Borgarlínukonur styðja hver aðra

Manni fallast hendur við það að sjá yfirlýstar stuðningskonur Borgarlínu sækjast eftir yfirstjórn borgarinnar í nafni Sjálfstæðisflokksins, í hróplegu ósamræmi við vilja þorra kjósenda hans. Þær vilja halda áfram hörmungarferð liðinna ára, þar sem skipulagsslys og samgöngutregða voru samþykkt og rándýri eltingaleikurinn við 4% fólksins heldur áfram í margfeldi sínu.

Gefum Katrínu Atladóttur orðið: "Góðar al­mennings­sam­göngur þurfa að vera á­reiðan­legar, tíðar, hrað­virkar, að­gengi­legar og þægi­legar. Borgar­línan hefur þetta allt saman." 

Borgarstjóri Borgarlínu?

Hildur Björnsdóttir sækist núna eftir 1. sæti XD listans. Sem borgarstjóri myndi þessi stuðningskona Borgarlínu ekki bæta samgöngur í Reykjavík, allra síst fyrir flokksmenn sína á nýju nýorkubílunum sínum. 

Frasar á fullu

Hvað er það sem veldur að sumar konur í forystu Sjálfstæðisflokksins í borginni halda áfram að eltast við það sem þær virðast halda að sé til vinsælda, hversu út úr kú sem það er, eins og Borgarlína og 15 mínútna hverfi? Frasarnir eru farnir að vella upp úr þeim núna, alveg eins og Dagur B. Eggertsson hafi laumað óska- jólalistanum inn á borð þeirra. Samfylkingin hlýtur að hafa skálað í kampavíni eftir framboðsræður Hildar Björnsdóttir í sjónvarpinu í gærkveldi og einlægan stuðning Katrínar Atladóttur við Hildi.

Varúð

Ég er hræddur um að Sjálfstæðisfólk verði að gyrða sig í brók fyrir vorið, svo að það minni ekki örlítið á önnur fræg vor, hið arabíska eða í Prag. Margir vegfarendur í Reykjavíkurborg eru þungt hugsi vegna kúgunaráætlana meirihlutans í samgöngumálum borgarinnar. Leyfum skynseminni að ráða, ekki stuðningfólki Borgarlínu og 15 mínútna bílastæðalausra hverfa.

 

Lýsir yfir stuðningi við Hildi

Landsvirkjun hækkar verð fyrir ESB

Þráhyggja Landsvirkjunar um rafmagn sem markaðsvöru heldur áfram, nú með verðhækkun til þess að friðþægja yfirstjórnina, regluverði ESB skv. Orkupakkanum. Stjórn stofnunarinnar telur að hún eigi að hámarka hagnað til þess að pólitíkusar fái auka milljarða króna á ári í að uppfylla ótæmandi kosningaloforð sín. 

Grísir gjalda

Hvers eiga heimilin og fjölmörg smáfyrirtæki í landinu að gjalda, þegar þessum gullkálfi þjóðarinnar er ítrekað misbeitt  síðustu ár? Milljörðum króna er eytt í skoðum á því hvort eða hvernig megi veita rafmagni héðan til Evrópu, á meðan tæpt er í sumum lónum á vetrarmánuðum. Ef hagnaður myndast, þá ætti að greiða frekar niður lán, treysta innviðina almennilega til þess að standast auknar þarfir, eldgos eða toppálag, eða hreinlega að lækka verðið, sem skilar sér síðan væntanlega til eigendanna, neytenda. 

Ríkið hækkar mest

Sjálfskipuð orkukrísa Evrópu vegna loftslagsánauðar ætti að koma þjóðinni til góða í samkeppninni, þar sem við njótum forskots til nýsköpunar eða betri lífshátta, með rafmagn sem á uppruna sinn hjá Landsvirkjun. Þarflausar hækkanir minnka það forskot og auka verðbólguna, sem heldur annars ótrauð áfram, leidd af stofnunum ríkisins, með öllum sínum launahækkunum.

