Skerum á hnútinn: seljum RÚV

Skuldasöfnun Ríkisútvarpsins keyrir um þverbak þrátt fyrir austur skattgreiðenda til stofnunarinnar, þ.á.m. minn og fjölskyldu minnar með marga tugi þúsunda á ári þangað, einnig vegna fyrirtækis míns. Þessari sjálftöku á hálfum milljarði króna á mánuði verður að linna, sérstaklega núna þegar vaxtagjöldin sliga ofhlaðna stofnunina.

17 milljónir hvern dag 

Óli Björn Kárason varaþingmaður Sjálfstæðisflokksins lýsir uppsöfnuðum vanda RÚV í góðri grein í Morgunblaðinu í dag og krefst aðgerða, enda nýtist þetta fé mun betur í annað eða hjá skattgreiðendum sjálfum. Sjálfum finnst mér réttast að hætta strax austrinum í gjaldþrota ríkisbatteríið strax og selja það í heild sinni. Við söluna mætti skoða hvort framlag okkar færi beint til einkahlutafjár, þar sem t.d. þriðjungi eignar væri haldið eftir við söluna til þeirra þarfa.

Þinn tími er liðinn, RÚV 

Hvernig sem fer verður að hætta að mata þessa kvörn sem RÚV er. Þetta kerfi er barn síns afdalatíma, þegar orfið, ljárinn, hrífan og Ríkisútvarpið var það helsta sem þörf var á. Núna er þetta bákn lýsandi fyrir útþenslu sósíalismans, sem engu eirir þegar kemur að upptöku ríkisins á aflafé þegnanna. Að auki hamrar báknið á fjöldanum kvölds, morgna og um miðjan dag með sína sósíal- demókratísku afbökun á raunveruleikanum sem kallast Fréttir RÚV, allt í nafni þjóðarinnar. Við skulum bara rétt vona að þjóðin sé ekki eins og RÚV, því að þá er okkur ekki viðbjargandi sem heild.

Drífið nú í þessu, Sigmundur Davíð og Bjarni og seljið Ríkisútvarpið! 

 

Lánagreiðslur RÚV 593 millj. á ári