Spá um heiðskírt í Reykjavík

Áramótin samkvæmt skýjahuluspá Veðurstofunnar virðast ætla að verða þannig að heiðskírt verði í Reykjavík, sjá mynd. Gleðilegt ár! 

Flugeldasalan meiri en í fyrra

Kúgun Hjálmars og Dags gegn borgurunum þarf að linna

Sósíalista- tvíeykið sem heldur skipulagi Reykjavíkurborgar í helgreip sinni opinberar ídealisma sinn í staðnaðri jólaumferðinni þar sem andstæðingur þeirra er meginþorri almennra borgara sem kjósa að ferðast um á bílum. Dagur B. Eggertsson borgarstjóri hefur marg- rætt það hvernig samgöngumáta hann vill að við notum en nú bætir Hjálmar Sveinsson, formaður umhverfis- og skipulagsráðs vel í og lýsir sýn sinni við Morgunblaðið 19/12/2016. 

Umferðarkerfið springur hvort eð er

Hjálmar segir það engu breyta þótt byggð verði mislæg gatnamót því framtíðarspár um umferðarþunga sýni að gatnakerfið muni springa ef umferð vegna einkabílsins eykst á sama hraða og hún hefur gert liðna áratugi. "Ef umferð eykst eins mikið til ársins 2040 og hún gerði árin 1987- 2012 þá verður hér allt stopp" segir Hjálmar. Þá rifjast upp fyrir mér skrif hans á vefnum hjalmar.is um aðalskipulagið árið 2014 þar sem segir m.a.:  "Skipulagið markar tímamót. Með því er horfið frá bílmiðuðu skipulagi borgarinnar, sem hefur ríkt hér í 50 ár, og tekið upp skipulag sem setur manneskjuna í öndvegi." 

Einnig segir hann, ef byggt verður í austurjaðri borgarinnar:

"Þá verða úthverfi að innhverfum og bílaumferðin á stofnbrautum borgarinnar austur og vestur kvölds og morgna margfaldast.Það mun lengja vegina í borginni, kalla á óhemju dýrar framkvæmdir við umferðamannvirki, auka svifryksmengun og vinna gegn almenningssamgöngum, hagkvæmri nýtingu innviða og skynsamlegri landnýtingu. Það er algjörlega glatað."

Þessum bílum verður ekið

Þetta er í höfði Hjálmars, en hver er svo raunveruleikinn? Fólk endurnýjar bíla sína og vill nota þá, hver metmánuðurinn rekur annan í bílasölu og umferð. Ferðamenn (fjölgar um 30% á ári) sem hingað koma vilja gjarnan líka vera á bíl eins og heimamenn, enda er það sjálfsagt hér í rýminu á norðurhjara. Tölurnar sýna skýrt að yfir 80% ferðalaga fólks á Reykjavíkursvæðinu á veturna er á bílum, þrátt fyrir gott framboð strætisvagna.

Áætlun Samfylkingar

Um 12.000 bílar bættust í umferð Reykjavíkur á þessu ári en Hjálmari Sveinssyni finnst ekki vert að framkvæma í takt við þróunina, heldur í samræmi við stefnu hans og Dags sem hefur beðið skipbrot, enda hefur stuðningur við Samfylkinguna í borginni helmingast frá síðustu kosningum. 

Stopp í umferðinni

Á meðan kúgunarfélagarnir eru við stjórn stíflast umferðin meðvitað, enda er það beinlínis í skipulaginu að hægja á henni. Það tókst nokkuð vel því að meðal- ferðatími fólks til vinnu og skóla hefur lengst um 12 mínútur á nokkrum síðustu árum. Þannig fórnum við 24 mínútum á dag vegna stefnu þessa fólks sem er þvert á vilja einstaklingsins til að stýra sínu lífsmynstri sjálfur. 

Kjósið þau burt

Það mun taka fjölmörg ár að vinda ofan af þessum uppsöfnuðu mistökum í borginni, en bráðum kemur tækifærið til þess að hefja það langa leiðréttingarferli og kjósa fólk til valda í Reykjavík sem vinnur fyrir borgarbúa en ekki gegn þeim.

