Vill sóa 48 mkr. á dag næstu 5 árin!

Ég hélt að Elín Hirst væri ósammála utanríkisráðherra af því að hann vildi auka við þróunaraðstoð. Nei, hún vill víst ríflega tvöfalda sóunaraðstoðina! Samfylkingin náði að tvöfalda vitleysuna áður og vildi festa enn meiri aukningu inni. Þá berst þessi liðsauki í það frá Sjálfstæðisflokknum.

Krónur, ekki prósentur

Upphæðirnar í þessa eilífðarhít eru hrikalegar, allt í nafni gæskunnar en mest af þessu mokast í stofnanir annars vegar og spillingu hins vegar. Nú nægja 4500 milljónir á ári víst ekki til þess að friða þennan Fenrisúlf, heldur á að fara upp í 7,5 milljarða króna á ári innan nokkurra ára. En það nægir ekki vinkonu minni Elínu Hirst, sem vill fara með þetta í 17,5 milljarða á ári, eða 48 milljónir á degi hverjum.

Út um jarðir

Þarna hljótum við að vera ósammála. Hver sá sem kynnir sér þyrludreifingu þessarra seðla hlýtur að sjá að skilvirkni aðstoðarinnar er hverfandi. ESB og SÞ keppast við að samþykkja hina og þessa prósentuna af brúttótekjum þjóða til þess að viðhalda sér sjálfum og þeim innri hring stofnana- elítu sem kýs hvert annað í margmilljóna skattfrjáls störf á mánuði með þjón og kokk, í leit að fólki í Afríku sem dettur í lukkupottinn í það skiptið. 

Moka áfram?

Á meðan eigum við víst að taka erlend lán (eða að draga að greiða Hrunlánin upp) og moka í þessa draumahít pólitíkusanna, þar sem auðvelt er að ná til fólks í gegn um barnstrú þeirra og gleyma raunstöðunni á Íslandi, með öllum sínum spítala- harðindum og verkföllum. Þessi þróunaraðstoð er sannarlega barn síns tíma og henni ber að ljúka. 

PS: Úr Samþykkt Sjálfstæðisflokksins 2015: Gera þarf ýtrustu kröfur um skilvirkni, bókhald og eftirlit með öllum þáttum þróunarsamvinnu.

Vill hærri framlög til þróunarsamvinnu

Valtarinn heldur áfram

Óheillastefnu Dags & Co er fram haldið. Þorrasel verður flutt. Hofsvallagatan og Grensásvegur fá hundruð milljóna króna áfram til skemmdar á þeim. Valsmenn grafa grunna að húsum við brautarenda flugvallarins. 120 milljóna miðasölusbygging í Fjölskyldugarðinum kemur í stað skúrsins. Bílastæðunum í miðbæ og við Borgartún snarfækkar en þörfin rýkur upp með nýjum hótelum. Meingallað nýtt Aðalskipulag Reykjavíkurborgar og ónothæft Hverfaskipulag krauma undir okkur eins og eldgos sem bíður færis.

Hægt er að halda svona áfram, en ég vil að við notum frekar tímann til þess að njóta þess sem við höfum, áður en borgarstjórinn tekur það í burtu.

Ekki hætt við flutning Þorrasels

Vinstra lýðræði: þegar það hentar

Atgangur vinstri aflanna á þingi gegn lýðræðinu sem kaus þau og þeirra verk í burtu, er slíkur að fyrri kúgunarverk Svandísar Svavarsdóttur & Co blikna í samanburði við þessar nýrri útgáfur gegn eðlilegum framgangi mála í Rammaáætlun.

Allar leiðir notaðar

 

Áður var allt til reiðu í Neðri- Þjórsá, en ráðherrann Svandís afgreiddi ekki málið árum saman og braut gegn almenningi. Nú er allt tínt til, þinginu drekkt í orðræðu og náttúruverndarsamtök kölluð til, sem láta eins og aðgerðir Steingríms J. og Jóhönnu hafi verið í sátt við þjóðina, þegar þær voru í raun hrossakaup vegna ESB, eins og Össur Skarphéðinsson staðfestir í bók sinni.

Höldum áfram

Vinstri öflin sem tala gjarnan í nafni þjóðar og lýðræðis ná sínu afturhaldsöfgum fram með valdi, gegn lýðræðislega kjörnum fulltrúum þjóðarinnar. Stöndum með stjórnarþingmönnum í því að koma Rammaáætlun áfram svo að afturhaldið sigri ekki þjóðina.

„Eftir-á-tilbúningur“

Ekki við okkur að sakast

Hanna Birna telur okkur öll eiga sök á ástandinu á þingi, þegar raunin er sú að samræðu- pólitíkin sem hún aðhyllist hleypir að ýmsum refum í sauðargæru, sem nota sér þessi tækifæri til að æða um í hænsnabúrinu. Píratarnir vinsælu þóttust ætla að breyta öllu til betri vegar, en þá sjaldan að þau mæta, þá er tuðað út í eitt í lönguvitleysu.

