Lokið Covid inni!

Undarleg skilaboð og afsakanir koma nú frá Veitum sem endranær. Árviss frostakafli er á leiðinni og okkur íbúum Reykjavíkur er sagt að loka gluggunum, einmitt núna þegar baráttan við Covid-19 stendur sem hæst og ein helsta vörnin er að opna gluggana. Ein stærsta smitdreifingin var t.d. á Landspítala Landakoti, þar sem er lítil loftræsting og gluggarnir verða að vera opnir.

Veitingastaðir í Bandaríkjunum mega víða starfa núna ef gluggarnir eru galopnir. Veiran er fislétt og dreifist best í lokuðu rými þar sem allir í rýminu fá að prófa útöndun allra hinna, því lengur sem hver og einn er þar inni og gluggarnir eru lokaðir. Súrefnisríkt og jónað loft að utan er bráðnauðsynlegt hverjum og einum sem er innilokaður í dag.

Kvartað í kuldakasti

Nú kemur kuldakast og hvað gerir ofurhagnaðar- ránsbatteríið Veitur (dótturfélag OR) í því fyrir okkur? Hvetur íbúana til að loka gluggum og skrúfa niður í snjóbræðslukerfum, einmitt þegar þeirra er þörf í frostinu. Niðurstaðan er því verri heilsa og meiri dreifing veirunnar, þegar þetta var allt að koma hjá okkur. Sprungnum heitavatnsleiðslum mun örugglega fjölga þegar fólki er sagt að skrúfa niður í frostinu, þegar það ætti helst að auka hitann. Föllum og fótbrotum hlýtur að fjölga.

Peningar í hítina

En í hvað fór tugmilljarða króna hagnaður Orkuveitu Reykjavíkur á hverju ári? Afsakanir fyrir tíðum bilunum í útvegun heits vatns eru orðnar skrautlegar, fjöldi túrista hingað og fiðrildi í Kína. Milljörðum króna er mokað út úr fyrirtækjunum inn í óendanlega skuldahít Reykjavíkurborgar, í stað þess að þjónusta íbúana almennilega og veita öryggi án afsakana, sérstaklega þegar á reynir eins og þessa dagana. En þetta er víst stíllinn hjá borginni, að segja okkur að fara út að sópa, slá gras og tína rusl, þegar við greiðum þeim fyrir að taka af okkur bílastæðin, göturnar og friðinn. 

Fyrirtæki borgarinnar verða að standa sig og nota hagnað í eigin fjárfestingar eða til þess að lækka álögur á viðskiptavini sína, íbúa Reykjavíkur.

Segir heitavatnsskortinn tengdan faraldrinum

Bretar ná stjórn eigin fiskveiða

Íslendingar hljóta að skilja mikilvægi þess fyrir eyland að ráða yfir fiskveiðum í lögsögu sinni. Bretar endurheimta nú það arðrænda hafsvæði umhverfis lönd þeirra sem fiskveiðistefna ESB hefur skilið eftir í rúst. Evrópusambandið vill ekki sleppa takinu fyrir nokkurn mun og nú telst „gífurleg fjarlægð“ enn á milli sjónarmiða þeirra og Breta í þessu máli, þegar rúmur mánuður er í það að nýja fiskveiðilöggjöf Breta taki gildi. Ekki breyta Bretar glænýju lögunum úr þessu. 

Eigin stjórn mála

Þá er aðallega tvennt annað smáræði útistandandi við brottför Breta úr ESB, samkeppnis- "jöfnun" sem ESB vill stunda áfram, og það hver haldi um refsivöndinn ef útgöngusamningur á milli Breta og ESB telst rofinn. En Bretar vilja geta ákveðið sjálfir hvaða reglur gilda hjá sínum 66,6 milljón þegnum, einnig um útflutning á vörum og þjónustu eins og fullvalda ríki gera, skattprósentu og hvaðeina. Verði dómsmál úr því, þá ráði þeirra dómstólar. 

Enn finnast einhverjir

Íslendingar skilja þessa afstöðu vel. Hví er það þá enn, að einhverjir hér telja það betra að ESB semji lögin okkar, ákveði landamæri okkar og dæmi í málum okkar en að við fáum að vera almennilega fullvalda ríki? Ég næ því ekki.

