Gnarr, Gnarr, nú gnísta tennur

Jón Gnarr, borgarstjórinn fyndni, ásamt Degi B. Eggertssyni sem öllu ræður ættu báðir að fara í smá borgartúr gangandi, hjólandi eða akandi á nagladekkjalausu bílunum sínum út fyrir upphituð stræti 101 miðbæjarins þessar vikurnar, t.d.  um íbúagöturnar. Þá sæju þeir kannski hvernig venjulegt fólk í Reykjavík hefur það. Eða bara að heilsa upp á slysadeildir spítalanna, þar sem örtröðin er.  Ísinn á götum borgarinnar er í boði Besta flokksins og Samfylkingarinnar.

 

Allar bjargir bannaðar 

Fólki er allar bjargir bannaðar: Nagladekk fá ekki að vera í friði. Snjónum var ekki mokað strax, síðan upp á stéttirnar. Salt er ekki notað af umhverfisástæðum. Sandur er ekki notaður af því að hann þarf að sópa síðar! Íbúagötur eru ekki ruddar tímanlega, saltaðar eða sandbornar og gangstéttir alveg óruddar. Asahláka og vindur gulltryggja beinbrot og heilsutjón fólks. Eldra fólk vogar sér ekki út úr dyrum.

 

Svik að hætti (ráð)hússins 

Heimatröðin mín er með 15 sentimetra þéttpökkuðum klaka sem hefur fengið að byggjast upp lítt áreittur frá borgarinnar hendi. Fólk var blekkt til þess að sleppa nöglunum með því að nóg yrði saltað og sandborið. En nú eru þau loforð svikin eins og önnur sem Gnarr lofaði að svíkja ef hann yrði kosinn.

 

Borgari bregst við 

Ég var orðinn úrkula vonar um að borgin bryti ísinn svo að ég fór út vopnaður rafmagnsfleyg, heitavatnsslöngu og skóflu. Því miður á ég ekki málmleitartæki eins og borgin, en við nágranninn fleyguðum og mokuðum þar til við fundum eitt ræsanna eftir minni. Traustir menn frá borginni með járnkarla redduðu þessu hér áður, en nú er tími borgaranna, því að borgarstjórn er ekki til. Ég réðst á klakafjallið á gangstéttinni eins og frægt er orðið og sjá má hér á mynd og vídeó. Þrír tímar af heilsurækt á fullu.

 

Hvernig er gatan heima hjá þér?

 

Eru Jón Gnarr og Jóhanna Sig. í dugleysiskeppni? Hvort hefur betur? Mjótt er á mununum.

 

Vídeóið af mér með fleyginn er hér á Youtube: 

http://www.youtube.com/watch?v=EEpHdKvnuR8&context=C338117cADOEgsToPDskJvnMq7NUGchZDrHiun1rRJ

 

Lélegt skyggni í hvössum éljum

Athugasemdir

[Helga Kristjánsdóttir, 9.1.2012 kl. 02:29]

Kratarnir í Kópavogi eru engu betri.Ég og fleiri hafa verið hér í stofufangelsi,all lengi,það er af sem áður var.

[Jón Valur Jensson, 9.1.2012 kl. 05:03]

Þeir, sem brjóta sig, ættu að stynja við: "Þakka þér, Gnarr, og ykkur, Samfylkingar- meðvirka gagnslausa liðið ykkar!

Sjá nánar hér: Vill “Besti flokkurinn” að fólk brjóti sig?

Takk, Ívar.

[Jón Valur Jensson, 9.1.2012 kl. 06:34]

Það eru ennfremur frábærir Staksteinar um þetta mál í dag, lesið þá á bls. 8 í Mbl., þeir eru ekki komnir á netið, þegar ég rita þetta, en verða brátt opnir öllum að lesa HÉR á leiðarabloggi Mbl.

[Ívar Pálsson, 9.1.2012 kl. 08:33]

Illt er að heyra með Kópavog, Helga. Hlaupa- og göngustígarnir sem mætast í Fossvogi voru gjarnan tanduhreinir Kópavogsmegin á sumrin. Ætli umhverfisráðherrann setji hömlur á saltnotkunina eins og allt annað?

Takk, Jón Valur. Borgarstjóri verður að kannast við ábyrgðina sem hann kaus yfir sig.