Kjósið nýorkuna inn

Borgarlína verður 75% greidd af ríkinu, amk. fyrsta fallið. Því skiptir mestu hver verða kosin á þing. Þessi yfir 100 milljarða króna ímyndarbardagi hefur ekkert með skilvirkni í samgöngum að gera. Strætisvagnabílstjóri sagði í viðtali í fyrradag að helstu kúnnarnir væru krakkar og útlendingar, en fullorðnir Íslendingar væru „latir“ að taka strætisvagn. Varla heldur það Strætó gangandi, enda hefur tekjumódel fyrirtækisins hrunið, þrátt fyrir tíu ára mokstur af milljarði króna á ári í 10 ár, þar sem nýorkubílar og Brynjarsfákar ýta Strætó ennþá nær hyldýpinu núna.

Sóun fyrir fáa

Verst er að nær allir stjórnmálaflokkar staðfesta fylgi við Borgarlínu, þrátt fyrir að 4% ferða séu með Strætó og helmingur íbúanna ætli nær aldrei að nota það kerfi.  Styðjum vetnisframleiðslu og uppbyggingu innviða í rafmagnsdreifingu. Endurskilgreina þarf almenningssamgöngur, sem hljóta að vera sá ferðamáti sem langflestir kjósa.

Krefjist vitrænna aðgerða af frambjóðendum ykkar.

Ný könnun: Þrír flokkar taka fram úr

Sjálfskipuð vandræði Sjálfstæðisflokksins

Erfitt er að horfa upp á þessa vinstristjórn sem flest stefnir í, þegar haft er í huga af hverju áður líklegir kjósendur Sjálfstæðisflokksins (XD) eru hikandi við að kjósa hann. 

Sjálfstætt fólk er alveg upp að vegg í þessu máli. Eltingaleikur yngri kvenna í flokknum við miðjuna núna endurspeglar sömu vandræðin og þær komu Reykjavíkurborg í: að samþykkja Borgarlínu og að hampa loftslagsmálum, með öllum þeim sköttum og óþarfa hömlum sem þeim fylgja. Fyrir vikið er afar erfitt að kjósa flokkinn, þar sem í því felst samþykki á áætlun forystukvennanna. Þar að auki er mörgum helstu forsvarsmönnum hægri stefnu ýtt til hliðar, en maður getur samþykkt nær allt sem frá þeim kemur.

Fundurinn stóð gegn Borgarlínu

Ágætur aðalfundur Sjálfstæðisfélagsins í Nes- og Melahverfi með metmætingu í Valhöll fyrir stuttu sýndi hve raunveruleg andstaða við Borgarlínu er innan flokksins, jafnvel innan hálfsósíalíska Vesturbæjarins, þar sem fólk er komið á rafmagnsbíla eða reiðhjól að hætti Gísla Marteins. Þar var vel afgerandi (um 80%) stuðningur við ályktun um að hafna áætlunum um Borgarlínu á þessari stundu. Þeirri ályktun er ekki beinlínis hampað í baráttunni. 

Ríkið ræður þessu

Borgarlína kemst ekki á koppinn nema ríkið komi þar verulega að. Aðgerðirnar hafa afgerandi neikvæð áhrif á daglegt líf langflestra kjósenda eftir þessar kosningar, á meðan ábatinn á endanum er fyrir 4% fólksins, sem allt miðast við. Komið frambjóðendum Sjálfstæðisflokksins í skilning um það að þau verða að setja þetta Borgarlínuskrímsli á bið, ella verði ekki um XD að ræða núna. Auk þess er loftslagsfárið algert.

Framsóknarflokkur í lykilstöðu

Nagladekk í Sahara og á söndum Suðurlands

Uppruni svifryks í Reykjavík hefur aðallega verið sandarnir á Suðurlandi og aska af heiðunum, sérstaklega eftir eldgosin 2010 og 2011. Nú bættist gosið í Geldingahrauni við, þótt ekki sé það öskugos, en hefur oft náð að senda okkur góðar spýjur, eins og sést á svarta bílnum okkar í þurrum SV-áttum og á svörtu skýjaþykkni frá eldstöðvunum.

