EKKI skila 2006 styrkjum!

Óviturlegt er fyrir Sjálfstæðisflokkinn að skila styrkjum sem fengust í söfnun á löglegan hátt árið 2006. Fyrirtækjasamsteypur sem mokgræddu létu þá af hendi kannski hagnað eins eftirmiðdags til stjórnmálaflokks, íþróttahreyfingar eða líknarfélags.  

Endurgreiðslan er eltingarleikur við hverfult  vinstri- grænt almannaálit stundarinnar og hefur ekkert upp á sig nema að fella þennan stjórnmálaflokk enn neðar. Fyrst flokkurinn er svona vel stæður eða fer þetta frjálslega með fé, þá höfum við hjónin nú sagt upp styrktaraðild okkar að Sjálfstæðisflokknum, sem var að vísu ekki stór, en úttekt í hverjum mánuði árum saman.

Versta afspil flokksins er þó að vilja ekki ræða á landsfundi einu lausnina á málum málanna, skuldum þjóðarinnar.  Flokksstjórnin hefur næstu 15 daga til þess að lýsa því yfir að við munum ekki greiða skuldir bankanna eða fyrirtækjanna, en nær engin von er til þess að sú yfirlýsing fáist.

Við förum því fram af fossbrúninni niður í hyldýpið, öll sem eitt.

Þingflokkur fundar í dag

Bráðgóð grein um hjartans mál

Nauðsynlegt er hverri sálu að lesa bráðgóða grein Gunnars Skúla Ármannssonar læknis í Morgunblaðinu í dag, sem beint er gegn fyrirhugaðri lokun bráðamóttöku Landspítalans við Hringbraut. Rökin eru skýr og augljós.

Grein Gunnars Skúla hefst á þessa leið:

 

"VORIÐ 1961, snemma morguns, opnaði hjúkrunarfræðingur dyrnar á 6 manna stofunni sem afi minn svaf í ásamt fimm öðrum. Hann hafði verið lagður inn á Landspítalann í Reykjavík með kransæðastíflu þremur dögum áður. 1961 fengu sjúklingar morfín við verkjum og húsaskjól, ekki mikið meira. Því var það eðlilegt í þá daga að sjúklingar með bráða kransæðastíflu svæfu eftirlitslausir á 6 manna stofum Landspítalans. Því var það einnig eðlilegt að einhver væri látinn að morgni sem hafði gengið til náða kvöldið áður lifandi.

 

Þennan maímorgun var afi látinn, eðlilegasti hlutur í heimi, 55 ára gamall. Meðalaldur þeirra sem eru endurlífgaðir í dag er 57 ár.

 

1961 voru ekki til sérstakar hjartadeildir með þráðlausum búnaði sem fylgist með lífsmörkum sjúklinganna. Ekki voru til lyf sem bætt geta ástand sjúklinganna. Ekki til hjartaþræðing, ekki til kunnátta í endurlífgun, ekki til gjörgæsla. Ekki til hámenntað og þrautþjálfað starfsfólk. Því má fullyrða að hver einstaklingur sem lifði af kransæðastíflu árið 1961 hafi kostað Landspítalann margfalt minna en í dag. Því væri það, hreint rekstrarlega séð, mun hagstæðara að hverfa aftur til baka og taka upp þá einföldu meðferð sem var í boði 1961. Þrátt fyrir augljósan rekstrarhagnað vill enginn hverfa til gömlu tímanna. Munurinn á árangri þá og nú er svo augljós að ekki þarf að ræða málið."

Sverfur að skattaskjólum?

Það er samkeppni í skattaskjólabransanum, sérstaklega í lausafjárþurrðinni. Því er ólíklegt að t.d. Bretar með Jómfrúareyjar (þ.m.t. Tortola) losi um meiri upplýsingar en önnur skattaskjól, nema það henti þeim sérstaklega, t.d. vegna Íslendinga og Icesave. Enda kvartar forsætisráðherra Lúxemborgar og segir nokkur fylki og svæði Bandaríkjanna eigi að vera á listanum, s.s. Delaware, Wyoming, Nevada og Bandarísku Jómfrúareyjarnar ef aðgerðirnar eigi að vera trúverðugar.

