Sjaldséður fugl hér

Sést hefur til fuglsins Evruskrofu (lat. Johannis Sigurdiensis) á Íslandi. Það þykir nokkuð sérstakt hér á landi, enda heldur Evru-skrofan sig mjög til hlés, nema þegar hún kemur saman í mjög stórum hópum í helstu heimkynnum sínum, þá heyrist gjarnan ærandi hópgarg hennar: „vvvvææææææællllllllll, vvvæææææælllll“. Annars eru hljóðin yfirleitt lágvært gagg, líkt og í hænum.

Þekkja má Evruskrofu á hvítu álútu höfðinu og beittum bognum goggi. Fætur eru rauðir, með löngum beittum klóm. Erfitt er að sjá muninn á karldýri og kvendýri, þar sem kvenfuglinn líkir svo mjög eftir háttum karlfuglsins að nær ómögulegt er að greina þau í sundur. Karfuglar Evruskrofunnar eru fáir og farnast illa vegna sérstæðra lífshátta hennar, að lifa afætulífi, nær alfarið á því sem aðrir færa þeim.

Evruskrofa lifir aðallega á því sem fellur til hjá öðrum hæfari tegundum þegar þær safna birgðum fyrir afkvæmi sín. Stórir hópar þessarra fugla fara um, aðallega í borgum og ræna því sem safnast hefur. Hún laumast líka í hreiður annarra fugla, líkir eftir hljóðum þeirra og háttum og nær þannig að nýta sér það sem borið er í hreiðrið, jafnvel svo að ungar hinna fuglanna ná aldrei að þroskast.

Fuglinn hefur verið tiltölulega sjaldgæfur hér á landi, en lifir helst í þéttbýli í Mið- Evrópu, aðallega í Belgíu. Þó hefur hlýrra loftslag borið þennan flökkufugl hingað til lands, en hann getur ekki bjargað sér hér, lifir ekki af íslenskan vetur og farnast best sem hópvargur í helstu heimkynnum sínum í borgum Evrópu.

Evruskrofa ber með sér bakteríuna Socialis (lat. Politicus Socialis) sem spillir helst hreiðrum annarra fugla og veikir getu þeirra til þess að bjarga sér sjálfir án þess að vera í hópi.

Líta verður á Evruskrofu sem óværu í íslenskri náttúru.

Stefna VG og Steingríms J.

Allt í einu man Steingrímur J. eftir því hver stefna VG er. Hann er enn allsráðandi- ráðherra af því að hann sveik stefnu Vinstri grænna vegna ESB, AGS, Icesave, einkavæðingar bankanna osfrv. osfrv. Ef formaðurinn tekur enn mark á sínum flokki, þá slítur hann þessari ríkisstjórn nú þegar, enda stendur hún gegn flestu því sem VG stendur fyrir.

Lifum ekki í blekkingu: Vinstri græn munu ekki samþykkja olíuhreinsunarstöð, hvar sem er á Íslandi. Olíuborun úti í hafsauga er kannski samþykkt hjá VG ef ekkert sést til hennar og vondu alþjóðafyrirtækjanna, nema ofurskattarnir sem lagðir verða á starfsemina, raunar svo háir að enginn hefur áhuga á að bora.

En VG getur treyst því að Steingrímur J. fylgir stefnunni út í æsar sem fyrr. Hann lætur sko Samfylkinguna ekki afvegaleiða sig.

 

Úr utanríkisstefnu VG (feitletranir ÍP):

„Við teljum að öll ríki heims eigi að hafa óskoraðan rétt og tækifæri til að nýta auðlindir sínar á skynsamlegan hátt í því augnamiði að byggja upp velferðasamfélög sem standast kröfur um sjálfbæra þróun. Til þess að svo megi verða þarf að leysa hinar fátækari þjóðir af skuldaklafa Alþjóðagjaldeyrissjóðsins og Alþjóðabankans, og endurskoða starfsemi Alþjóðaviðskiptastofnunarinnar frá grunni. Leikreglum heimsviðskipta þarf að gerbreyta til að tryggja félagslegt jafnrétti og virðingu fyrir öllu umhverfi.