Ísland er rykland

Úr frétt Morgunblaðsins í dag: "Ísland er helsta upprunasvæði ryks í Evrópu. Hér eru 44.000 ferkílómetra eyðimerkur og að meðaltali er jarvegsfok hér í 135 daga á ári."..."Hægt er að greina með sérstökum tækjabúnaði hvaðan rykið er komið og meir að segja hvar á Íslandi einstök rykkorn eru upprunnin".  

Rannsaka rykið

Áður en meirihluti borgarstjórnar, Dagur & Co., grípur til frekari aðgerða og skattlagningar til þess að draga úr öryggi borgarbúa vegna nagladekkjanotkunar þeirra ætti hann að láta rannsaka svifryk gatna á ofangreindan hátt og sjá hvað safnast mikið ryk á götu sem þrifin var áður en austan eða suðaustan rok kom af heiðunum og svo eftirá.

Einhvern veginn á ég ekki von á því að sú rannsókn verði gerð.

Rykagnir frá Sahara fjúka oft til Íslands

Jafnræði Svandísar útilokar ýmsa

Allir fullorðnir hafa rétt á bólusetningu, skyldi maður halda, en þá kemur Animal Farm- jafnræði Svandísar Svavarsdóttur heilbrigðisráðherra í ljós: Fólki sem hafði veikst af Covid-19 er nú neitað um bólusetningu. Allir geta mætt og fengið sprautu nema þau! Mismununin er alger.

Þrautaganga

Þrautir þess hóps sem fékk verulega að finna fyrir Covid- árinu eru miklar og þjáist sumt enn vegna þrálátra einkenna. Þar að auki eru mörg þeirra ekki með mótefni við þessum vírus og fá ekki mótefnavottorð. Vonin til þess að mynda mótefni er tekin af þessu fólki.

Fær neitun

Beðið var eftir bólusetningu, en hún fæst ekki núna, þau njóta ekki réttinda á við annað fólk. Ef þau fá ekki bólusetningu (fyrr en kannski seint og síðar meir), þá komast þau ekki til Ameríku eða annað, þar sem bólusetningarvottorðs er krafist. Sum lönd boða að veikindi fyrir ári síðan séu ekki nóg til aðgangs þangað. Heilum árgöngum er boðið, en ekki því fólki sem veiktist. En aðallega, þessi hópur á sama rétt og aðrir þegnar íslenska ríkisins.

Bjóðið þeim bólusetningu strax!

 

„Við erum ekki alveg í stresskasti“

Kolefnislosun tvöfaldaðist en skiptir samt engu!

Nú þegar flæði gosefna í Geldingadölum hefur tvöfaldast, þá skipta þau 20.000 tonn af koltvísýringi (CO2) á dag engu, af því að sú losun er frá eldgosi, sem skráist ekki í reiknimódel umhverfis- ráðuneytisins. Ásamt um 20.000 daglegum tonnum í útöndun frá Kötlu eru þau samtals um 40.000 tonn á dag, utan bókhalds. Þau jafnast því á fimm dögum við árslosun íslenskra fólksbíla, eða semsagt 73 sinnum meiri CO2 losun en fólksbílarnir.

Frambjóðendum til Alþingis sem blöskrar þversagnirnar er hent út í ystu myrkur. Því liggur fyrir að landinn verður skattlagður til fjandans út af engu næsta áratuginn, kolefnistímabilið, einn undarlegasta blekkingartíma sögunnar. Sundurgrafnar götur Reykjavíkur fyrir 4% elítuna í Borgarlínunni og gjaldþrot borgarinnar marka líka sporin í söguna.

Gasmengun aukist síðustu tvo daga

Kjósum andstæðinga Borgarlínu

Öllu máli skiptir að stuðningsfólk Borgarlínu verði ekki kosið til áhrifa í prófkjöri Sjálfstæðisflokksins til Alþingis núna, því að annars verða hörmungaráformin geirnegld næstu áratugina. Ríkið ræður miklu um þessa skuldasúpu og umferðarteppu. Mikil vonbrigði voru að sjá að frambjóðendur staðfestu stuðning sinn við Borgarlína, sem yfir helmingur Reykvíkinga segist aldrei eða nær aldrei (1x/mán.) ætla að nota.

Ef þið kusuð samt sem áður þessa frambjóðendur, reynið að koma vitinu fyrir þau með að hætta við ósköpin á meðan einhver von er til þess.