 

Bretar endurheimta vald yfir veiðum í lögsögu sinni

Stöðvum sóun í ofurhruninu

Efnahagslífið er á hnjánum, en stjórnarandstaðan og meirihluti borgarstjórnar lætur eins og auka- milljarða króna sé jafnauðvelt að snara fram og 14 ma. fyrir listafólk um daginn, þegar fingri var smellt og málið var leyst.

Borgin á ekkert á ríkið

Borgin á ekkert að krefja ríkið um neitt, þegar hún sjálf verður rammskuldbundin vegna óþarfa Borgarlínu, sem kemur á versta tíma til þess að mylja undir 4% ferðalanga í Reykjavík. Fyrst og fremst eiga ríki og borg að draga þá línu inn, þó ekki væri nema stærsta hruns Íslands eða bara vegna almennrar skynsemi og þess að fara vel með fé sem yrði tekið að láni fyrir komandi kynslóð.  

Sparnaðarleiðir

Ríkið á að fara að dæmi Breta og takmarka þróunarsóun sína verulega, þ.e. þróunaraðstoð úti í spilltum heimi, amk. 4 milljarðar króna en líkast til verulega meira. Síðan myndi almennilegar takmarkanir á umsóknum hælisleitenda spara fjölda milljarða króna fyrir ríkið, en ekki síst borgina og sveitarfélögin. Flottræfilshátturinn og stoltið er alveg að fara með okkur: viðurkennum að þetta fé er ekki til og ætti ekki að vera tekið að láni.

Heilagar kýr

Nú verður að taka á heilögu kúnum: Borgarlínu, Góða Samverjanum (gjafa- ídealistanum), RÚV, Góða hælisveitandanum, Shengen- sinnanum, EES- reglukónginum (ESB- sinnanum), ríkis- atvinnuveitandanum og öllum öðrum ónauðsynlegum þáttum, sem gera ekki annað en að tæma kistuna til langframa og halda okkur í spennitreyju gjafasósíalismans úr sparibauk barnanna.  

Annarri umræðu fjárlaga seinkað

Borg gegn byltingu

Helsti andstæðingur jákvæðrar byltingar í notkun nýorkubíla á Íslandi er borgarstjórnar- meirihlutinn í Reykjavík, Dagur & Co. Nú þegar þannig bílar seljast æ betur, setja andstæðingarnir fulla orku í það að taka vegina undir annað næstu áratugina og láta okkur öll þar að auki borga ótrúlega blóðpeninga fyrir þau 4-5% fólksins sem nýta munu strætókerfið mikla, svokallaða Borgarlínu.

Nýorkubíla takk

Nú, árið 2020 fóru nýskráningar nýorkubíla yfir 50% allra fólksbíla í fyrsta sinn í Íslandssögunni og stefna hærra. En sá vöxtur fær snöggan endi um leið og framkvæmdir við Borgarlínu hefjast, enda standa nýju nýorkubílarnir jafnkyrrir og gamlir dísiljálkar í hundraða bíla röð á einu akreininni sem eftir verður við hliðina á tómu strætólínunni. Það væri við hæfi að Dagur borgarstjóri og ídealista- elítan hans fengi að aka á Borgarlínu- rásinni með sérmerki eins og ráðamenn í Sovét forðum, svo að við almenningur í biðröðunum gæti séð hver ræður þessari dæmalausu vitleysu.

Stöðvum þetta

Hvað þarf til, svo að fólk neiti að verða meðvirkt í Borgarlínu- ruglinu? Segið því stjórnmálafólki sem þið ætlið að kjósa að þetta gangi ekki upp. Fáið skýr svör frá hverjum og einum, sem skýla sér bak við óskýrar nefndir og flokka. Hreint út, styður þú Borgarlínuna eða ekki? Þar dugir ekkert Þorgerðar- Katrínar Reykás- svar, já-nei-jú-en-þó-ekki-já-alveg. 

Fyrir mitt leyti segi ég afgerandi NEI við Borgarlínunni en JÁ við nýorkubíla- byltingunni!