Verð hjá Landsvirkjun hækkar

Heimsmót bábiljanna

Enginn raunvísindamaður hefur fullyrt í alvöru að Íslendingar geti breytt loftslagi heimsins með því að hætta akstri fólksbíla. Samt er þeirri bábilju haldið að fólki allan daginn og alla daga. Vörur hækka í verði, skattar og álögur rjúka upp, húsnæði og ferðalög hækka, heilu þjóðirnar berast á banaspjótum í orkukrísu, allt vegna kenningarinnar um að koltvísýringur losaður með athöfnum manna hiti heiminn út úr korti. Auðvelt er að gleyma því að fólki í heiminum fjölgar um 200.000 manns á hverjum degi, álíka öllum Íslendingum á atvinnuskrá. Hvernig geta bílatölur okkar skipt máli?

Rauntölur, ekki prósentur

Íslendingar geta ekki breytt veðurfarinu með bílhegðun sinni. Sú staðreynd fær loftlagssinna til að skipta um gír og tala um leiðandi hlutverk okkar og fyrirmynd í heiminum, í stað rauntalna sem engu breyta. Rætt er um prósentur en ekki rauntölur, því að tölurnar eru hverfandi og áhrif þeirra verða aldrei sannreyndar, sem er þó ein aðalregla vísindanna að þurfi að gera. En við erum hvort eð er einstök sem leiðandi fyrirmynd og ættum ekki að þjást fyrir það.

Léttið okkur lífið

Ef íslensku stjórnmálafólki væri virkilega annt um kjósendur sína, ætti það að hætta loftslagsáróðri, en létta álögur þeirra, láta skipulagið hjálpa fólki, sem verður leyft að ákveða ferðamáta sinn án fordóma. Þá styttist vinnuvikan, almannahagur snarbatnar, kvíði verður hverfandi og við verðum öll vinir aftur!

Vitnaði í Andra Snæ í ávarpi sínu

Orkukrísa Evrópu sannar sérstöðu Íslands

Orkuþurrð Evrópu eykst dag frá degi og gasverð tífaldast frá lægsta punkti í fyrra, en áfram heldur stjórnmálafólkið að grafa dýpri gröf fyrir þjóðir sínar með "metnaðarfullum" áætlunum um skattlagningu, höft, bönn og verðhækkanir til þess að berjast gegn hlýnandi heimi, allt í nafni manngerðra loftslagsbreytinga.

Fyrirtækin loka

Nú leggja orkufrek fyrirtæki Evrópu upp laupana, sérstaklega þau smáu og miðlungsstóru, sem mega ekki við þessum verðsveiflum á orku. Ástandið er algerlega sjálfsskapað: Kjarnorku- og kolaverum var  lokað, en það færði Rússum aukin völd á gasmarkaði. Stóra gasleiðslan Nord Stream 2 til Þýskalands var tengd og tilbúin fyrir mánuði síðan, en fer ekki af stað fyrr en kanslari landsins stimplar sitt samþykki. Áhrif Vinstri grænna eru þar veruleg og því má búast við gasleysi áfram í ESB, sem ræðst af Þýskalandi eins og alkunna er.

Norðmenn í púkkið

Jafnvel Norðmenn með allar sínar olíulindir horfa nú upp á hörmungar- verðhækkanir hjá sér, í stað þess að tryggja landsmönnum alltaf orku á skaplegu verði, sem auðvelt væri að standa við. Þangað liggja kaplar sem færa Evrópu orku, næstum því sama hvaða ástand er í Noregi, enda stýrir ESB því og gerðir eru afhendingar- samningar sem standa þarf við. 

Logn og kalt?

Nú bíður því Evrópa á milli vonar og ótta um það, hvort veturinn verði kaldur eða mildur. Miklir frostakaflar geta rústað efnahag í álfunni, sérstaklega ef lognið fylgir, þar sem vindorkuverin ná ekki að skila sér. Gasið frá Rússum og veðrið ráða því hvort Evrópa verði starfhæf eða ekki í vetur.

BNA bjarga ekki núna

Venjulega koma Bandaríkin til bjargar, en svo er ekki núna, þökk sé Biden forseta, sem stöðvaði strax framkvæmdir við olíuleiðsluna frá Alaska, en hún var nær tilbúin. Auk þess fór haftastefna hans í gang á flestum sviðum. Olíu- og gasframleiðsla Bandaríkjamanna verður því að langmestu leyti  fyrir eigin þjóð og verður gripið til útflutningsbanns ef þurfa þykir.