40% leist vel á Borgarlínuna

75-80% ferðalanga sjá fram á breytingar

Þær konur og þeir karlar sem ferðast um á bílum í höfuðborginni og fara þannig 75-80% árlegra heildarferða innan hennar geta vænst breytinga eftir að Alexandra Briem tekur nú við sem formaður skipulags- og samgönguráðs. Gefum henni orðið:

„Yfir ára­tugi hafa frekir bíl­eig­endur og fram­leið­endur unnið að því á vestur­löndum að skipu­lag og upp­bygging sé á þann veg að í raun sé enginn annar raun­hæfur ferða­máti en sá sem þeir kjósa. Og ó­víða hefur þeim gengið betur en á Ís­landi. Freku karlarnir á Ís­landi hafa séð rautt yfir árangri Sigur­borgar og ég hef séð ógnandi til­burði gagn­vart henni bæði í eigin per­sónu sem og í skrifum sem er satt að segja ó­trú­legt að þeir hafi komist upp með.“

Breyttar götur

Breytingarnar sem bílferðalangarnir sjá verða kannski ekki í þeirra átt, heldur mun Alexandra sannarlega taka við Píratakefli forvera síns og fara öllu lengra með það í að gera þeim lífið leitt. Konur á nýorkubílum mega vara sig, því að verið er að refsa "frekum körlum" fyrir að hafa verið á bensín- og dieselbílum, á þann hátt að þrengja göturnar fyrir helstu kaupendum rafmagnsbíla, kvenna. 

Bílafjandskap og Borgarlínu 

Fjáraustur borgarstjórnar- meirihlutans til 4% ferðafólksins, strætó- elítunnar stefnir nú í óendanleikann eftir áratugs tilraun með milljarð króna á ári. Nýi formaður ráðsins getur vart búist við vægð, þar sem hún mun þurfa að verja Borgarlínuna, þá óverjandi sóunaraðgerð, sem stefnir borginni fram af björgum á mettíma.

Embættið er ekkert grín

Alexandra Briem mun fá að heyra það, bæði sem varðhundur Dags B. Eggertssonar og sem Píratinn í valdamiklu embætti í samgöngum Reykvíkinga á þeim tíma í sögu borgarinnar þar sem samgöngunum verður rústað.  

 

Sigurborg hættir í borgarstjórn vegna veikinda

Eldgos á svörtu

Kolefnisbókhald er byggt á falsi, en við erum skattlögð fram og til baka byggt á þeirri lygi. Eldgosið nýja er gott dæmi, mun ekki finnast í rassvasabókhaldinu og var ekki í neinum áætlunum, enda ekki til í 870 ár þar til nú. Losun koltvísýrings (CO2) þaðan er um 10.000 tonn á dag (10 milljón kíló), auk annarra mun öflugri  gastegunda. Eldfjallið losar því jafnt á einni viku og allir fólksbílar Íslands á einu ári! Um fimmtíu sinnum meira en fólksbílarnir á hverju ári. 

Losunartrúarmenn neita algerlega að taka eldgosin inn í bókhaldið fína, jafnvel þótt þeir telji að eldgosin verði algengari með léttari jöklum osfrv. Þannig sýndu rannsóknir við Kötlu árin 2016 - 2017 að tífalda ætti fyrra mat á kolefnislosun eldstöðva á Íslandi, enda losar Katla allt að 24.000 tonn á dag alla daga án þess að gjósa, þar sem gasið kreistist úr kvikunni er ofar kemur. 

Þannig að ef við leggjum Kötlu og Geldingadali saman, þá er losun þeirra 34.000 tonn hvern einasta dag, eða amk. 12 milljónir tonna. Síðan þegar Katla gýs fara allar tölur út úr korti og bókhaldið á haugana.

Skattar, álög, glötuð samkeppnisfærni og sá aðþrengdi lífsstíll sem þessi kolefnislosunartrú manna veldur á Íslandi verða að hætta. Tugþúsundir manna horfa á eldgosin og verða vitni af losuninni, en halda áfram að kjósa flokka sem njóta þess að banna, deila og drottna.

Borgarbúar fylgist með gasmengun á sunnudag

Notum Janssen strax á miðaldra karla

Við ættum að nota Janssen bóluefnið strax á miðaldra karla. Ekkert neikvætt hefur komið upp og aðeins þarf að bólusetja einu sinni. Þar með erum við tuðararnir orðnir frjálsir menn og getum látið okkur hverfa af sósíalista- landinu um tíma, á meðan samninga- Svandís finnur upp fleiri leiðir til þess að hefta eðlilegt frelsi landans.