Nýorkubílar í meirihluta 2020

Borgarlínuskuldir á börnin

"Allt fyrir komandi kynslóðir" segir loftslagskynslóðin sem ræður borginni. En tæpast hugsar hún um hag afkomenda þegar hún bætir skuldaböggum á þessi fáu grey sem til verða hjá þessum egótíska skuldasöfnunarhópi. Hokin barnabörnin eiga að bera þá bagga sem hnýttir voru á þau hjá Degi & Co vegna úrelts strætókerfis fyrir 4% fólksins, strætóelítuna, á meðan 80 prósentin, almenningur var kyrrsettur í rafmagnsbílunum sínum á einbreiðum vegum og fann engin bílastæði, en borgaði fyrir öll herlegheitin, sem kölluðust Borgarlína.

Glötuð sýn

Þessi ömurlega framtíðarsýn blasir við þeim sem horfa á Sovét- batteríið Borgarlínu, enda segir nafnið allt, að færa fólk frá A til B, en ekki í nútíma nethugsun, þar sem allir fara út um allt á sama tíma. 

Arfleifðin

Blessuð börnin erfa ofþanið borgar- og ríkiskerfi sem verður stöðugt að auka skattlagningu til viðhalds síns sjálfs. Einkafyrirtæki og frjáls markaður hafa látið í minni pokann fyrir ofþenslu ofríkisins. Sveitarfélög eru þegar í þeirri stöðu, að ef glittir í eyri, þá ber að bjarga heiminum með honum og bjóða honum hingað í fullt uppihald sveitarfélagsins. Ekkert virðist geta stöðvað þessa skriðu. 

Aðgerðir!

Við gerum ekki næstu kynslóðum þann óleik að leyfa þessu fólki að eyðileggja tækifæri framtíðar til vaxtar og betra lífs með skuldaskapandi ídealisma núverandi borgarmeirihluta. Á skal að ósi stemma, stöðvum Borgarlínuna á meðan hægt er og hleypum tæknibyltingunni á vegina, án álags fyrir barnabarnabörnin okkar.

 

Borgarlína leysir ekki vanda

Stoltur af Bræðralagi múslima

Nú snýr Bríet Bjarnhéðinsdóttir sér eflaust í gröfinni, þegar kynsystur hennar mótmæla brottvísun fjölskyldu stolts meðlims múslimskra hryðjuverkasamtaka, þar sem kvenréttindi eða réttur stúlkna er hreinlega ekki til.

Schengen galopið

Þetta er rakið dæmi um óþurft veru Íslands á Schengen- svæðinu. Persona- non- grata kom sér og sinni fjölskyldu inn á svæðið og þaðan til Íslands til vistar fyrir milljónir króna á okkar kostnað í tvö ár, íþyngjandi félagslega kerfinu.

Okkar vandi?

Upprunaríkið vill ekki sjá þennan fyrirmyndarson sinn, sem átti aldrei að verða okkar hausverkur. Ísland á að heita sjálfstætt ríki, eyja úti í dumbshafi þar sem auðvelt ætti að vera að neita öðrum um landvist en þeim sem okkur finnst akkur í að setjist að hér, enda bæti þau þjóðfélagið. 

Kveðjum Schengen

Schengen- sáttmálinn hefur gengið sér til húðar á Íslandi. Segjum okkur frá honum og sendum skýr skilaboð út um heim að ekki sé lengur hægt að henda óæskilegu vegabréfi sínu og leggjast síðan upp á íslenska ríkið á kostnað þess og án persónulegrar áhættu. Nóg er um aðrar ögranir á Covid- tímum.

Fjölskyldan fannst ekki

Þjóðkirkjan gerir sig óþarfa eins og RÚV

Ekki verður séð að hápólitískur vinstri biskup Íslands auki veg kristni á Íslandi, heldur stefnir hún ótrauð að því að fækka meðlimum Þjóðkirkjunnar með stefnu sinni, yfirlýsingum og trúleysisboðskap. Yfirgengileg smekkleysan er ekki nóg, nú vill hún lagabreytingar til þess að múslimafjölskyldum sem dettur í hug að leita hingað í megi ekki vera vísað frá, heldur hafi milljarðar manna fullan rétt að koma í vist í fámenninu og fá fulla þjónustu frá fyrsta degi. 