Virkjum áfram

Á meðan orkukrísa skekur heiminn er til fólk hér á landi sem dregur lappirnar í því að samþykkja virkjanir, sem gætu tryggt áframhaldandi orkuöryggi á Íslandi, orkuskipti, sjálfbærni, samkeppnishæfni og frumkvöðulsstarfsemi. Ef umhverfis- og auðlindamálin verða afhent áfram Vinstri grænum, þá verðum við í álíka eymdarstöðu og Evrópusambandið. Það gerum við varla sjálfviljug.

 

„Það þarf einfaldlega að virkja“

Móðusumarið 2021

Undrun vekur hjá mér að allt það hálfa ár sem Geldingadalir hafa gosið, hafa vísindamenn nær aldrei talað ítarlega um áhrif þess á skýjafar á Suðvesturlandi, hvað þá um losun koltvísýrings (CO2) og brennisteinstvíildis (SO2) í magni talið. Þó er deginum ljósara að skýjamyndun og úrkoma var mun meiri en venjulega, sem sést núna hve fáar sólarstundir voru þetta móðusumar. 

SV- skýjafar 2021 

Ég hef tekið yfirlitsljósmyndir allan gostímann og raunar vel áður, þar sem gas- og hitalosun á miðjum Reykjanesskaganum fór að verða óvenju áberandi strax við jarðskjálftahrinurnar fyrir eldgos, en ég hef haft þetta útsýni í yfir hálfa öld. Myndirnar sýna glöggt upprunann, Geldingadali. Hér er sólin dýrkuð úti á palli þegar færi gefst, en eldgosið dældi slíku magni gasskýja upp í loftið að Suðvesturland var mjög oft alsett þessum ófögnuði sem mengunarskýin eru. Þetta sást vel þegar ekið var að austan í heiðskíru veðri, en gegnheilt og grásvart skýjaþykknið mætti manni yfir Hellisheiðinni og versnaði þegar nær dró borginni.

Í garðinum heima

Þessa umhverfisvá í nærumhverfinu þarf að rannsaka. Þetta er loftslagsmál sem skiptir máli, ekki einhver hugsanleg heimshlýnun frá Timbuktú. Geldingadalir losa líklega 10.000 tonn á dag af CO2 og er því nokkra daga að losa eins og allir fólksbílar á Íslandi á heilu ári, eins og komið hefur fram. Ætli SO2 losunin hafi ekki jafnast á mánuði á við árslosun flutningabíla á Íslandi? Slíkt þarf að mæla.

Skattur

Umhverfisáhrif íslenskrar náttúru eru ærin. Fyrst við eru skattlögð fram og til baka vegna loftslagsáhrifa, látum féð fara í náttúrurannsóknir á Íslandi, eða sleppum skattinum ella.

Sólskinsstundir í Reykjavík ekki færri í 100 ár

Kjósið nýorkuna inn

Borgarlína verður 75% greidd af ríkinu, amk. fyrsta fallið. Því skiptir mestu hver verða kosin á þing. Þessi yfir 100 milljarða króna ímyndarbardagi hefur ekkert með skilvirkni í samgöngum að gera. Strætisvagnabílstjóri sagði í viðtali í fyrradag að helstu kúnnarnir væru krakkar og útlendingar, en fullorðnir Íslendingar væru „latir“ að taka strætisvagn. Varla heldur það Strætó gangandi, enda hefur tekjumódel fyrirtækisins hrunið, þrátt fyrir tíu ára mokstur af milljarði króna á ári í 10 ár, þar sem nýorkubílar og Brynjarsfákar ýta Strætó ennþá nær hyldýpinu núna.

Sóun fyrir fáa

Verst er að nær allir stjórnmálaflokkar staðfesta fylgi við Borgarlínu, þrátt fyrir að 4% ferða séu með Strætó og helmingur íbúanna ætli nær aldrei að nota það kerfi.  Styðjum vetnisframleiðslu og uppbyggingu innviða í rafmagnsdreifingu. Endurskilgreina þarf almenningssamgöngur, sem hljóta að vera sá ferðamáti sem langflestir kjósa.

Krefjist vitrænna aðgerða af frambjóðendum ykkar.

Ný könnun: Þrír flokkar taka fram úr

Sjálfskipuð vandræði Sjálfstæðisflokksins

Erfitt er að horfa upp á þessa vinstristjórn sem flest stefnir í, þegar haft er í huga af hverju áður líklegir kjósendur Sjálfstæðisflokksins (XD) eru hikandi við að kjósa hann. 