 

Ríki eða svæði sem hafa lifað að mestu á fjármálaþjónustu með lágum eða engum sköttum munu ekki gefast svona upp án baráttu. Bresku Jómfrúareyjar samþykktu árið 2002 að gefa meiri upplýsingar og ekki liggja þær á lausu um Tortola- eyjar þeirra sjö árum síðar.

 

Þetta er sama þróun og með hagkerfin almennt: Féð mun streyma meira til Asíu. Þar er minna vesen!

 

Ýmsir tenglar yfir samþykkt G20 ríkjanna 2. apríl 2009:

G20: Tax havens, the first concrete achievement

http://www.guardian.co.uk/commentisfree/2009/apr/02/g20-tax-havens-sanctions

At a glance: G20 agreements

http://www.guardian.co.uk/world/2009/apr/02/g20-agreements-at-a-glance

China, maybe unsurprisingly, has started to throw its weight around

http://www.guardian.co.uk/politics/blog/2009/apr/02/g20-china

Put Delaware, Wyoming, Nevada on G20 tax haven list: Luxembourg PM

http://www.eubusiness.com/news-eu/1238507221.72

G20 commits to $1-trillion global stimulus package

http://www.cbc.ca/money/story/2009/04/02/g20-summit-london237.html?ref=rss

G20 summit: Sun setting on tax havens

http://www.telegraph.co.uk/finance/financetopics/g20-summit/5090593/G20-summit-Sun-setting-on-tax-havens.html

OECD birtir skattaskjólalista

Vondu karlarnir: sjómenn eða ríkið?

Raunverulegt virði krónunnar er miklu lægra en platgengið sem Seðlabankinn býr til. Það endurspeglast í því að staðfest eftirspurn er eftir gjaldeyri á t.d. 30% yfirverði miðað við gengið í dag og hugsanlega 50%. Bankahrunið og alþjóðlega kreppan með brottfalli vaxtamunarviðskipta olli í raun miklu meiri hækkun gjaldeyris en yfirvöld fást til þess að jánka. Þessi IMF- seðlabanki okkar í dag er ánægður á meðan vinstri vængurinn herðir enn skrúfuna á okkur en ekki á IMF og lánadrottnum sem þeir vernda með ofurvöxtum og gjaldeyrishöftum.

Uppgjör Íslands myndi taka á þessu öllu í einu: gengisfelling 50%, neitun vafasamra bankaskulda (aðallega Icesave) upp á þúsundir milljarða króna, gjalþrotauppgjör nýrra/gamalla banka samtímis, tenging við gjaldeyri á alþjóðamarkaði (EUR/ USD/ NOK), ásamt öðrum afgerandi aðgerðum, því að ljóst er að við getum ekki borgað skuldirnar og munum ekki gera það með sölu orkuveitna.

Vinstri stjórnin býr því til vonda karla, útflytjendur, sem voru góðir fyrir stuttu og áttu að bjarga landanum í Nýja Íslandi. Bátakarlar sem selja aflann sinn í íslenskum krónum eru nýjustu blórabögglarnir og nú á að góma þá með enn einum ólögunum. Fyrst neyðarlögin, svo gjaldeyrishöftin, núna sérlög um að íslenska krónan sé ekki gildur miðill í sölu afurða.

Ríkisstjórnin gerir sér ekki grein fyrir því að sjálfsbjargarviðleitni er sterkur eiginleiki íslenskra sjómanna. Skipsstjórnarmönnum ber að ná hæsta verði á afurðirnar fyrir áhöfn sína. Flestum er kunnugt um það hvað er raungengi krónunnar í erlendum viðskiptum, jafnvel niður í Reuters- uppboðsgengið, þar sem Evran er vel yfir 200 krónur. Útflutta afurðin ætti því að skila fjölda króna til Íslands, en má það ekki af því að ríkið býr til falskt Kremlar- gengi sem virkar ekki á markaðnum. 