Vinstri vængurinn heilagi og faglegi notfærir sér svona mýkt og samstarfsvilja á ýmsan hátt, en versta dæmið er samningurinn um Reykjavíkurflugvöll, þar sem Hanna Birna hleypti refunum inn í búrið með undirskrift sinni, illu heilli. 

Þetta Biedermann/Chamberlain- heilkenni er til trafala við það að ljúka þörfum málum eins og Rammaáætlun, sem áður var gerð undir raunverulegri stjórn vinstri öfgahópa og þurfti lagfæringar við.

Ef fólk er kosið til þess að framkvæma, þá á það að gera svo fljótt og vel, enda í umboði meirihluta kjósenda. Umræðu- samræðupólitíkin skilar engu.

Hanna Birna: „Er hálf miður mín“

Verkföll valda jafnan tjóni

Tjón af völdum verkfalla er oft mest hjá þeim sem tengjast ekki baráttunni og geta engin áhrif haft á niðurstöðuna. Birgðasöfnun hjá kjúklinga- og svínabændum er gott dæmi, en kjötið er þeim verðlaust fljótlega eftir frystingu og geymslu, hvað þá í frystigámum. Hvernig haldið þið að mórallinn verði á milli bænda og dýralækna eftir að þar hefur verið "samið"? Bóndinn sem þarf að skipuleggja svínarækt sína mörg ár fram í tímann er settur á knén til þess að þrýsta á ríkið um launahækkun fyrir dýralækninn.

Kjötmarkaðinn riðlast í þó nokkurn tíma eftir verkfallið, þar sem koma verður út verðlitlu kjöti eða helst að farga því. Það kippir undan stoðum eðlilegs rekstrar og kröfur á ríkið aukast.

Nær væri að þeir sem starfa hjá ríkinu sættist á það við ráðningu að úrskurður um launadeilur verði hjá ákveðnum gerðadómi. Verkföll hæfa ekki nútímasamfélagi.

500 tonn af kjúklingi

Tillaga um myrkvuð kvöld

Tímasóun þingsins þessa dagana felst m.a. í tillögu um að myrkva kvöldin og eftir- miðdagana. Bjartari morgnar er markaðssetning iðn-byltingarinnar á þessari ömurlegu tillögu sem fækkar gleðistundum íslenskra fjölskyldna. Hvort skyldu þær vera fleiri í fjörinu við kókópöffsið á morgnana eða í leik eftirmiðdagsins? Barnið er örugglega hamingjusamara í fótbolta fram á vorkvöldið heldur en aðeins meiri birtu á leiðinni í flúorljós skólans.

Vinsamlegast biðjið þingmenn um að hætta þessum hringlanda, sem lauk með sæmd árið 1968, þegar okkur bar líka gæfa til þess að færa umferðina yfir á hægri hlið. Verður allt að vera óstöðugt á Íslandi?

Óvíst um afdrif klukkutillögu

Tugir milljóna króna í Islam- trúboð erlendis

Einhvern hlýtur að verða að draga hér til ábyrgðar fyrir tugmilljóna króna sóun Íslands í trúboð Islam á Ítalíu í nafni listar. Eru engin takmörk fyrir vitleysunni? Við borgum fyrir mosku í kirkju, en hvað yrði sagt ef við byggðum kirkju í aflagðri mosku, allt í nafni listar?

Við vitum hvert stefnir, því að forseti Tvíæringsins heitir Baratta!

Munnlegt leyfi fyrir moskunni

Breska íhaldið er seigt þegar á reynir

Niðurstöður bresku þingkosninganna skýrast ört, núna nálgast Cameron helming þeirra þingsæta sem hafa verið talin, sjá töflu hér. Myndin sýnir hvernig Skotland er nær hreint SNP og saman við Verkamannaflokkinn myndi það ekki nægja til þess að skáka Íhaldsflokknum. 

Athygli vekur hvernig dreifingin er yfir landið. Sósíalisminn er mestur í menntaða miðbænum eins og í Reykjavík og síðan í norðurhéruðum og Wales. Íhaldið eru gárurnar út frá London.

Hér er talningin lifandi.

Pundið hresstist verulega við fréttirnar og Bretar forðast vandræðin.

 

Framtíð Milibands og Cleggs óráðin

Borgarbúar ekki Hjálmlausir

Íbúar Reykjavíkur eiga ekki þann valkost að vera Hjálmlausir einn einasta Dag. Fyrir vikið sitjum við uppi með skipulagsdrauma miðbæjargengis sem henta ekki þorra borgarbúa eða ferðalanga almennt.