Samskipti við Evrópusambandið ber að þróa í átt til samninga um viðskipti og samvinnu, m.a. á sviði menntamála, vinnumarkaðsmála og umhverfismála. Hugsanlegur ávinningur af aðild Íslands að Evrópursambandinu réttlætir ekki frekara framsal á ákvörðunarrétti um málefni íslensku þjóðarinnar og er aðild að Evrópusambandinu því hafnað. Hagsmunir fjármagns og heimsfyrirtækja eru í alltof ríkum mæli drifkraftar Evrópusamrunans, miðstýring, skrifræði og skortur á lýðræði einkennir stofnanir þess um of.“

Olíuhreinsun yrði þvert á stefnu VG

Elta evrópska hrunið uppi

Helstu þrenn stefnumál Samfylkingar í utanríkismálum eftir landsfund árið 2009 voru þessi: 1) Aðildarviðræður við ESB, 2) deila fullveldi í stjórnarskrá og 3) stofna málefnanefnd um Evrópumál. Flokkurinn dró síðan VG og aðra með sér í þá utanvegaferð og er enn ákveðinn í þessu, þrátt fyrir augljóst hrun í Evrópu. Þjóðin lætur leiða sig áfram út í fenið og sér ekkert að því að deila fullveldinu í stjórnarskránni með öðrum til þess eins að sjá loksins hvað er í hörmungarpakkanum, eins og það liggi ekki fyrir í fréttum dagsins.

Fórnarkostnaðurinn er hrikalegur, þar sem t.d. orka Utanríkisráðuneytisins ætti að fara í norðurslóðir og samskipti Íslands við aðrar þjóðir vegna þeirra. Ráðuneytin eru undirlögð í að taka upp rómverska lagabálka og láta einfaldar staðbundnar reglur víkja.

Helsti hagnaðurinn af því að ganga í ESB og taka upp glæsta Evru árum síðar átti að vera lægri vextir. Nú er sá falski tími örugglega liðinn. Vextir í Evrulöndum hafa margfaldast og eru nú orðnir ósjálfbærir á Spáni eins og í Grikklandi, Portúgal og víðar.

Nú er lýðnum ljóst að þetta gengur ekki lengur. Látum þá til skarar skríða gegn þessari Evrópu- Hrunstjórn nú þegar með öllum ráðum, í stað þess að fljóta öll að feigðarósi í Arabíska Haustinu.

 

Hér fylgir textinn frá samfylkingin.is

 1. Hefja aðildarviðræður við Evrópusambandið strax eftir kosningar og bera samninginn undir þjóðaratkvæði.

 2. Setja í stjórnarskrá ákvæði sem heimilar að fullveldi sé deilt með yfirþjóðlegum stofnunum og alþjóðastofnunum samkvæmt ákvörðun Alþingis. Slík ákvörðun tekur þvíaðeins gildi að sé staðfest í þjóðaratkvæðagreiðslu.

3. Stofna innan flokksins sérstaka málefnanefnd um Evrópumál. Hún á að hafa forystu um starf flokksins á þessum vettvangi, samhæfa starf annarra málefnanefnda í þessum viðamikla málaflokki og laða til samstarfs og ráðgjafar einstaklinga og hagsmunaaðila sem hafa reynslu og sérþekkingu á einstökum þáttum. Nefndin hafi að auki það hlutverk að stuðla að öflugri upplýstri fræðslu og almennri umræðu um Evrópusambandið og stöðu Íslands og annarra ríkja innan þess á næstu vikum og mánuðum.

 

Hrun Evrulanda fellir fiskinn

Hrun Evrulandanna í Suður- Evrópu hefur afgerandi áhrif á Íslandi, sérstaklega á útflutning sjávarafurða, þar sem þessar þjáðu þjóðir hafa æ minni efni á bestu vörunni, t.d. stórum þorski héðan. Snarminnkuð eftirspurn eftir dýrri vöru í þessum hrjáðu löndum eykur framboðið annað og veldur lækkuðum verðum. Ofan á það bætist stóraukinn þorskkvóti í Barentshafi. Sem betur fer er Íslendingum fært að auka þorskkvóta sinn til þess að koma aðeins á mót við lækkunum á markaði, en framboðsaukning okkar er það lítill hluti heildarinnar að það hefur ekki úrslitaáhrif til frekari lækkunar á heimsmarkaði.

Samkeppni og erfiður lánamarkaður

Við ofangreint ástand á fiskmörkuðum bætist við verðfall á laxi, t.d. vegna mikilla birgða frá Chile. Hillur súpermarkaða fyllast því af tilboðum sem lækka verð á gæðafiski yfirleitt. Lánastarfsemi til fiskframleiðenda og kaupenda hefur einnig tekið stakkaskiptum á heimsvísu. Kaupendur fást ekki greiðslufallstryggðir og framleiðendur fá ekki nema takmörkuð afurðalán. Samkeppnislönd okkar fá gjarnan óbeina ríkisaðstoð við markaðsstarf sitt, sem erfitt er að keppa við.