Velkomin í vinstri- ríkisstýrðan IMF heim Íslands! "The Left Bank" kalla ég hann hér með. Kannski verður hann ekki sá eini sem er eftir, þökk sé MP.

Gjaldeyrisfrumvarpi dreift

Þjóð í dái

Þjóð sem býr við amk. 15.000 milljarða kr. skuldir, engin alvöru gjaldeyrisviðskipti, lítt starfandi banka, ofskuldug fyrirtæki og einstaklinga getur ekki látið eins og hagstærðir á við verðbólgustigið endurspegli rétt ástand hagkerfisins. Sjúklingur í dái er náttúrulega stöðugur og rólegur með afbrigðum. En um leið og tækist að vekja hann til viðskipta, t.d. með afnámi gjaldeyrishafta, alvöru stýrivaxtalækkun og stórfelldum skuldaafskriftum kröfueigenda, þá fara hagtölur aftur að verða virkar. Gengi krónunnar ræður þá mestu um verðbólguskotin.

En sjúklingurinn er enn á Morfíni til þess að koma í veg fyrir frekara lost, þó að hálft ár sé liðið frá bankafallinu. Það verður ekkert að marka neitt af þessu fyrr en horfst er í augu við óumflýjanlegt uppgjör skuldanna, sem var og er: við neitum að borga. Stjórnmálamenn þora ekki að standa á því, sérstaklega fyrir kosningar.

Talsvert dregur úr verðbólgu

Varlega með höfuðið

Sonur minn fékk heilahristing á snjóbretti í Davos í Sviss árið 2007 í fyrstu ferðinni, fyrsta daginn. Myndirnar hér til hliðar sýna þetta. Þar var faglega tekið á málinu af svissneskri skilvirkni. Meðvitundarleysið varaði í um tvær mínútur með minnisleysi fyrst á eftir. Sjúkraliði var strax kominn á staðinn, skoðaði strákinn og renndi sér með hann á sleða að kláfnum. Niðri beið sjúkrabíll, en alltaf var verið að skoða sjáöldrin og spyrja hann spurninga. Hann vissi að vísu varla fyrir hvaða vikudagur var og hvað staðurinn hét, þannig að þeir héldu kannski að hann væri í verra ástandi en hann var! Á spítalanum var hann undir stöðugu eftirliti í sólarhring og vakinn til þess að spyrja hann sömu spurninganna. Síðan tók við lega inni á hótelherbergi til loka ferðarinnar. Ekki mátti vera í mikilli birtu, ekki horfa mikið á sjónvarp eða að lesa mikið. Alls ekki reyna neitt á sig.

Við öll ferðafélagarnir keyptum hjálma og notuðum þá eftir það. Straks í upphafi kom nýi hjálmurinn sér vel, þar sem einn ungi brettakappinn í hópnum skall harkalega á höfuðið aftur fyrir sig. Ég hef alltaf verið með hjálm síðustu árin og finnst það hvort eð er mun þægilegra en ekki, enda er hægt að stýra loftútstreymi á mínum Giro hjálmi.  Erlendis nota flestir hjálm og þykir flott, enda mikil tíska í kring um það, en hér heima er enn verið að láta eins og þetta sé hallærislegt.

Venjulegur snjór er sjaldnast svona grjótharður, en mér sýnist margþjöppuð lög af bráðnum og endurfrosnum gervisnjó verða harðari en stálið í sushi- hnífi. Þannig aðstæður eru gjarnan þar sem flestir fara um eins og á byrjendasvæðum þar sem Natasha Richardson féll. Hugsanlega hefði hún lifað sitt skíðaslys af hefði hún sætt sig við og fengið álíka meðferð og sonur minn. Svisslendingarnir gengu hart eftir því að farið væri eftir þessum reglum, enda hætt við því að blæðing inn á heilann eigi sér stað.

Þetta er ekki upplifun sem sonur minn eða við aðstandendur viljum endurtaka. Við prísum okkur sæla fyrir Svisslendingana faglegu.