Sjálfstætt fólk er alveg upp að vegg í þessu máli. Eltingaleikur yngri kvenna í flokknum við miðjuna núna endurspeglar sömu vandræðin og þær komu Reykjavíkurborg í: að samþykkja Borgarlínu og að hampa loftslagsmálum, með öllum þeim sköttum og óþarfa hömlum sem þeim fylgja. Fyrir vikið er afar erfitt að kjósa flokkinn, þar sem í því felst samþykki á áætlun forystukvennanna. Þar að auki er mörgum helstu forsvarsmönnum hægri stefnu ýtt til hliðar, en maður getur samþykkt nær allt sem frá þeim kemur.

Fundurinn stóð gegn Borgarlínu

Ágætur aðalfundur Sjálfstæðisfélagsins í Nes- og Melahverfi með metmætingu í Valhöll fyrir stuttu sýndi hve raunveruleg andstaða við Borgarlínu er innan flokksins, jafnvel innan hálfsósíalíska Vesturbæjarins, þar sem fólk er komið á rafmagnsbíla eða reiðhjól að hætti Gísla Marteins. Þar var vel afgerandi (um 80%) stuðningur við ályktun um að hafna áætlunum um Borgarlínu á þessari stundu. Þeirri ályktun er ekki beinlínis hampað í baráttunni. 

Ríkið ræður þessu

Borgarlína kemst ekki á koppinn nema ríkið komi þar verulega að. Aðgerðirnar hafa afgerandi neikvæð áhrif á daglegt líf langflestra kjósenda eftir þessar kosningar, á meðan ábatinn á endanum er fyrir 4% fólksins, sem allt miðast við. Komið frambjóðendum Sjálfstæðisflokksins í skilning um það að þau verða að setja þetta Borgarlínuskrímsli á bið, ella verði ekki um XD að ræða núna. Auk þess er loftslagsfárið algert.

Framsóknarflokkur í lykilstöðu

Nagladekk í Sahara og á söndum Suðurlands

Uppruni svifryks í Reykjavík hefur aðallega verið sandarnir á Suðurlandi og aska af heiðunum, sérstaklega eftir eldgosin 2010 og 2011. Nú bættist gosið í Geldingahrauni við, þótt ekki sé það öskugos, en hefur oft náð að senda okkur góðar spýjur, eins og sést á svarta bílnum okkar í þurrum SV-áttum og á svörtu skýjaþykkni frá eldstöðvunum.

Ísland er rykland

Úr frétt Morgunblaðsins í dag: "Ísland er helsta upprunasvæði ryks í Evrópu. Hér eru 44.000 ferkílómetra eyðimerkur og að meðaltali er jarvegsfok hér í 135 daga á ári."..."Hægt er að greina með sérstökum tækjabúnaði hvaðan rykið er komið og meir að segja hvar á Íslandi einstök rykkorn eru upprunnin".  

Rannsaka rykið

Áður en meirihluti borgarstjórnar, Dagur & Co., grípur til frekari aðgerða og skattlagningar til þess að draga úr öryggi borgarbúa vegna nagladekkjanotkunar þeirra ætti hann að láta rannsaka svifryk gatna á ofangreindan hátt og sjá hvað safnast mikið ryk á götu sem þrifin var áður en austan eða suðaustan rok kom af heiðunum og svo eftirá.

Einhvern veginn á ég ekki von á því að sú rannsókn verði gerð.

Rykagnir frá Sahara fjúka oft til Íslands

Jafnræði Svandísar útilokar ýmsa

Allir fullorðnir hafa rétt á bólusetningu, skyldi maður halda, en þá kemur Animal Farm- jafnræði Svandísar Svavarsdóttur heilbrigðisráðherra í ljós: Fólki sem hafði veikst af Covid-19 er nú neitað um bólusetningu. Allir geta mætt og fengið sprautu nema þau! Mismununin er alger.

Þrautaganga

Þrautir þess hóps sem fékk verulega að finna fyrir Covid- árinu eru miklar og þjáist sumt enn vegna þrálátra einkenna. Þar að auki eru mörg þeirra ekki með mótefni við þessum vírus og fá ekki mótefnavottorð. Vonin til þess að mynda mótefni er tekin af þessu fólki.