Ríkið er erfiðasti hlutinn 

En verst er þegar stjórnvöld hér leggja álög á fiskiðnaðinn og gera útgerð og framleiðendum beinlínis ómögulegt að standa sig í samkeppninni. Þau virðast gleyma því að „ávöxtun í fortíð gefur ekki ábendingu um ávöxtun í framtíð“. Lagðar eru álögur á sumpart glæsta fortíð, sem tryggja erfiða framtíð, þegar ljóst er hvernig ástandið er þegar orðið í Evrulöndunum, helstu markaðslöndum okkar, en þau eru jafnframt draumalönd núverandi ríkisstjórnar.

Búast verður við áframhaldandi lækkuðum verðum á fiskmarkaði. Hverjar þær áætlanir stjórnvalda sem miða við annað munu einungis bæta grjóti í bakpokann, þegar okkur er sagt að hlaupa hraðar.

Þorskverð gæti lækkað mikið

Vingulsháttur og rangtúlkanir

Ósköp er beinlaust nefið á ráðherra ef hann fær sig ekki til að leyfa löndun á Íslandi á makríl af Grænlandsmiðum, jafnvel af hálfíslenskum skipum. Hann setur sig í dómarasæti um makrílinn, sem brýtur allar mannanna reglur og færir sig til að vild, milljón tonn sunnan úr höfum Evrópumegin og kannski góður slatti af frændum hans frá Ameríkuhliðinni upp með Grænlandi.

Lögin sem ráðherra reynir að skýla sér á bak við má túlka örþröngt eins og hann gerir, eða víðara sem er sjálfsagt og hentar hagsmunum Íslendinga og Grænlendinga.

Eltingarleikur Steingríms J. við Evrópusambandið tekur á sig ýmsar myndir. Þetta er ein þeirra.

Fékk ekki að landa hér makríl

Myndir af strandi og björgun

Skúta strandaði á lúmskum stað í Skerjafirði fyrir framan hjá mér. Kyrrðin var slík að gott kallfæri var þangað yfir, en strax virtist ljóst að enginn væri í hættu. Smáskerjarani nær út úr skerinu fyrir framan varnargarðinn í Skildinganesi, en þau sker koma aðeins í ljós á stórstreymisfjöru. Kjölur skútunnar náði ysta enda skerjanna.

Björgunarbátar náðu að draga skútuna af staðnum og til hafnar á þessum fallega degi.

Smellið þrisvar á myndirnar í albúminu hér til hliðar til þess að sjá þær í fullri upplausn. 

Skúta strand við Skerjafjörð

Marðar- Njóli

Öllu er viðsnúið, nú er víst njólinn góður!:

Falleinkunn nú fengu þeir,

fínir garðar fóla.

En meta skal þá öllu meir

flottan Marðar- njóla.

Kemur njólanum til varnar

Framlag til umhverfisvænna mannlífs

Starfsemi Fjarðaáls og annarra íslenskra álframleiðslufyrirtækja sannar sig enn sem framlag Íslendinga til betri heims. Furðu vekur að fólk sem telur sig umhverfissinnað hér á landi skuli níða skóinn af íslenskum  áliðnaði, á meðan erlendir umhverfissinnar horfa helst til þess að starfsemin erlendis verði eins og á Íslandi einhvern tíma í fjarlægri framtíð.

Álið og útfluttar sjávarafurðir eru hvort um sig 40% útfluttra afurða þjóðarinnar. Þetta eru traustu súlurnar tvær, eins og Öndvegissúlur Ingólfs Arnarsonar í merki Reykjavíkur. Fólk ætti að þakka forfeðrum sínum og samtímamönnum, sem náðu að reisa þessar súlur, í stað þess að höggva stöðugt í þær með meitli eins og Jóhanna og Steingrímur, eða kaffihúsagengi þeirra í Reykjavík 101.

Fluttu út fyrir 95 milljarða

Prófsteinninn Makríll

Nú drögum við skýra línu gagnvart ESB. Makríllinn verður prófsteinn á þetta aðildarþref. Tómas Heiðar, samningamaður Íslands stóð á rétti okkar og var færður úr starfinu fyrir vikið. Össuri og Jóhönnu finnst þetta eflaust vera bara einhverjar tölur á skjá sem megi lækka hjá okkur, en þetta er auðlindin, störfin, rétturinn, lifibrauðið, sanngirnin og allt það sem felst í því að stjórna eigin landi og miðum til farsældar.