Hefði getað bjargað Richardson

Fiskur er heilafæði fyrir unga manninn

Sænsk rannsókn á 4.792 15-18 ára strákum sýnir þá sem borða fisk oftar en einu sinni í viku fá hærri einkunn á greindarprófum en hina sem borða fiskinn sinn sjaldnar. Fyrri niðurstöður annarra rannsókna höfðu sýnt að börn mæðra sem borðuðu fisk reglulega í óléttunni gengur betur á greindarprófum en öðrum. Einnig að eldri fiskætur hrörna síður andlega.

En maður veltir fyrir sér: Ef þú ert nógu klár til þess að meðtaka þessa staðreynd, þá ert þú líklega römm fiskæta, þannig að það þarf ekkert að benda þér á þetta. En það hlýtur að ganga vel að segja tánings- stráknum að borða oft fisk eins og að segja honum að ganga vel frá, taka til, hlaða farsímann eða að læra fyrir prófið!

 

 

**Fish may improve IQ of male teenagers
A study by Swedish researchers and published in the journal Acta Pediatrica has found that teenage boys who ate fish more than once per week scored higher in IQ tests than those who ate fish less than weekly.  Detailed questionnaires on diet and lifestyle were completed by 4,792 male adolescents when they were 15 years old.  At 18 years old the participants took standard intelligence tests.  One of the researchers, Dr. Maria Aberg is quoted as saying that these findings are significant because the study was carried out between the ages of 15 and 18, when educational achievements can help to shape the rest of a young man's life.   Aberg states that it appears that including fish in a diet can make a valuable contribution to cognitive performance in male teenagers. (Reuters)

Andlega hrörnunin byrjar við 27 ára aldur

Hvalir éta okkur út á gaddinn

Hvalir borða milljónir tonna af sjávarréttum við Ísland árlega. Hér er einstakt myndband frá BBC sem sýnir hnúfubak gæða sér á síld sem mávar og aðrir fuglar smöluðu saman fyrir hann, eins og við gerum með síld og loðnu:

http://news.bbc.co.uk/1/hi/sci/tech/7940597.stm

Hve lengi á að fóðra hvalastofna landsins án þess að nýta þá af einhverju viti? Loðnan hverfur ofan í þá á meðan byggðir manna þjást og stofnarnir eru í mældu hámarki. En Einar Kristinn þorði að taka á þessu rétt, sem betur fer.

Loðnuleit lokið

Kreppan kosin burt?

Loksins er orðið alveg ljóst hver samþykkir ómælda skuldaánauð á þjóðina. Það er og hefur verið Samfylkingin. Árni Páll Árnason staðfesti þetta í Silfri Egils í dag. Aðrir flokkar eru ekki á þeirri línu. Kosningarnar framundan munu snúast um það hverjir eru líklegastir til þess að lágmarka skuldsetningu þjóðarinnar með því að berjast gegn Icesave- skuldbindingum og annarri yfirfærðri ánauð á þjóðina.

Eins og staðan er í dag er Sjálfstæðisflokkurinn er lang- líklegastur til þess, þar sem skýrasta andstaðan við skuldbindingarnar er á þeim bæ, en Samfylkingin samþykkir álögurnar umorðalaust, sem hún hefur gert allt frá því í ágúst 2008, þegar Björgvin þv. viðskiptaráðherra hóf að senda staðfestingarbréf sín til Breta og síðan við fallið þegar Ingibjörg Sólrún kom í sjónvarpinu og sagði okkur eiga að axla þessa ábyrgð.

Enginn heilvita kjósandi fer að velta því fyrir sér hvort skera skuli niður milljarð króna hér eða þar, án þess að spá í það hvort samþykkt verði að skulda hundruð eða þúsund milljarða eða ekki. Það skiptir nær engu hvort sparað er, ef ekki er ráðist á grunninn á bak við risaskuldbindingar ríkisins vegna bankanna, IMF, Icesave osfrv.