En að orðaleikjum slepptum þá er undarlegt að hvetja óbeint til meiri höfuðskaða, með aukinni reiðhjólanotkun án hjálms á höfði.

Hjálmar hjálmlaus á hjólinu

Efstu 20% greiða 64,8% skattsins

Fæstir gera sér grein fyrir því að Ísland er rammsósíalískt þegar kemur að álagningu skatta. Tekjuhæsta fólkið (20% heildar) greiðir nær 2/3 hluta heildarskattanna, en lægstu 18% engan skatt og helmingur allra fjölskyldna greiðir um 10,2% skatt að meðaltali af sínum tekjum. 70% fjölskyldnanna greiða aðeins að því er virðist um 22,3% heildarskattsins.

Segið svo að hér ríki ekki tekjujöfnun!

18% greiddu ekki skatt

Fleyið er hriplekt

Ægilegir sjóskaðar við strönd N-Afríku benda á vandamálið að baki, stríð víða sem valda flóttamannastraumi inn á Schengen- svæðið, sem Ísland er enn hluti að. Heilu þjóðirnar eru á vergangi og sjá helst möguleika inn í ESB um Ítalíu og Grikkland, en flestir stefna á Norður- Evrópu.

Neyðin er víða

Neyð fólksins er slík að það vill frekar taka áhættuna yfir Sahara- eyðimörkina, inn í stríðshrjáða Libýu og með báti yfir Miðjarðarhafið en að láta lífið í stríðsátökum heimavið í Súdan, Sómalíu, Erítreu, Libýu, eða á Gaza- svæðinu. Einnig eru stríðsmenn á meðal fólksins, enda vilja mjög margir ekki segja til nafns eða þjóðernis eftir að þeim er bjargað. Sumir eru frá farsóttarsvæðum eins og e-bólusvæðum Mið- Afríku.

Óskráðir streyma inn í Schengen

En Ítalir og Grikkir hafa fengið nóg af þeirri reglu að þetta fólk og skráning þess sé vandamál móttökulandsins og því hafa skráningar verið afar gloppóttar undanfarið, en um 170.000 manns komu inn í ESB um Miðjarðarhafið í fyrra og 11.000 í síðustu viku. Talið er að allt að 100.000 manns hafi sloppið inn óskráðir og haldið norður á bóginn. Þar með eru þeir inni á Shengen- svæðinu. Svíþjóð tekur við flestum þessa dagana. Þar með hafa þau aukinn rétt á Íslandi vegna gamals vegabréfasamnings Norðurlandanna.

Upplýsingar eða réttur til stöðvunar

Aðal viðbára stjórnvalda hér á landi að halda okkur innan Schengen er að við fáum svo miklar upplýsingar með því að vera innan þess en utan. En ofangreint sýnir einmitt hve röng sú ályktun er, jafnvel þótt ekki sé minnst á ólöglega strauminn upp frá Sýrlandi og Írak í gegn um Tyrkland og Svartahafið inn í Rúmeníu og Búlgaríu.

ESB gefur kannski eftir

Nú er rætt um það innan ESB að hleypa inn kannski 130.000 manns frá þessum svæðum. En hver ESB- þjóð hoppar ekki af kæti, þar sem þetta leysir engin vandræði en býr þau til heimavið, þar sem þessir einstaklingar þurfa mikils en tala ekki tunguna osfrv. Þar að auki fara hinir 100.000 óskráðu áfram sína leið.

Íslendingar til björgunar

Íslendingar senda varðskip að Schengen- jaðrinum sem bjarga fjölmörgum fórnarlömbum stríðsbrasks úr lífshættu. En þetta varðskip ætti raunar að gæta íslenskrar landhelgi, sem það gæti ef Landhelgisgæslan fengi viðhlítandi fé frá ríkinu til reksturs síns. Lögregluyfirvöld hér á landi hefðu miklu betri stjórn á því hverjir koma hingað til lands ef við segjum okkur úr Schengen- samstarfinu, enda verður eflaust samvinna t.d. við Interpol þótt við verðum ekki að hleypa hverjum sem er hingað inn. Öllu auðveldara er að hindra för óæskilegra einstaklinga hingað til lands ef við erum ekki í Schengen og verðum að hleypa þeim inn þótt flest bendi til að margir hverjir valdi okkur kostnaði, vandræðum og jafnvel skaða.

Könnumst við það að stríðsástand hefur breytt forsendum Schengen- aðildarinnar. Segjum Ísland frá þeirri aðild.

 

 

Talið að 700 flóttamenn hafi farist

Draumar um milljónaborgir

Hugmyndir um lestir eru andvana fæddar, þar sem fjöldinn til þess að halda þeim uppi verður ekki fyrir hendi. Barnaskóla- reikningur þurrkar út skýjaborgir um lestir á Íslandi, en samt heldur Dagur áfram sínum ídealisma á kostnað borgaranna um Skandinavískt milljónaborga- samfélag í Reykjavík.