Yngri konur í USA hafa líkurnar ein á móti milljón til þess að fá blóðtappa vegna Janssen bólusetningar. Öllu meiri líkur hafa þær á vandræðum með að fá Covid-19, með ofþyngd og undirliggjandi sykursýki, háþrýsting, hjartveiki osfrv. En lagaumhverfið fyrir framleiðandann er erfitt þar í landi og engin áhætta tekin, þó að sannað sé að það bjargi mannslífum.

Allavega er ég til í að samþykkja að fá strax bólusetningu með Janssen og eiga þá sumarið sem frjáls maður og tef ekki bólusetningarprógramm góðu ungu kvennanna.

 

Bíða með bóluefnið

Dauðans alvara

Hvað þarf eiginlega til að stjórnvöld fríi sig frá ESB í mikilvægustu málum Íslands? Er ekki nóg að vera með ónýt Schengen- landamæri, eyðilögð viðskipti við Rússland, rándýra hælisleitendur (með Covid- áhættu), Icesave- kúgun, valdaafsal orkupakka, sjálfsamþykkt tilskipanaflóð ásamt kolefnis- losunarkvóta með ofurskattlagningu og reglugerðafári? Nei, greinilega ekki, því að Svandís Svavarsdóttir heilbrigðisráðherra (sem er erlend samningatækni í blóð borin) kýs enn að fylgja ESB í einu og öllu, en þar með koma í veg fyrir að við einangraða fámennisþjóðin getum samið um þá skammta sem þarf til þess að bólusetja okkur öll á nokkrum dögum.

Vill ekki þegar hann fær

Evrópusambandið samdi um kaup á Astra-Zeneka/Oxford bóluefninu en samþykkti það ekki til notkunar, heldur níddi af því skóna í tvígang svo að hundruð milljóna Evrópufólks vilja ekki heyra á það minnst og milljónir skammta liggja hjá þeim undir skemmdum, enda ekki samþykkt af ESB fyrr en nú, þegar tugmilljónir Breta hafa fengið bólusetningu, sem reynsla milljóna manna sýnir hafa gefið 100% öryggi gagnvart tengdu andláti eða alvarlegum veikindum vegna Covid- veirunnar.

Fær ekki þegar hann vill

Á meðan Ísland bíður eftir Godot í bandi ESB var svo algerlega fyrirsjáanlegt að árangurinn með lokun þjóðfélagsins ynni gegn okkur, því að nýja regla ESB er að útflutningur frá ESB verður að taka mið af stöðu Covid- sýkinga í landinu sem bóluefni fara til. ESB- löndin eru í neyðarstöðu en við ekki. Kannski væla ráðherrar undanþágu út úr skriffinnum dauðans í Brussel, en ekki þykir það líklegt, enda reglugerðin sjóðheit.

Allir halda stöðu sinni

Alls staðar nema hér og í Brussel myndu hausar fjúka vegna svona vanhæfni. Í stað þess að vera bólusett og til í slaginn við fjórðu bylgjuna með nýjum afbrigðum veirunnar skellum við nú í lás aftur og fáum samt bylgjuna á okkur af fullum krafti.

Setjum landamærin við Ísland í stað Norður- Afríku og endursemjum við framleiðendur bóluefna vegna brostinna forsenda frá hendi Evrópusambandsins, sem riðar loks til falls.

 

 

 

Gengur í berhögg við EES-samninginn

Blásið í Borgarlínulúðrana

Enn ein staðfestingin á fylgni forystu Sjálfstæðisflokksins við Borgarlínu barst með Morgunblaðinu í morgun, þar sem Hildur Björnsdóttir borgarfulltrúi ítrekar afgerandi stuðning við hana og að þörf sé á fjölbreyttum samgöngukostum, þar sem ungt fólk líti á bifreiðina sem aðeins einn kost af mörgum í samgöngumálum. Þar virðist þó gleymast, að ¾ ferða í Reykjavík eru farnar á bílum, sem stendur ekki til að breytast.