Afvegaleiddar stofnanir

Þjóðkirkjan er nú komin á sama stað og RÚV, rándýr óþarfa ríkisstofnun í vinstri herferð gegn stuðningsfólki sínu til þess að breyta þjóðfélaginu að skapi batterísins, eins afbakað og það er orðið. Hvert fór virðingin fyrir einstaklingnum, frelsi hans og skoðunum? Hvenær hurfu gildin sem sameinuðu okkur sem þjóð í gegn um aldirnar? 

Lægra verður það varla

Ég fæ mig bara ekki til þess að láta undan þessum biskupi og kirkjuþingi hennar í því að segja mig úr Þjóðkirkjunni, þeim til hægðar. Ég lifi í þeirri von að litið verði á þetta líðandi tímabil sem lægð í trúarsögu Íslands og að leiðin hljóti einungis að vera upp á við héðan.

Auk þess legg ég til að RÚV verði lagt niður hið snarasta.

Munu birta fleiri Kristsgervinga

Flýtum okkur á hausinn!

Óborganlegur er Dagur Borgarlínustjóri að krefjast þess í hraðasta hruni Íslandssögunnar að Reykvíkingar flýti feigðarflani hans með hálftóma risakassa um stíflaðar götur borgarinnar og skuldsetji okkur um hundruð milljarða króna sem svar við atvinnuleysi!

Strætó fortíðar

Vitað er hvaðan sá vaðall kemur, en verst er það, hverjir hafa stutt þann ófögnuð í gegn um tíðina og gera enn, en það eru ýmsar ungar konur í Sjálfstæðisflokknum. Aðalskipulag andskotans fær enn stuðning þeirra og nú Borgarlínan, sem toppar alla Sovét- hugsun, jafnvel eftir nær áratug af afarsamningi um framkvæmdaleysi fyrir milljarð á ári, til þess að strætónotkun fari úr 4% ferða í 4%.

Flæði

Nú kaupa þessar ungu konur réttilega rafmagnsbíla eins og enginn sé morgundagurinn, einungis til þess að láta leggja honum (en ekki í miðbænum) eða að byrja daginn og enda hann í umferðarteppu. Réttast væri að hætta alfarið við Borgarlínu, en styðja rafbílavæðingu og bæta vegakerfið, sem kostar aðeins brot af strætóvæðingunni. Borgin gæti dreift inneignum á skjólstæðinga sína í staðinn, sem nota mætti í viðurkennda rafleigubíla.

Tregðan í X-D 

En risahnífurinn í kúnni er tregðan í hluta Sjálfstæðis- flokksins til þess að faðma nýja tíma,frekar en austantjalds- drauma miðbæjar- ídealistanna. Ekki er hægt að kjósa þann flokk nema að þeirri tregðu verði vikið almennilega til hliðar. 

Vill að Borgarlínunni verði flýtt

Botnlangi Dags fjórföldun Skerjafjarðar

Skuldaævintýraæði Dags & Co í Reykjavíkurborg færist nú á nýtt stig, þar sem til stendur að troða 3000 manna byggð í aflokaðan flugvallarkrikann. Sá Ísafjörður ídealistanna, með allt sitt bílastæðaleysi, þröngar götur og fimm hæða skuggavarpsblokkir á að rísa í óþökk þeirrar byggðar sem fyrir er og bætir við fjórfalt fjölmennari borgarhluta en notar sömu götuna inn og út úr Skerjafirði, með margföldun umferðar.

Níðst á landi og íbúum

Landsvæðið sem undir byggðina færi þykir Degi ekki nógu stórt til þess að standa undir þjónustustiginu og því ætlar gengi hans að urða ströndina og leirurnar langt út í Skerjafjörð til þess að nema nýtt land. Olíuborinn jarðveg skal hreinsa með ærnum kostnaði og aka í gegn um borgina í Álfsnes. Vegur suður fyrir völl verður byggður fyrir trukkana sem bætast við stíflaða umferð Háskólans í Reykjavík og víðar um bæinn.