 

Vegamálastjóri gagnrýnir borgina

Villandi umræða um svifryk heldur áfram

Um leið og svifryksmengun rýkur upp þá afsakar Reykjavíkurborg sig strax með nagladekkjanotkun íbúanna, þegar óþrif hennar og landburður í austanátt af heiðunum eru sannarlega yfirgnæfandi þættir, en nagladekk komast ekki í hálfkvisti við þá. Þetta er augljóst þegar horft er út til veðurs eða til mælinga á því, borið saman við svifryksmælingar. Eftir öskugosið í Eyjafjallajökli varð þetta mjög skýrt, svo bættist öskugosið 2011 við, en hvorttveggja hleðst ofan á almennan uppblástur á heiðunum. 

Kemur af fjöllum

Svifryksmengun er að jafnaði ekki mikil í Reykjavík, enda skolast hún út í kant gatnanna í bleytu, samsetningur af salt- uppleystu of-þunnu jurtadrullu- malbiki og aðallega áföllnum jarðvegi sem blæs mest í milljónum tonna af heiðum landsins (sjá línurit til hliðar). Í þurrki segist borgin ekki geta þrifið göturnar, en lætur það vera í rigningunni og leyfir skítnum að hrannast upp. Síðan kemur þurrkur, blæs af austri og strætó keyrir með kantinum og eys ófögnuðinum yfir okkur öll. Tilsvör borgarinnar um þetta athafnaleysi eru gjarnan með ólíkindum, en alltaf skal tönnlast á nagladekkjum, sem náðu 17% sem orsakavaldur þegar reynt var að mæla það. Hvað um hin 83 prósentin? Margir hafa bent á þessa þætti, en þetta heldur ótrautt áfram.

Tökum á vandanum sjálfum

Þungir bílar eins og strætó, rútur og flutningabílar slíta malbiki margfalt á við fólksbíla, af hverju minnist borgin ekki á það? En sama af hvaða orsökum skíturinn er, hann þarf að fjarlægja og borgin stendur sig ekki í því, heldur sparar sér aurinn og sendir okkur mörg á heilsugæslurnar í staðinn.

Nagladekkin hafa bjargað mörgum mannslífum og halda því áfram. 

Sextánföld svifryksmengun

Hugmyndafræði haftanna ræður

Dagur borgarstjóri Reykjavíkur og hópur hans stjórnar málefnum borgarinnar eins og honum finnst að þau ættu að vera en ekki eins og þau eru eða að farið verði eftir vilja borgarbúa. Daglegum bílferðum í borginni fjölgaði um 12.000 bíla á milli ára á meðan borgin fer eftir sínum gömlu áætlunum um breyttan lífsstíl, sama hvað fólkið eða viðskiptalífið vill. Samkvæmt planinu eigum við að vera komin niður í um 68% bílnotendur og stefna niður, en erum um 80% og stefnum upp.

Þrengja að og þröngva

Meirihlutanum í borginni finnst allt í lagi að leggja alltof lítið af þunnu malbiki blönduðu með jurtadrullu, þegar þörf er á gömlu þykktinni og grjóthörðu tjörublöndunni, ásamt því að leggja fleiri kílómetra í takt við aukið álag. Átak þarf að eiga sér stað í bílastæðamálum vegna fjölgunar bíla, ferðalanga og fólks í verslunar- eða skemmtierindum í þeim góða hagvexti sem við njótum. En borgin svarar með því að þrengja götur, fækka bílastæðum, þétta byggð með bílastæðalitlum húsum og búa til neyð hjá vegfarendum. Síðan hækkar hún svo sektir um tugi prósenta þegar næsta stæði er úti í hafsauga.

Lokað á viðskiptin

Síðan þegar verslunareigendur við Laugaveg horfa fram á hugsanlega gósentíð, þá lokar Dagur götunni (en var búinn að tryggja að enginn gæti lagt í næstu götu samsíða, Hverfisgötu) og þá var draumurinn búinn. Vonlaust er að stunda viðskipti þegar svona pólitíkusar hunsa þarfir borgaranna og þröngva sínum ídealisma upp á þá á þeirra kostnað. Gjarnan eru haldnir svokallaðir samráðsfundir, sem er enn ein leiðin til þess að láta eins og hlustað sé á þegnana, á meðan valtað er yfir þarfir þeirra.