„Einstrengingsleg nálgun“

Augljóst er að konur í yngri kantinum innan flokksins eru búnar að sammælast um það, að leiðin til aukinna áhrifa um málefni Reykjavíkur náist með því að staðfesta áfram skipulagsslysið Borgarlínu og að vinna með Samfylkingunni að uppbyggingu rándýra strætókerfisins, í stað nýrri tæknilausna sem nýta götur og vegi. Hildur segir m.a.: „Við náum takmörkuðum árangri með einstrengingslegri nálgun á menn og málefni…“. „Við þurfum að vera það mikilvæga sameiningarafl sem leiðir saman ólík sjónarmið“. Þessi lina afstaða gagnvart vinstri flokkunum vegna Aðalskipulags Reykjavíkur hefur verið dragbítur á gengi flokksins í fjöldamörg ár og skapað það eymdarástand sem nú ríkir.

Kosin gegn Borgarlínu

Fjöldi kjósenda sem kusu flokkinn síðast í borginni, gerði það í þeirri trú að Sjálfstæðisflokkurinn stæði gegn Borgarlínu, afstaða sem oddviti hans ítrekaði á fundum og í fjölmiðlum. Heilu hverfin hefðu tæpast kosið flokkinn ef fylgnin við ofurstrætókerfið hefði legið skýr fyrir. Stuðningur hverfa og alls landsins utan mið- og Vesturbæjar Reykjavíkur við bílinn og uppbyggingu vegakerfis er afgerandi, sem kemur skýrt fram í könnunum.

Kjósið til breytinga

Íbúar Reykjavíkur sem blöskrar hvernig keyra á fjárhag borgarinnar í þrot með óendanlegri sóun í afdankaða hugmyndafræði fortíðarinnar ættu að krefjast þess af fólkinu sem það kýs til almannaþjónustu að það breyti áætlunum um Borgarlínu í ódýrari, nýmóðins kerfi sem taki mið af breyttum tímum og aðstæðum.

Hvatar til að draga úr umferð

Nauðung, ekki valkostur

Veruleg vonbrigði urðu við lestur greinar Áslaugar Örnu Sigurbjörnsdóttur dómsmálaráðherra, „Fröken Reykjavík“ í Morgunblaðinu í dag, þegar kom að samgöngumálum í borginni. Annað í greininni var úr þeirri ágætu frelsisátt sem vonast var eftir, en forðast var að minnast á Borgarlínu eins og hún væri Valdemort í Harry Potter.

Bjóða beri upp á valfrelsi, óháð því hvort íbúar velji að ferðast með bíl, strætó eða á hjóli. „Það gerist ekki með þvinguðum samgöngumáta, heldur vönduðu skipulagi þar sem ýtt er undir valfrelsi borgarbúa“. Fólk komist á milli staða á þann máta sem hentar þeim best. „Það felur vissulega í sér uppbyggingu á innviðum, svo sem almenningssamgöngum, hjólreiðastígum og vegum. Þá er ekki hægt að undanskilja einn samgöngumáta á kostnað annars.“

Rými er takmörkuð gæði

Þarna liggur hundurinn grafinn. Þorri borgarbúa (75%) kýs að ferðast með bílum, 4% með ofurniðurgreiddum Strætó, en reiðhjóli eftir árstíðum. Metsala er í nýorkubílum, sem eykur hlutfall þeirra. Samt verða þeir ferðalangar þvingaðir í æ þrengri rásir veganna, því að stefnan er að þröngva Strætó upp á fólk með illu, með ofboðslegum kostnaði og umferðarstíflum. Valkostur fjöldans er hunsaður, en hugmyndafræði 4% elítunnar dásömuð.

Ekkert val

Hvernig fær fólk með frelsisást sig til þess að samþykkja þessa afarsamninga Borgarlínunnar? Ekkert gengur upp, kostnaður, reynslan, markmið, hvaðeina. Valkostur nýorkubílanna gleymist algerlega. Vetnisvæðing Íslands verður sannarlega ekki að veruleika á þennan hátt.

Herkostnaðurinn við það að stjórna með sósíalistum er alltof hár, fyrst þetta er niðurstaðan úr „samstarfinu“. Áslaug Arna, komdu okkur út úr Borgarlínufárinu með góðu eða illu. Annars verður Fröken Reykjavík gjaldþrota og fer á sósíalinn.

