínu. Kalda stríðið ríkti og Krútséf tók við í Sovétinu. Kastró réðist á Havana (ekki bara vindilinn) og uppreisn varð í Írak og í Alsír. Siglt var undir Norðurpólinn og þorskastríðið vegna 12 mílna hófst, strumparnir urðu til og efnahagskreppa skók heiminn.

Á þessum umbrotatímum fæddust við, ásamt Madonnu og Michael Jackson. Þessar 150 manneskjur hér hafa dundað sitthvað á sl. 30 árum frá útskrift. Líklega höfum við eignast yfir 300 börn, sem eru mörg hver farin að eignast börn sjálf.  Heilbrigðisgeirinn á sannarlega sína fulltrúa í þessum MR- árgangi. Hópurinn hefur því bjargað fjölda mannslífa eða amk.heilsu fólks og bætt lífsgæði þeirra.  Menntageirinn er mjög fyrirferðarmikill og má því segja að við höfum sett stoðir undir framtíð þúsunda manna (hér koma fiðlurnar inn). Hér eru verkfræðingar og arkitektar sem hafa hannað framleiðslu og byggingar og reist þær, flestum til hagsbóta. Hér eru líka lögfræðingar.

Við hin höfum líka gert margt af viti, sem heitir alls kyns nöfnum Við höfum öll leitast við að læra á lífið, finna samhljóm og tilgang í þessu öllu. Við reynum að bæta menninguna og lífið á einhvern hátt. Eða ekki!

Þrjátíu ár hafa gert okkur að miklum reynsluboltum. Hjá 68 kynslóðinni þýddi það að maður hafi legið í dópi, en hjá 78 kynslóðinni kannski að maður hafi reynt ýmislegt, verið Spútnikk og skotist upp á stjörnuhimininn en sprungið með hvelli og glæsibrag.

30 ár hafa fært okkur kannski 800 ástarsambönd sem næstum því öll skiluðu alfarið af sér taumlausri ánægju, gangkvæmum skilningi og varandi langtímavinskap. Í upphafi hrifust margir af hólkvíðum mussum, flatbotna skóm, ómáluðum andlitum, náttúrulegri líkamslykt, ómældu líkamshári og þyngdaraflsbrjóstum. En Diskóið og Hollýwúdd bjargaði okkur flestum með glys, glamor og uppstríluðu Farah Fawcett og Wham lúkki, sem hefur loðað við okkur síðan. Blásarinn hefur verið einn traustasti vinur okkar margra.

Bekkirnir hafa nú ekki allir fetað sömu slóðina. Augljós er hefnd nördanna, sbr. X- bekkinn. Við fórum vonandi flest eftir ráðleggingu Sykes (ekki Bill Gates), þar sem hann sagði: „verið góð við nördana, því að líklega munuð þið vinna hjá þeim síðar“.

En verum góð við hvert annað, njótum líðandi stundar og bætum við eigið líf og gömlu skólafélaganna. „O, alte Burschenherrlichkeit“ lýsir þessu víst, en Eiríkur ljósrauði og Halldór H. náðu kannski ekki að koma þýskunni nægilega vel inn um þykka höfuðskelina mína. Þegar við sungum: Wo ist die alte Treue? Þá varð mér alltaf hugsað: Hvar er gamla treyjan?   Hvað kemur fatnaður þessu við?

En verst var að skilja, Jerum, jerum, jerum o Quae mutatio rerum: 

Hvílíkt yfirskegg á afturendanum!

Engin furða að ég fékk 1,0 í latínu á vorprófinu!


Næsta síða »

Höfundur

Ívar Pálsson
Ívar Pálsson

Viðskiptafræðingur með útflutningsfyrirtæki, en grúskar í flestu.

Innskráning

Ath. Vinsamlegast kveikið á Javascript til að hefja innskráningu.

Hafðu samband