Milljarðar á mann

Hér ferðast mest 8% fólks að jafnaði með þessum rándýra niðurgreidda fararmáta sem strætó er, en þessi borgaryfirvöld vilja enn meiri fjárbindingu og skuldir til þess að senda enn fleiri tóma vagna um allt. Senda mætti fríar rútur á 10 mínútna fresti allan sólarhringinn til Keflavíkurflugvallar fyrir vextina af þeim tugmilljörðum sem draumsýnir Dags um lestir myndu kosta. Þær bæru sig aldrei frekar en Harpan og yrðu stíft niðurgreiddar. Að auki myndu framkvæmdirnar við lestarkerfi og sú starfsemi rjúfa friðinn varanlega á hverjum stað.

Klára nauðsynjaþætti

Samfylkingin vill jafnan umturna því sem virkar, rugga þeim báti sem siglir vel, hefð sem Jóhanna festi svo vel í sessi. Frelsum okkur undan oki hinna talandi stétta og höldum áfram að nota þann fararskjóta sem við kjósum sjálf hér uppi á klaka, sem yfir 70% okkar gera alla jafna í formi bíls. Ég held að borgarstjóri ætti að einbeita sér að því að klára þá þætti sem honum var falið að sjá um, eins og götur, skóla, íþróttahús osfrv. Síðan mega þau láta okkur útsvarsgreiðendur í friði.

Léttlestir og hraðvagnar á dagskrá

Sjálfstæð skoðun á hverri EES- tilskipun

Taumlaus ESB- áróður í amk. níu ár hefur skilað því að Íslendingum eigi að þykja sjálfsagt að innleiða allar tilskipanir ESB hér á landi og að Alþingi sé þarflaust í þessu efni, allt vegna milliríkjasamningsins um EES.

Nokkur prósent af tilskipunum um bognar agúrkur og snarhækkun byggingarkostnaðar mega alveg bíða, enda flest gert til þess að samkeppnishæfni okkar minnki í hlutfalli við ESB, með tvær eftirlitsmanneskjur fyrir hverja eina vinnandi.

Ráðuneytunum ber að takmarka þessa sjálfsafgreiðslu tilskipana og þingmönnum okkar er ekki vorkunn að kynna sér hvaða ósköp á að demba yfir okkur. Þeir geta ekki allir látið eins og Píratar, kynna sér fátt og sneiða hjá atkvæðagreiðslum.

Frammistaða Ísland áhyggjuefni

Samgönguyfirvöld fái aðalflugvellina

Forsætisráðherra setur sig réttilega í gírinn til þess að bjarga Reykjavíkur- flugvelli á ögurstundu. Ólöf Nordal innanríkisráðherra hlýtur að taka undir þau sjónarmið að helstu flugvöllum landsins beri að falla undir stjórn ríkisins, enda eru þar samgöngu- og öryggismál sem vega mun þyngra en sveiflukenndar og staðbundnar þarfir mistækra pólitíkusa hvers sveitarfélags á hverjum tíma, eins og bitur reynsla hefur sýnt okkur nýverið í Reykjavík. Þar er miðbæjarklíka hinna talandi stétta búin að koma sér svo vel fyrir við spenana að þau sem fóðra kýrnar hafa ekkert að segja um það hvað verður um mjólkina.

Nú er mál að linni, krefjumst þess að flugvellirnir í Reykjavík, á Akureyri og á Egilstöðum verði í eign og stjórn ríkisins, til þess að hægt sé að fylgja langtímastefnumörkun í þeim málum með þjóðina að baki.

Segir að grípa þurfi til varna

Holuvallagata opinberast

Páskaþíðan sýnir okkur ástandið á götum bæjarins. Sérstaka athygli vekur Hofsvallagata (sjá myndir), sem hefur nýverið fengið milljónatugi króna, en sannarlega ekki í viðhald, heldur í prjál og furðuhönnun. Nú stendur víst til að eyða hundruðum milljóna króna í viðbót þarna til þess að fæla umferðina annað. Fer þetta ekki eins á Grensásvegi?

Borgaryfirvöld: Lagið göturnar! Ekki breyta þeim!

Páskaegg við Ægisíðu

Ég dáist af hreysti ungviðisins og foreldra þeirra, sem komu á Ægisíðu í dag og leituðu páskaeggja þrátt fyrir veðrið. Sjálfstæðisflokkurinn í Nes- og Melahvefi stóð fyrir páskaeggjaleit, þar sem unga fólkið rauk af stað í leit að máluðum eggjum, sem skipta mátti fyrir súkkulaðiegg.

Kjartan Magnússon borgarfulltrúi ræsti keppnina með gjallarhorni. Hér fylgja nokkrar myndir.

Leituðu páskaeggja í Elliðaárdal