Það nýjasta er það kaldasta

Veðurfar hér á þessari öld hefur ekki farið hlýnandi, þrátt fyrir "heita" árið í fyrra, 6,6°C. En 2015 er það kaldasta, um 5,0°C og það næsta stefnir í kuldann frekar en hitt. Nýjustu upplýsingar eru yfirleitt marktækastar. Ísland sendir tugi manna til Parísar á loftslagsráðstefnuna til þess að koma í veg fyrir upphitun heimsins að meðaltali, með mælanlegum árangri eftir 85 ár. Mikill er máttur mannsins.

Metnaðarfull áætlun

En ef metnaðarfull áætlun góða fólksins nær árangri, þá munar um 2-3°C á því hvort tekið sé til aðgerða eða ekki. Það er einmitt nær sama hitastig niður og var á Íslands kaldasta ári mældu, árið 1892. Um það leyti gerðust Íslendingar upp til hópa flóttamenn vegna óáran og veðurfars eins og afi minn og amma í móðurætt.

Meðaltal heims

Sumarið á Íslandi er víst að meðaltali ekki nema 3 vikur (ef sumar er 10°C +). Nú þegar sumt fólk vonast eftir kornrækt og aðstæðum á við landnámstímann, en bið verður á því, þá grípur heimurinn til aðgerða af því að eyðimerkurhitinn hækkar kannski í Afríku. 

Út til Parísar

Nú verður æ erfiðara fyrir 101 miðbæjarfólkið að komast á milli menningarviðburða vegna snjóa. En það er þó rutt til Keflavíkur svo að þau geti flogið til Parísar og sammælst um að kæla heiminn.

Árið til þessa það kaldasta á öldinni

Athugasemdir

[Ómar Ragnarsson, 4.12.2015 kl. 22:55]

Svona á að komast að einföldum niðurstöðum: Flatarmál jarðarinnar er 511 milljón kílómetrar, en hitinn á 0,1 milljón ferkílómetra, eða 0,002% jarðarinnar, skal verða það eina marktæka.

[Ívar Pálsson, 5.12.2015 kl. 00:49]

Já, Ómar ég á við Ísland, ekki Kyrrahafið, Suðurskautlandið, eyðimerkur eða annað sem fólk heldur að það geti stjórnað að vild. Það vill svo til að mikilvægustu ferkílómetrar í lífi hverrar manneskju eru í kring um hana. Svo eru álögurnar lagðar á hverja þjóð. Nú vill svo til að kolefnisskattar eiga að fara frá hinum ¨ríku¨ þjóðum til þeirra fátæku svo að þær nái að aðlagast breyttum aðstæðum (sem við skópum ekki). 

[Ómar Ragnarsson, 5.12.2015 kl. 01:38]

Gott og vel. Það er hægt að rökstyðja ítrusta eigingirnissjónarmið, enda hef ég í mínum áróðri fyrir orkuskiptum lagt höfuðáhersluna á það, að þau verða óhjákvæmileg á þessari öld og að við erum í langbestri aðstöðu allra þjóða til að framkvæma þau.

Það er hins vegar rangt hjá þér að ætlunin sé að kæla loftslag niður í 1892, heldur er ætlunin að minnka hækkunina úr 4-5 stigum niður í 2-3.

Allt frá 1996 hafa tölvumódelin spáð því að við suðvestanvert Ísland yrðu sjórinn og loftslagið svalara en áður vegna aukins ferskvatns í Norður-Atlantshafi frá báðnandi jöklum, og að það yrði hluti af afleiðingum loftslagsbreytinganna.

Sumir vöruðu meira að segja við því að lítil ísöld gæti skollið á okkar slóðum, ef ekki yrði reynt að sporna við jafn miklum vexti gróðurhúsalofttegunda og hefur verið í gangi síðustu áratugi.

Ég vann íslenska útgáfu úr dönskum þætti um þetta og hann var sýndur í sjónvarpinu undir heitinu "Hið kalda hjarta hafanna." 

Málið snýst um það að maðurinn sé ekki á stórfelldan hátt í útblæstri að rugga bátnum með ófyrirsjáanlegum afleiðingum.

Síðan skautar þú og þínir skoðanabræður alveg fram hjá hraðri súrnun sjávar og afleiðingum hennar.  

[Ívar Pálsson, 5.12.2015 kl. 12:54]

Takk fyrir kommentin, Ómar. Mér finnst það raunsæi en ekki eigingirni að miða aðgerðir Íslendinga helst við þarfir okkar þjóðar, heldur en að þykjast bjarga heiminum. Aðgerðir til kælingar (eða ¨ekki hitunar¨) eru ekki skynsamlegar eða raunhæfar fyrir Íslendinga, fyrir utan þær staðreyndir að þær skipta engu máli og virka ekki á áratugum.

Ef litla Ísöld er vel hugsanleg vegna ferskvatnsins sem jókst vegna aðgerða manna aðallega frá Iðnbyltingartímanum, af hverju ættum við að leggja okkur fram í aðgerðir sem eru í kælingarátt eftir það? Hvaða hrokagikkur þykist geta reiknað út hitastig á Íslandi eftir 50 ár með allri þessari mögnuðu óvissu, þegar næsta ár er aldrei þekkt? Þetta módel gengur ekki upp.

Súrnun úthafanna er erfið, 100- 500 ára hringferli sem enginn ræður við eða reiknar út. Álíka og hækkun sjávarmáls.