Ævintýri á okkar kostnað

Þessi kostnaðarsama ævintýramennska, þar sem níðst er á náttúrunni og íbúum heilla hverfa, á síðan að verða greidd af Reykvíkingum öllum í auknum álögum. Afsökunin fyrir aðgerðinni var jafnan sú, að borgin fengi mikið úr sölu dýrra lóða. Sú skýring heldur ekki vatni, enda er drjúgur hluti svæðisins ætlaður fyrir félagslegar íbúðir og stúdenta. Borgin hefur fælt frá sér flesta sem eiga og nota bifreið, en það eru víst enn um 80% fólksins.

Þetta ævintýri kostar okkur öll eins og heilt hverfi af hálfs- milljarðs- bröggum. Stöðvum þetta skipulags- og umhverfisslys strax.

Umdeild áform um byggð

Afturhaldskommahluti VG ræður för

Þetta gengur ekki, að í stærsta hruni Íslands kemur afturhalds- kommahluti VG, sem er kannski studdur 7% kjósendanna, í veg fyrir að varnarbandalagið NATO byggi varanlega hafnaraðstöðu og fleira fyrir fjölda milljarða króna, skapi störf hér og tryggi betur stöðu Íslands í eftirliti og vörnum Norður- Atlantshafsins.

Standa í lappirnar, takk

Hver hefði trúað því að Sjálfstæðisflokkur og Framsóknarflokkur í ríkisstjórn beygi sig svona í duftið fyrir argasta "Ísland-úr-NATO,-herinn-burt" sósíalista- íhaldinu? Hér hlýtur að þurfa að draga línuna, að gangast við þessu samstarfi við NATO eða að rjúfa þessa stjórn ella. Þjóðarhagsmunir krefjast þess.

Uppbygging með NATO

Sósíalistar börðust gegn aðild Íslands að NATO, en höfðu sem betur fer ósigur. Keflavíkurflugvöllur, sem er að verulegum hluta frá NATO, hefur fært Suðurnesjum og Íslendingum öllum mikla gæfu. Kynslóð forsætisráðherra hættir til að taka þeirri uppbyggingu allri sem sjálfsögum hlut. Að sama skapi myndu hafnir og önnur aðstaða á svæðinu hafa varanleg jákvæð áhrif á efnahagslífið og þjóðlífið. 

Þjóðaröryggistefnu verður ekki framfylgt með blómum í hárinu. Öryggiseftirliti í norðurhöfum er best fyrirkomið hér og samstarf NATO- þjóða greiðir fyrir uppbyggingu þess. Við eigum ekki að færa öðrum þessi gæði á silfurfati, sérstaklega núna þegar vel sverfur að.

 

Þungt högg að verða af hundruðum starfa

Hleypum inn, en prófum alla

Nú styttist í opnun landamæra Íslands. Ráðlegast er að taka sýni af öllum fyrir Covid-19 hjá vegabréfaskoðuninni og ná þannig að lágmarka smit þeirra.

Fyrir lægi samþykki farþegans við sýnatökunni strax við brottför. Einnig samþykki fyrir því að farsímanúmerið liggi fyrir og jafnvel að rakningar- appið verði notað. Fyrsta heimilisfangs á Íslandi verði líka getið. Jafnvel mæti athuga líkamshita með ennismælingu og ef einkenni koma í ljós, taka þá blóðsýni með skyndiniðurstöðum. Sýktir einstaklingar verði strax settir í einangrun á eigin kostnað.

Engu máli skiptir hvort farþegar komi frá Schengen- svæðinu eða annars staðar frá. Tímabundin aðgerð vegna heimsfaraldurs ræður öllu. 

Íslensk yfirvöld þyrftu líka að lýsa því yfir að engum hælisleitendum eða innflytjendum verði hleypt inn nema með fyrirfram samþykki yfirvalda við brottför farþegans, ella verði þeim snúið við strax þar eða við komu til landsins.

Á þennan hátt er hægt að hleypa ferðamönnum inn og koma hjólunum af stað!