Kosið er um: X við sjúklegar og ógreiðanlegar skuldir (Samfylking) eða X við mismunandi leiðir til aðlögunar, með ofur- ríkisforsjá (Vinstri Grænir), með stórum ríkistilfærslum (Framsókn) eða við hraða aðlögun með trú á frelsi til athafna (Sjálfstæðisflokkurinn).

Sjáum núna til hvort línur haldi enn áfram að skýrast fram að kosningum, t.d. hvort að ESB (með IMF kúgunartækjum) nái að knésetja okkur alveg. Við fylgjumst spennt með.

Hálft ár liðið frá því kreppan skall á

Hundar sem bíta fólk ganga lausir

Lítill og laus hundur beit mig til blóðs í kálfann í gegn um hlaupabuxurnar þegar ég hljóp á Seltjarnanesi sl. fimmtudag. Eigandinn (Björn? í bláum Íslands- íþróttajakka) baðst fyrst afsökunar en forðaði sér svo með hundana, svartan ljúfan líklega Labrador og litla truntutígurinn, ljósbrúnan hugsanlega Silk Terrier, þegar ég reyndi að fá upplýsingar um hundinn feiga. Framhaldið var það að lögreglan tók skýrslu og ég fékk far á slysavarðstofuna, þar sem ég var sprautaður með stífkrampasprautu og fékk recept á sýklalyfið Augmentin(e) og þarf síðan að eiga við sárin á kálfanum og önnur óþægindi, þar sem sýkingar eru algengar, en stífkrampi er háalvarlegt mál. En hundurinn og eigandinn ganga enn lausir, hættulegir nágrenni sínu, ekki aðeins miðaldra hlaupandi karlhlunkum, heldur allt eins börnum. Það ber ekki að líða.

Hundahaldarinn snaraði þeirri skýringu fram að hundurinn hafi verið svona árásargjarn eftir að hann lenti í stærri hundi. Já, þessvegna var ástæða til þess að viðra hann óbundinn, svo að hann gæti ætt geltandi að mér um 70 metra leið og bitið mig hinu sæmilegasta sári!

Ég hélt að þetta væri einstakt tilvik og hef alltaf liðið þetta síaukna hundahald. Þá kemur í ljós, þegar ég ræddi þetta í hlaupahópi að ýmsir hlauparar hafa verið bitnir einu sinni eða tvisvar! Að ógleymdum hunda- langböndunum sem brugðið hefur verið fyrir fætur þeirra með alls kyns afleiðingum.

Ég hvet hundaelskendur og okkur öll hin til þess að segja frá þessum agressífu, lausu hundum svo að von sé til þess að allir hinir ljúfu hundarnir muni ekki líða fyrir óaldarseggina í almennilegu gamaldags hundabanni eins og var í gildi í þá gömlu góðu daga, fyrir tíð frægra hunda Davíðs Oddssonar og Alberts heitins Guðmundssonar. Annars legg ég til að bannið verði tekið aftur upp. Hvað myndi þá allur þessi fjöldi fólks að tala um?

PS: Vinsamlegast látið lögregluna vita ef þið þekkið til þessa hunds, enda er sagt að hundur sem farinn er að bíta af þessari hörku muni alltaf gera það.

PS.PS.: Hlaupahópar eru ágætis vitni um lausagöngu hunda, enda lét einn eigandi í dag hund sinn ganga lausan þegar ég var einn, en var fljótur til að binda hundinn þegar hann sá hópinn nálgast.

Engin viðskipti, enginn með bein í nefinu

Flest sem gert er til bráðabirgða verður varanlegt, sbr.gjaldeyrishaftalögin illu. Lífið okkar í nýja litla fiskabúrinu heldur þannig áfram, enda verndar það okkur frá öllum hvölunum og hákörlunum í hafinu mikla. Gjafarinn mikli, IMF fóðrar okkur með lánsloforðum en engin viðskipti eru með krónuna, enda byggir núverandi módel ekki á viðskiptum, heldur á ríkisstýringu í skjóli IMF.