Stjórnin hefur ekki umboð þjóðarinnar til þess að semja af sér í þessu grundvallarmáli. Makrílstofninn er að koma sér fyrir hér og við verðum að nýta þann rétt sem því fylgir, ekki að hræðast hafnbannshótanir ESB, sem kann ekkert með auðlindir að fara, eins og þau hafa viðurkennt sjálf. 

Strandar á makríldeilunni

Berlusconi og Þóru- myndböndin

Eftir úrslit forsetakosninganna verður mörgum hugsað til þess hvað virkaði eða var yfirskot. Hér er framboðs- myndband Berlusconis til samanburðar við Þóru- myndbandið. Þórudagurinn var jú yfirskot.

 

Berlusconi campaign video:

http://www.youtube.com/watch?v=n1Ho-mT63us

 

Stuðningsmyndband við framboð Þóru Arnórsdóttur:

http://www.youtube.com/watch?v=usdBQ2FWwpA

 

 

 

Sverrir Stormsker yrkir um Þóru nokkra:

http://stormsker.blog.is/blog/stormsker/entry/1247260/

Afgerandi sigur forsetans

Friður um Bessastaði

Tunglið vakti yfir Bessastöðum, en læddi sér síðan bak við fjöllin þegar friður komst á.   Ég tók þessa mynd kl. 01:07. Smellið tvisvar fyrir fulla stærð.

 

Heildarmyndin breytist lítið

Ólafur Ragnar 40-65% hærri en Þóra

Forseti Íslands kemur vel út úr þessum kosningum, enda á hann það skilið fyrir allt það sem hann skilaði fyrir þjóðina í embætti. Tölurnar sýna að Ólafur Ragnar fær líkast til amk. 40% fleiri atkvæði heldur en Þóra Arnórsdóttir. 101 Reykjavík heldur Þóru uppi, en Norðvesturlandi og Suðurlandi líst alls ekkert á hana.

Þóra segist núna aðeins fara fram einu sinni á ævinni og gaf skýrt „Nei“ við framboði í stjórnmál. Þá skín sólin kannski frekar á Árna Pál í næstu kosningum, fyrst Þóra kæmi ekki til með að skyggja á hann í forystu restarinnar af Samfylkingunni. Árni Páll fylgir ekki ESB- umsókninni lengur. Fylgi Össurar fellur með ESB, þannig að varla er forystan þar. Jóhanna Sigurðardóttir (hver?) fer ekki í kosningar framar. 

Hver er þá framtíðarforysta ríkisstjórnarflokksins sem hefur það að meginmarkmiði sínu að sækja um aðild að Evrópusambandinu?

„Gefur ákveðna vísbendingu“

Ófögnuðinum laumað inn án athugasemda

Kolefniskvótakerfi ESB hefur nú verið innleitt á Íslandi. Þar með er staðfest að íslenskir framkvæmda- aðilar skuli kaupa tilverurétt sinn á markaði af alþjóðlegum bröskurum í stað þess að fá þá myndarlegustu úthlutun sem hugsast gæti í þessu fáranlega kerfi, sem ætlað er að kæla heiminn, en gæti það aldrei hvort eð er, þar sem t.d. 2/3 hlutar losunarinnar er í frjálsum höndum, en losun okkar er upp í nös á óðinshanaunga.

Barnaskapurinn í Þórunni forðum og Svandísi umhverfisráðherra nú er slíkur, að í stað þess að nýta þessa hugsanavillu sem kerfið er, til þess að skapa tekjur fyrir íslenskt hagkerfi, þá hrúga þær álögum á það, sem gera samkeppnisfærni íslensks iðnaðar mun verri og íþyngir ferðalöngum alla daga í hreinni þarfleysu.

Þessi ömurlega aðgerð toppar vitleysu þingsins síðustu daga. Er fólki virkilega sama? Eða skilur það ekki að flugmiðinn er hærri, bíllinn kemst skemur, atvinnustarfsemin verður ekki hér á landi, allt vegna þess að vitleysustu lög ESB (og þar er mikið sagt) voru staðfest á þessum eymdartímum íslenskrar þjóðar.

Kolefniskerfi ESB að lögum á Íslandi

Sjálfstæðisbaráttukonan Jóhanna Sig.