Uppbygging á grænni borg fyrir 300 milljarða

Bremsulaus Borgarlínustrætó

Því miður brást Sjálfstæðis- flokkurinn algerlega og stimplaði Borgarlínu fram og til baka, í ríkinu, borginni og nærliggjandi sveitarfélögum, þrátt fyrir fagrar fullyrðingar um annað á liðnum árum. Fyrir vikið er stærsta fyrirstaðan farin og nú fara krónu- milljarðarnir að streyma í átt til fáu prósentanna sem aldrei fyrr, eftir tíu ára æfingatímabil í Strætó- sóuninni.

Ætt áfram

Ekki dugði Hrunið og heimsfaraldur til þess að opna augu fólks fyrir því, að Strætó sé úrelt fyrirbæri, hvað þá að samgöngufé eigi ekki að ausa í nokkrar manneskjur, heldur að dreifast til fjöldans sem skóp það, almennings á fjölskyldubílum. Þetta eru óheyrilegar upphæðir á hvern þann sem álpast upp í tap- kassabílana stóru. Nær væri að afhenda fólki á biðstöðvum ávísanir, sem duga í ferðir með nýorku- leigubílum, samt yrðu tugir milljarða króna eftir til skiptanna og göturnar frjálsar áfram. Þetta er eins og ríki og borg leggðust á eitt, eftir að allir voru komnir með internetið, að borga þeim fúlgur fjár sem vildu hætta því og nota telefax og halda því kerfi við með ærnum tilkostnaði.

Fé til fárra

Ef allt það fé, sem fer í Strætó, framkvæmdir vegna hans og taprekstur þess kerfis næstu 20 ár yrði tekið saman, fengjust milljarðatugir sem fleygt gætu nýjum kerfum í samgöngum langt fram, þótt talið yrði með að allir fjögur- prósent farþegarnir fengju jafnmargar fríar ferðir og þeir hefðu farið með Strætó/Borgarlínu.

Annars er þessi bremsulausi strætó kominn á fullt og ekkert í augsýn sem megnar að stöðva hann.

Aðgerðir strax, neyðin kallar

Ísland má ekki við því lengur á þessari ögurstundu að vera taglhnýtingur Evrópusambandsins í samningum um bóluefni vegna kófsins. Svandísi Svavarsdóttur heilbrigðisráðherra hefur verið leyft að láta okkur dingla í ESB með smánarkvóta bóluefnis seint og illa í mesta klúðri þeirra allra tíma, með þeim afleiðingum að samningar við Pfizer um ókeypis bóluefni fyrir meginþorra okkar á 2-3 vikum renni okkur úr höndum. Hafi einhvern tíma verið ástæða til þess að virkja neyðarrétt í samningum Íslendinga, þá er það núna gagnvart ESB, þegar líf eða heilsa sannarlega hundraða manna eru lögð að veði.

Andstæðir hagsmunir

Hagsmunir ríkja ESB og Íslands fara engan veginn saman í þessum samningum. Stórkostleg neyð sumra þeirra, eins og Portúgal núna, kallar á allt það bóluefni sem fáanlegt er í gegn um ríkjasambandið. Neyðarréttur þeirra væri að benda á smitleysi Íslendinga til þess að fresta enn frekar afhendingum hingað. Alveg öruggt er að við komumst ekki framarlega í þeirri eilífðarröð sem ESB skóp með skipulegu vanhæfi sínu. Sambandið samþykkir ekki bóluefni frá framleiðanda mánuðum saman og segir það ekki almennilega rannsakað fyrir eldra fólk, á meðan ESB heimtar að framleiðandinn standi við afhendingar í samræmi við samninginn sem var gerður í upphafi!

Stígum niður fæti

Sannað þykir að jafnvel dómur Hæstaréttar fær ekki Svandísi Svavarsdóttur til þess að framkvæma rétt sem ráðherra, þegar hún neitaði að staðfesta þær samþykktu virkjanir sem hefðu fært Suðurnesjum orku til athafna forðum. Nú verða samstarfsflokkar VG, Sjálfstæðis- og Framsóknarflokkur að sýna þann dug að heimta gerð Kárasamningsins við Pfizer, þótt það þýði að ömurlegu bóluefnasamningarnir við ESB fari upp í loft fyrir vikið. Nýjar og verri útgáfur kórónuveirunnar mega ekki ná fótfestu hér. Ekkert sleifarlag, lífið liggur við.