En þessi sæta gervitilvera sem búin var til við hrunið er verulega kostnaðarsöm. Blekkingargengi krónunnar hefur háan beinan vaxtakostnað, en þar að auki verulegan óbeinan kostnað, þar sem viðskipti stöðvast í þjóðfélagi sem er ekki samkeppnishæft við umheiminn.

Efnahagskerfi annarra landa riða til falls. Ísland verður að fella gengi krónunnar til þess að geta átt viðskipti við aðrar þjóðir og styrkt innviði sína aftur, en undanbragðalaust að hafna Icesave samningum eða öðrum vafasömum gjörningum, þótt viðskiptaráðherrann sem sagði réttilega af sér hafi staðfest ábyrgð ríkisins í bréfum fyrir fallið. Hann fór langt út fyrir umboð sitt og við erum ekki bundin af þannig afargjörningi.

Auglýst er eftir stjórnmálamanni sem þorir að standa á rétti íslenska ríkisins til sjálfstæðis. Hann eða hún mun spara kynslóðunum milljarðatugi, mörg þúsund mannár í vinnu. Sýnið fram á það hver þetta getur orðið.

Engin viðskipti á gjaldeyrismarkaði

Írland er í ESB með Evru, samt mótmæla 100.000

ESB aðild ásamt Evru mun ekki bjarga Íslandi úr kreppunni frekar en Írlandi, sem hefur hvorttveggja en er í vandræðum af sama meiði og Ísland er í, en Írland getur ekki fellt gengið og minnkað þannig atvinnuleysi eða gripið til sértækra ráðstafana nema þá í gegn um Brussel.

Við getum enn ráðið örlögum okkar, þótt við stöndum djúpt úti í síkinu. Með ESB- aðildarumræðu þá drepum við aðalmálunum á dreif, hvernig ber að lágmarka skuldir okkar og auka við eða halda tekjumöguleikum okkar. Umræður um aðild Íslands að ESB hafa t.d. þegar orðið til þess að Kínverjar hafa hætt við fríverslunarbandalag við Ísland í bili, en þeir samningar voru komnir mjög langt og hefðu skipt sköpum í uppbyggingu á Íslandi. Ef við staðfestum að ESB aðildarviðræður komi ekki til greina, þá snýr Kína aftur að samningaborðinu.

Kreppan krefst réttilega athygli. Stjórmálaflokkar ættu þess vegna að verða sammála um það að eyða ekki tíma og peningum í umræður um ESB- aðild, hitnandi loftslag (sem kæmi okkur hvort eð er vel), þróunaraðstoð (sem er nær hrein sóun verðmæta) eða hvalveiði (sem er sjálfbær og sjálfsögð).

Fjölmenn mótmæli í Dublin

Enginn þorir að neita Icesave og IMF

Hrópa þarf af húsþökum: „EKKI SAMÞYKKJA ICESAVE og IMF!!!“

·         Ef gríðar- skógareldur geisar, þá skiptir garðslangan engu máli.

·         Ef skip er hriplekt, þá skiptir ein fata engu máli.

·         Ef Icesave- og IMF skuldbindingar verða staðfestar, þá skiptir niðurskurður upp á milljarð hér og þar í hagkerfinu engu máli.

 

Langflestir ráðendur hafa fyrst sagt að Icesave verði ekki greitt eða IMF skilyrði samþykkt en guggnað svo á því. Síðasta von landans var Steingrímur J., sem gafst upp gagnvart þessari vá á fyrstu dögum í stóli fjármálaráðherra og fór að einbeita sér að þáttum sem skipta engu máli í samanburði við þúsund milljarða skulbindingar ríkisins og sjúklega stýrivexti.

 

Hvað þarf til þess að einhver ráðandi aðili hafni Icesave algerlega og skeri á hnútana? Sá hinn sami fórnar sér þá, eins og Davíð gerði með því að segja afdráttarlaust: „Við borgum ekki þessar skuldir“.  Einnig að hafna IMF „aðstoð“, sem felst í blóðmjólkun krónunnar með 18% stýrivöxtum fyrir eigendur og tengslaaðila IMF.  