4. maí genginn í garð

Páskapólitík biskups fyrir tómri Dómkirkju

Gleðilega páska, öllsömul. Upprisan og kristnin er enn í hjartanu, þótt Agnes biskup Íslands noti tækifærið á páskum til þess að hamra á pólitískum skoðunum sínum á kostnað fjöldans. Heimshrun og plága með ægilegum afleiðingum skilar sér lítt í páskaávarpi biskups, þar sem jákvæðnin birtist í því að mengun hafi minnkað þegar atvinnulíf heimsins stöðvaðist. Jarðarbúar séu að krossfesta jörðina og að lífshættir okkar verði að breytast. Skilja má þetta svo að drepsóttin aðstoði til þess að þetta megi verða.

Misnotkun á stöðu

Yfirgengileg misnotkun biskups á stöðu sinni gerir fylgjendum Þjóðkirkjunnar (eins og ég hef verið) erfitt að halda áfram stuðningi við kerfi, sem er greitt af sköttum okkar en fóstrar einungis pólitíkusa á vinstri vængnum. Mörg eru dæmin, en biskup opnaði t.d. Dómkirkjuna nýlega til þess að hleypa á klósettið skoðanabræðrum sínum um opin landamæri Íslands í mótmælum á Austurvelli. 

Þegar svona er komið, ber ríki og sveitarfélögum að hætta stuðningi við trúfélög. 

Að auki legg ég til að annað misnotkunarbatterí, RÚV, verði lagt niður, eða amk. verði tekið strax af auglýsingamarkaði.

 

 

 

„Jarðarbúar eru að krossfesta heimili sitt jörðina“

Veitur til vandræða

Hitaveitan í Reykjavík, sem er undir Veitum, er til vandræða og bregst núna er síst skyldi hjá þúsundum manna, sem hírast heima að verjast heimsplágu. Útihitastig við Reykjavíkurflugvöll er undir frostmarki, svo að búast má við verulegum vandræðum eftir þessa löngu nótt. 

Veitur eru búnar að vera slys, sem bíður eftir að eiga sér stað í þó nokkurn tíma. Við fengum forsmekk af þessu fyrir sl. jól, þegar uppsöfnuð vandræði Veitna komu vel í ljós. Sjá hér og hér. Ekki virðist það hafa dugað til þess að fyrirtækið kæmi með neyðarúrbætur og nú er því krísuástand. Hitinn er ekki kominn á þegar þetta er ritað að morgni. 

Kuldinn hjálpar veirunni. Nú hlýtur að verða tekið til hjá Veitum. 

Við þetta bætist að dæling frárennslis hefur brugðist oft, með umhverfisslysum síðastliðin ár, af allskyns ástæðum. Núna eru þær blautklútar.

Heitavatnslaust í Vesturbænum fram á morgun

Augljós eftirgjöf fyrir regluveldinu

Illt er að horfa upp á hvert vígi Íslands af öðru falla gagnvart Evrópusambandinu, einmitt þegar þörf er á því að standa í sjálfstæðar lappirnar. Það er þó ekki reynt að láta ákvörðun um ferðabann og lokun lands líta út sem ákvarðanir íslensku ráðherrana, heldur viðurkennt:

MBL.is: "...við eig­um óhægt um vik að skor­ast und­an því,“ seg­ir Áslaug Arna í sam­tali við mbl.is og bæt­ir við sam­starf Evr­ópu­ríkja sé mik­il­vægt.

"...höf­um því beðið um að sér­stakt til­lit verði tekið til okk­ar þegar við sjá­um fyr­ir að við vilj­um fara aflétta þess­ari lok­un“.

Þannig að ESB ákveður bæði hvenær landinu verður lokað og opnað aftur. Þetta komu sem "tilmæli" ESB til Íslands, þannig að okkur var í lófa lagið að ákveða annað út af sérstöðu okkar. Þessi staða er orðin aumkunarverð.

Segjum okkur strax úr Schengen!