Ekkert hæft í þrálátum orðrómi

Ekkert hæli í bili

Hér er grein mín sem birtist í Morgunblaðinu þann 15/1/2021 (ekki skrumskæld af netinu):

Á meðan ríkið mokar núna milljörðum króna á dag til fólksins í boði framtíðarskattpíndra barna okkar hlýtur að mega gera þá kröfu á móti að ýmis vitleysa ríkisins verði skorin almennilega niður við trog. Þar má byrja á hælisleitendum: Ófært er að öðrum hverjum íbúa heimsins sem dettur í hug að sækja um landvist hér sé það ekki aðeins leyfilegt heldur sé okkur skylt að taka við honum og moka síðan milljörðum króna á ári í allt það sem honum tengist í fjölda ára, með sérréttindi langt umfram aðra þá sem hér búa.

Halda mætti að sú ótrúlega ánauð sem Covid-kreppan hefur lagt á þjóðina hafi kennt henni að hætta hverju því strax sem eykur þessa píningu. Nei, öðru nær, blásið er í lúðrana og fjöldanum hleypt í þverrandi sjóðina sem landinn hafði stoltur safnað í áratugum saman.

Veirutímar

Á þetta allt bætist síðan áhættan og álagið sem færist hingað á Covid-tímum við það að taka við fólkinu hingað, á meðan margar aðrar vestrænar þjóðir takmarka þetta af hörku svo að flæðið nær stöðvast hjá þeim. Sóttvarnahúsum okkar fjölgar enda er drjúgur hluti vistmanna úr hópi hælisleitenda. Málið er svo viðkvæmt í pólitíkinni að fáir falast eftir tölum um hlutfall hælisleitenda í sóttkví, hvað þá smituðum eða smitendum samkvæmt sóttrakningu, þótt komið hafi smitsprengjur í þeim hópum. England setti harðar reglur um komur fólks frá löndum í suðurhluta Afríku til þess að reyna að takmarka smit nýja Covid-afbrigðisins í landinu.

Sé einhver að tengja þetta við kynþátt, trúarbrögð eða annað slíkt, þá er það til þess að afvegaleiða umræðuna. Hér er um fjármál og heilbrigðismál að ræða. Hættum að taka við hælisleitendum þar til það er öruggt og við höfum efni á því. Enn er langt í að hvort tveggja verði uppfyllt.

Valdið úr sveit í 101 Reykjavík

Nú fyrir jól laumar vinstri umhverfis- öfgafólk inn frumvarpi um hálendisþjóðgarð, þar sem fólkið úti um landið missir tökin á stjórn svæða sinna og völdin verða færð í báknið í miðborginni, með tryggðu inngripi hagsmunasamtaka kreddufólksins.

Tímasetningin er ekki tilviljun, því að yfirleitt svífur flest í gegn án teljandi umræðu í jólastreði og tímahraki. En þessi hörmung má ekki verða að lögum. Uppbygging fjölbreyttrar atvinnustarfsemi, ferðalaga og náttúruverndar hefur átt sér stað í fjölda áratuga á miðhálendinu, auk þess sem fallorkan er að mestu bundin þar. Ráði miðbæjargengið verður flest það bannað sem hefur átt sér stað, nema það fáeina sem Æðstaráðinu er samþykkjanlegt. Þar að auki fá fulltrúar þeirra, þjóðgarðsverðir, völd til þess að stöðva flest það sem eðlilegt þykir í dag enda eru jeppar, húsbílar, fjórhjól, vélsleðar og þyrlur eitur í þeirra beinum.

Engin ólög, takk

Það er nær ómögulegt að vinda ofan af slæmum lögum, hversu íþyngjandi sem þau eru. Því verður að hafna þessu frumvarpi um hálendisþjóðgarð, sem þarf amk. verulega umfjöllun og umsögn, áður en þetta sleppur í gegn. Sjálfstæðisflokkurinn setur verulega niður að láta þetta gerast á sinni vakt, frá flokki sem er aðeins með þriðjung af fylgi hans. Dýr þykir mér samstarfs- samningurinn ef þessu átti að hleypa í gegn frá upphafi, í ofanálág við alla skammtheimtuna og höftin sem Vinstri græn stendur fyrir, vegna andrúmsloftsins eða athafna drífandi Íslendinga, til fjörs og framfara.

 

 

 

 

Hálendisþjóðgarður umdeildur