 

Nær engar líkur eru á því að stjórnmálamaður leggi frama sinn að veði með því að láta kjósa sig sem þann sem mun hafna Icesave/IMF samningum, þrátt fyrir það að meirihluti Íslendinga geri sér fyllilega grein fyrir því að við getum ekki greitt neitt í þá áttina. Allir slæmir atburðir eftir það verða taldir honum að kenna. Allt hefði farið betur hefðum við bara samið og „haldið stöðu okkar meðal þjóðanna“. Því erum við enn stödd við gapastokinn, þar sem taka á allan almenning af lífi.

 

Gjaldþrot annarsvegar eða höfnun Icesave og IMF hinsvegar. Þeir eru kostirnir í dag.

Láta hýða sig í mótmælaskyni

Ora er íslenskt!

Vegið er að traustum íslenskum stoðum að ófyrirsynju í „fréttum“ Stöðvar 2 og visir.is í kvöld, einmitt þegar treysta þarf þær stoðir enn frekar. Aðalfréttin er sú að íslenska framleiðslu- og markaðsvaran Ora, þmt. einskonar flaggskip þess hér, niðursoðnu Ora fiskbollurnar, séu ekki íslensk vara. Þessi frétt öll virðist unnin af kunnáttu- og tillitsleysi ásamt drjúgum skammti af þröngsýni.

Fyrst ber að nefna að hér er um rammíslenskt framleiðslufyrirtæki að ræða, sem greiðir laun og skatta á Íslandi, ekki á Tortola- eyjum! Um fimmtíu starfsmenn og umboðsaðilar eru með margfeldisáhrif í hagkerfinu um allt land. Um 150 vörutegundir er að ræða, margar hverjar hluti íslenskrar menningarsögu. Innihald einstakra vörutegunda getur skiljanlega verið á alla vegu eða hún jafnvel alveg framleidd annars staðar, en samkvæmt fréttunum er amk. helmingurinn alíslenskur. Töluverður útflutningur virðist eiga sér stað.

En víkjum okkur að fiskbollunum, sem mótaðar eru á Íslandi og eru niðursoðnar og merktar hér. En það þykir fréttamanni ekki nægur virðisauki, af því að gullaxinn er frá Færeyjum! Gullaxinn sem ég reyni að selja til útlanda er veiddur úr sama sjó, skammt norðan miðlínunnar, en glæpurinn á vist að vera sá að þessi er veiddur sunnan línu, fer til frænda okkar og lánardrottna, Færeyinga, og þaðan til Ora í niðursuðuna. Hvaðan er þá hveitið í bollurnar? Verður það að vera undan Eyjafjöllum til þess að Stöð 2 láti fólk gefa börnum sínum þessar gæðabollur í margar kynslóðir?  Sardínurnar eru frá Noregi, líklega smásíld og þá kannski úr Norsk- Íslenska síldarstofninum eða Argentínu. Verða þær kannski að vera frá eyjunni Sardiníu í Miðjarðarhafi? Auðvitað skiptir þetta engu máli, heldur það að varan sé af góðum gæðum og að Íslendingar njóti góðs af viðskiptunum.

Tiltekið var að bökuðu baunirnar kæmu tilbúnar frá Bretlandi. Þær eru hvort eð er ekki íslenskar og fyrst það borgaði sig að bæta því í framleiðsluna úti til þess að lækka vöruverð hér, því betra.  Hagkvæmni stærðarinnar verður að nýta í sumar línur, ss. tómatsósuna. Vonlaust er kannski að keppa í verði við Hunts eða aðra með milljónir flaskna með því að vera með sér línu í verksmiðjunni hér og dýrara hráefni inn til landsins.

Íslenskur rækjuiðnaður er heilmikill og heldur hundruðum manna á lífi hér á landi með miklum margfeldisáhrifum. Rækjan er aðallega norsk, en einnig kanadísk og grænlensk. Hún er þýdd upp, soðin, pilluð og fryst hér og verður íslensk í þúsundum tonna inn í ESB. Engan er verið að blekkja frekar en hjá Ora, svona eru reglurnar.