Ísland tekur þátt í ferðabanni ESB

Veiran er lokakafli Schengen

Loksins kom að því: þáttaka Íslands í Schengen- samstarfinu opinberast sem algjör tímaskekkja, þar sem ákvarðanir okkar um landamærin á krísutímum verða að byggjast á fullveldi þjóðarinnar. Ítrekað reynir á sjálfstæði okkar, þegar Evrópusambandið reynir að bjarga við glataða draumnum um frjálst flæði fólks um Evrópu með miðstýringu og ólýðræðislegum ákvörðunum, sem miðast alls ekkert við þarfir íslensku þjóðarinnar.

Landamæri endurvakin

Lönd ESB hafa þurft að styrkja landamæri sín hvert af öðru síðustu árin vegna ótæps flæðis hælisleitenda. Leiðtogar hafa látið eins og þetta verði tímabundið, þar sem ákvörðunin samræmist ekki reglum ESB, en ljóst er að girðingarnar verða ekki teknar niður, þar sem ærin ástæða er til þess að hafa almennilega stjórn á hverjum landamærum fyrir sig, eigi þjóðin að geta ráðið öllum sínum málum. ESB beitir sum þau lönd refsingum sem styrkja landamæri sín, eins og Ungverjaland. Löngu er orðið ljóst að Ísland (í Schengen) á ekki að hafa landamæri sín við strönd Norður- Afríku eða að Tyrklandi, sem hleypti allt að 25 þúsund manns á dag inn á Schengen svæðið nýlega, með beinan aðgang til Íslands ef vill. Það bætist við þau 100 þúsund manns sem talið er að komist ólöglega inn á svæðið á ári. Milljónir manna bíða í suður- og austurjaðri Evrópu að komast inn í dýrðina.

Veiran krefst aðgerða

Svo kom Covid-19 veiran, sem sýnir enn betur að við Schengen verður ekki lengur búið hér á landi. Hver þjóð lokar sínum landamærum, ESB er ósátt við það og vill okkur inni í þeirra sjálfskapaða fangelsi. Sem betur fer samþykkjum við ekki þá aðgerð, en fulltæpt er að treysta því að hver stjórn standi í lappirnar með hverjum Schengen- yfirganginum af öðrum. Staða okkar er einstök hér í Atlantshafinu og við eigum að njóta hennar eins og Feneyjar í veraldarsögunni forðum, með samskipti og viðskipti á fullu, sem viðhalda flæði og friði.

Suður- Evrópa riðlast

Ítalskt samfélag riðar til falls vegna veirunnar, bankakerfisins, atvinnuleysis og innflæðis hælisleitenda á ferð. Óeirðir á Ítalíu, Grikklandi og í Frakklandi verða æ  líklegri innan 2-3 mánaða vegna aðstæðnanna sem skapast hafa. Best er að koma sér út úr Schengen strax, til þess að gæta þjóðarinnar og nýta hver þau tækifæri sem komið gætu upp í samskiptum við allar þjóðir heimsins, ekki einungis ESB- klúbbsins, sem liðast nú í sundur.

Fýsilegasti kosturinn fyrir okkur

Vandræði breytast í krísu

Nú reynir á Plan B hjá Veitum vegna heita vatnsins, sem þegar var í lágri stöðu vegna vandræðagangs, áður en óhappið átti sér stað. Afleiðingarnar eru því líkega verri en ella hefði orðið.

Þetta minnir á þá staðreynd, að flest flugslys verða vegna þess að viðvarandi slakt ástand er látið halda áfram, en síðan kemur óhapp sem verður að slysi fyrir vikið.

Hvert fer arðurinn?

Veitum er ekki vorkunn að standa í þessu núna. Viss heppni er að frostið skuli vera vægt. Hugurinn leitar til þess, hvert hagnaður af rekstri hitaveitu í Reykjavík hefur farið og þess til hvaða ráðstafana hefur verið gripið í varúðarskyni. Skiptir máli að tönkunum í Öskjuhlíð var breytt í ýmiss söfn? Var fjárfest í nægum dælustöðvum til þess að mæta aukinni notkun, uppbyggingu og þrýstingsfalli? Mig grunar ekki og að Dagur & Co hafi notað hagnaðinn í að fegra óendanlega skuldasöfnun þeirra í Reykjavíkurborg. 

En sjáum til hver sannleikurinn er um hvíta sykurinn.

Heitavatnslaust í Vesturbænum