Jóhanna Sig. er jafnan kostuleg á 17. júní. Árið 2009 reyndi hún að halda upprunalega Icesave- þjóðarafsalinu leyndu fyrir Alþingi og þjóðinni, en tókst ekki. Árið 2010 kom hún því til leiðar að ESB samþykkti á 17. júní að hefja „formlegar viðræður“ við Ísland um aðild að ESB. Árið 2011 stóð til að opna fyrstu kaflana í aðlögun Íslands að ESB til ósjálfstæðis um 17. júní 2011, en það tókst nokkrum dögum síðar.

Á 17. júní 2012 hefur Jóhönnu Sig. ekki orðið eins vel ágengt og áður í að framselja sjálfstæði Íslands til ESB. Þó hefur hún og Samfylking hennar vegið ótæpt að stjórnarskránni í þessum tilgangi. Einnig hafa þau sótt fast að sjálfstæðinu með árásum á undirstöðugreinarnar tvær, sjávarútveg og áliðnað, sem hvort um sig framleiða 40% útfluttra vara Íslands.

Það er huggun harmi gegn að þessi ríkisstjórn mun ekki upplifa annan 17. júni í viðbót við völd á Íslandi. Þá væri sjálfstæðið búið að vera.

 

PS: Sjá einnig 17/6/2011 með tenglum:

 http://astromix.blog.is/blog/astromix/entry/1174444/

„Náð lengra en mig dreymdi um“

Afgerandi niðurstöður Gallups

Niðurstöður skoðanakönnunar Capacent Gallup (birtar á RUV.IS) sýna hér glöggt afgerandi stöðu Sjálfstæðisflokks og slaka stöðu ríkisstjórnarinnar: Sjálfstæðisflokkur er rúmlega tvöfalt stærri en Samfylkingin og nær fjórfaldur á við vinstri Græn. Samt fellur eymdarstjórnin ekki, þar sem Hreyfingin heldur henni uppi á hækjum og enn eru nokkrir Framsóknarmenn sem virðast ekki sjá fréttamiðla um stöðu ESB- óskabarnsins, Suður- Evrópu og Evrunnar sundruðu.

Loksins talað skýrt 

Loksins þegar forysta Sjálfstæðiflokksins fór að tala skýrt í andstöðu sinni við aðild að Evrópusambandinu (í samræmi við vilja landsfundar) þá endurheimtist fylgið frá janúar 2008, fyrir hrun. Draugarnir sem skelltu flokknum niður á hnén í nokkur ár, daður við ESB (vegna Evru sem öllu átti að bjarga) og óákveðni vegna Icesave eru nú að fjarlægjast. Styrkir við flokkinn voru endurgreiddir , illu heilli, á meðan Samfylkingin vildi ekki eða gat ekki endurgreitt Baugi peningana.

Er einhver von um breytingu? 

Nú er allt orðið kýrskýrt: Vinstri óstjórnin aðhefst í óþökk þorra þjóðar sinnar nokkuð margt, sem erfitt verður að afgera. Engin von er til þess að fólkið í landinu mótmæli úr sumarbústaðnum í 20°C hita og sólskini, þótt skoðanir þess séu flestar á einn veg, að ríkisstjórnin fari frá. Ætli það verði ekki þá atburðirnir í Evrópu sem valdi því að breytingar hafist í gegn hér, eins og þegar Ísland hlaut sjálfstæði sitt forðum? Kannski þorir Össur ekki að segja Jóhönnu frá stöðunni þar ytra?

Niðurstöður næstu kosninga ættu að laga stöðu flestra. Amk. verður stefnan þá í átt til bata, ekki til doðans eins og nú.

 

Maraþonblíða

Fótbrotinn eftir skíðin skreið ég út á svalir og tók myndir af nokkrum sprækum hlaupurum í Vormaraþoni Félags Maraþonhlaupara í Skerjafirðinum í morgun 21/4/2012. 

Hér miðla ég þeim í PicasaWebAlbum. Skemmtilegast er að skoða það í Full Screen Slideshow í því prógrammi. Myndirnar eru rúmlega 100 talsins, teknar um mitt hlaupið. Hægt er að skoða hverja nánar með stækkunarglers- zoominu, amk. í Chrome- browsernum. Þessu er bara skellt hráu upp.

Tengillinn er hér: https://picasaweb.google.com/107972936124078389294/2012VorMarathon?authuser=0&feat=directlink

 

ÍR-ingar fyrstir í maraþoni