Tekið skal skýrt fram að allt ofansagt eru aðeins hugleiðingar mínar, upplýsingarnar úr „fréttinni“ og af vefsíðu Ora og ég tengist ekki Ora eða Íslensk- Ameríska á nokkurn hátt, heldur erum við fjölskyldan traustir neytendur þessara íslensku gæðavara og höldum því áfram, sérstaklega í þrengingum framleiðslufyrirtækja núna.

Þakklæti fv. framleiðslustjóra Ora til vinnuveitanda síns í 22 ár þykir mér lítið. Tugir fjölskyldna hljóta að kunna honum litlar þakkir fyrir.

Lífeyrissjóðir í hreinu fjárhættuspili

Lífeyrissjóðirnir sem við erum neydd til þess að treysta til þess að gæta fjár okkar stunduðu ótakmarkað fjárhættuspil í framvirkum gjaldeyrissamningum í leyfisleysi. Allir sem koma að þeim afleiðum eiga að vita að þar er um hreint fjárhættuspil að ræða, þar sem engin leið er að vita um útkomuna: hún getur sveiflast um milljarða á nokkrum mínútum. Engu máli skiptir hvort staðan sem tekin er er með eða á móti krónu, frekar en að það skipti máli hvort sett er á rauðan reit eða á svartan á rúllettuborðinu. Þegar veðjað er með krónu, þá greiðum við ofurvexti til þess að þeir geti haldið gamblinu áfram og aukið við þá skökku mynd að þetta svindl styrki krónuna.

Nú á víst að bíta höfuðið af skömminni. Nóg með að lífeyrissjóðirnir stóðu í hreinum áhættuviðskiptum, en að við eigum síðan að greiða niður þá áhættutöku með lækkunum á skuldum þeirra til ríkisbankanna er ekki sanngjarnt á nokkurn hátt, ef af verður.

Reglur um lífeyrissjóðina hljóta að eiga að lágmarka afleiðuviðskipti. En ef þau eru leyfð, þá ætti að hætta að neyða okkur til þess að greiða í þennan ófögnuð, sem engu skilar eftir að spekúlantar hafa farið höndum um þá í áraraðir.

Hafa rýrnað um 181 milljarð

Björgvin skóp Bretavandræðin

Það er nokkuð skýrt núna að Björgvin fv. viðskiptaráðherra hafi skapað þann missi trausts hjá Bretum sem olli hörðum viðbrögðum þeirra síðar, en skerptist að vísu við fjármagnsflutninga osfrv. Þeir töldu okkur síðan fara á bak orða okkar þegar við sögðum þeim það eina rétta, að þetta yrði ekki greitt. Við þurfum samt að neita að greiða, þar sem sjóðurinn ætti ekki að fá lán, skilmálarnir eru hvort eð er óaðgengilegir og við getum ekki greitt, enda Landsbankaveðin mun minna virði en bjartssýnisspár stjórnarinnar sýndu.

Nú reynir á staðfestu Steingríms og Jóhönnu. Ætla þau að spara tíkalla hér en samþykkja milljarða úti?

 

Viðskiptaráðuneytið, Stjórnarráði Íslands, 14. ágúst 2008:

“It is absolutely clear according to the law that the fund has to pay out claims up to 20.887 Euros and therefore the Board would always seek a loan to ensure that the scheme pays out to that minimum.”

 

Þýðing mbl.is: „.. algerlega sé ljóst samkvæmt íslenskum lögum, að Tryggingasjóður innlána verði að greiða innlán upp að 20.887 evrum, fari svo að bankar fari í þrot og geti ekki greitt innistæðuleigendum. Þess vegna muni stjórn sjóðsins ávallt leita fyrir sér með lánveitingu komi til þess að greiða þurfi út innlánstryggingu.“

 Tölvupósturinn allur til Breta

Alveg ljóst að innlánstrygging verði greidd