Áður réð Dagur þessu í gegn um Besta flokkinn og nú í leifum af Samfylkingu, en með hjálp vinstri flokksbrota. Ætlar fólk að leyfa honum að halda svona áfram með borgina í tóma steypu?

 

 

 

 

Mótmæla lokun Laugavegar

Orðskýringar í stjórnarmyndun

Penta- gone: Möguleiki á fimm flokka stjórn farinn.

Pí- rati: Sá sem nær ekki 3,14 saman, hvað þá 5,0.

Át-í-quattro: Fjórir borða köku en mynda ekki stjórn.

Ríó tríó stjórnin verður þjóðleg og hress (með XD)!

En hér er mynd af Hexíu de Trix:

Píratar funda í dag

Suður- Evrópa framtíðarlítil

Suður- Evrópa, sem er drjúgur hluti ESB og sérstaklega Evrusvæðisins (sjá myndir) er ólíkleg til þess að rífa sig upp úr efnahagsdrunga þeirra, þar sem t.d. 25-47% ungs fólks undir 25 ára er atvinnulaust. Á Íslandi er hinsvegar sautjándi hver í þessum hópi atvinnulaus, sem er ansi nálægt vinnuaflsskorti.

Nær tífalt fleiri ungar konur (U25) eru atvinnulausar á Grikklandi en á Íslandi, en sá hópur á Ítalíu er "aðeins" 4,5 faldur á við Ísland.

Frakkland, Spánn, Ítalía, Portúgal og Grikkland eru samanlagt stór hluti Evrópu og fær flóttamannastrauminn yfir sig þar að auki alla daga. Hróplegt ósamræmi er á milli þessa hóps og Þýskalands varðandi atvinnuleysi og efnahag yfirleitt. Þessi ríki geta ekki fellt Evru- gengið, sem þörf er á til þess að rétta hvert land af og því kemur það m.a. út í atvinnuleysi. Ef Ítalía fær líruna aftur er talið að gengið félli um 30-40%, því að löng uppsöfnuð spenna hefur myndast á tíma þeirra í Evrunni.

Búist er við 10-15 milljónum atvinnulausra hælisleitenda inn í ESB á næstu árum í viðbót við þær 15 milljónir atvinnulausra sem fyrir eru. Hagvöxtur er nær enginn í Suður- Evrópu en um 4-5% á Íslandi. Hvernig dettur einhverjum sem þekkir tölurnar enn í hug að Íslandi beri að ganga í ESB og taka upp Evru?

Óskiljanlegt er að töluglöggt fólk í forsvari í samtökum í atvinnulífinu skuli enn hamra á ESB- aðild, þegar þessi fámenna þjóð okkar er núna með öll Trump á hendi, sama hvert er litið. Orkuframleiðsla, auðlindastjórnun, glæpaleysi, kvenfrelsi, tekjujöfnuður, allt er þetta á besta veg og jafnvel númer eitt í veröldinni. Hví að glutra því niður? Birgitta hefur eflaust svar við því.

 

Atvinnuleysi ungs fólks langminnst hér

Staðfestið að ríkisstjórnin klári málin

Augljóst er að upphlaupið gegn ríkisstjórninni í vor borgaði sig ekki. Vitrænasta lausnin er sú að ríkisstjórnin sitji út tímabilið með Bjarna Benediktsson sem forsætisráðherra, þar sem annar flokkur ver hana vantrausti og kosningar verði í maí. Þá gengur vélin smurt, ekki höktandi á einhverjum sílindrum sem aðrar lausnir bjóða upp á. Þá kallast þetta líklega ný ríkisstjórn til vors.

Fulltrúar annarra flokka ættu að kannast við ábyrgð sína og styðja þetta svo að tekið verði á flestum þeim þáttum sem flestir eru sammála um að nái fram að ganga, svo sem heilbrigðismálum, afléttingu gjaldeyrishafta ofl. ofl. Líklegt er að ástandið í Evrópu verði skrautlegt næstu mánuði, en við verðum að gæta stöðugleikans hér fram að næsta eldgosi. 

„Við finnum lausn á þessu“