Fær neitun

Beðið var eftir bólusetningu, en hún fæst ekki núna, þau njóta ekki réttinda á við annað fólk. Ef þau fá ekki bólusetningu (fyrr en kannski seint og síðar meir), þá komast þau ekki til Ameríku eða annað, þar sem bólusetningarvottorðs er krafist. Sum lönd boða að veikindi fyrir ári síðan séu ekki nóg til aðgangs þangað. Heilum árgöngum er boðið, en ekki því fólki sem veiktist. En aðallega, þessi hópur á sama rétt og aðrir þegnar íslenska ríkisins.

Bjóðið þeim bólusetningu strax!

 

„Við erum ekki alveg í stresskasti“

Kolefnislosun tvöfaldaðist en skiptir samt engu!

Nú þegar flæði gosefna í Geldingadölum hefur tvöfaldast, þá skipta þau 20.000 tonn af koltvísýringi (CO2) á dag engu, af því að sú losun er frá eldgosi, sem skráist ekki í reiknimódel umhverfis- ráðuneytisins. Ásamt um 20.000 daglegum tonnum í útöndun frá Kötlu eru þau samtals um 40.000 tonn á dag, utan bókhalds. Þau jafnast því á fimm dögum við árslosun íslenskra fólksbíla, eða semsagt 73 sinnum meiri CO2 losun en fólksbílarnir.

Frambjóðendum til Alþingis sem blöskrar þversagnirnar er hent út í ystu myrkur. Því liggur fyrir að landinn verður skattlagður til fjandans út af engu næsta áratuginn, kolefnistímabilið, einn undarlegasta blekkingartíma sögunnar. Sundurgrafnar götur Reykjavíkur fyrir 4% elítuna í Borgarlínunni og gjaldþrot borgarinnar marka líka sporin í söguna.

Gasmengun aukist síðustu tvo daga

Kjósum andstæðinga Borgarlínu

Öllu máli skiptir að stuðningsfólk Borgarlínu verði ekki kosið til áhrifa í prófkjöri Sjálfstæðisflokksins til Alþingis núna, því að annars verða hörmungaráformin geirnegld næstu áratugina. Ríkið ræður miklu um þessa skuldasúpu og umferðarteppu. Mikil vonbrigði voru að sjá að frambjóðendur staðfestu stuðning sinn við Borgarlína, sem yfir helmingur Reykvíkinga segist aldrei eða nær aldrei (1x/mán.) ætla að nota.

Ef þið kusuð samt sem áður þessa frambjóðendur, reynið að koma vitinu fyrir þau með að hætta við ósköpin á meðan einhver von er til þess.

40% leist vel á Borgarlínuna

75-80% ferðalanga sjá fram á breytingar

Þær konur og þeir karlar sem ferðast um á bílum í höfuðborginni og fara þannig 75-80% árlegra heildarferða innan hennar geta vænst breytinga eftir að Alexandra Briem tekur nú við sem formaður skipulags- og samgönguráðs. Gefum henni orðið:

„Yfir ára­tugi hafa frekir bíl­eig­endur og fram­leið­endur unnið að því á vestur­löndum að skipu­lag og upp­bygging sé á þann veg að í raun sé enginn annar raun­hæfur ferða­máti en sá sem þeir kjósa. Og ó­víða hefur þeim gengið betur en á Ís­landi. Freku karlarnir á Ís­landi hafa séð rautt yfir árangri Sigur­borgar og ég hef séð ógnandi til­burði gagn­vart henni bæði í eigin per­sónu sem og í skrifum sem er satt að segja ó­trú­legt að þeir hafi komist upp með.“

Breyttar götur

Breytingarnar sem bílferðalangarnir sjá verða kannski ekki í þeirra átt, heldur mun Alexandra sannarlega taka við Píratakefli forvera síns og fara öllu lengra með það í að gera þeim lífið leitt. Konur á nýorkubílum mega vara sig, því að verið er að refsa "frekum körlum" fyrir að hafa verið á bensín- og dieselbílum, á þann hátt að þrengja göturnar fyrir helstu kaupendum rafmagnsbíla, kvenna. 

Bílafjandskap og Borgarlínu 

Fjáraustur borgarstjórnar- meirihlutans til 4% ferðafólksins, strætó- elítunnar stefnir nú í óendanleikann eftir áratugs tilraun með milljarð króna á ári. Nýi formaður ráðsins getur vart búist við vægð, þar sem hún mun þurfa að verja Borgarlínuna, þá óverjandi sóunaraðgerð, sem stefnir borginni fram af björgum á mettíma.

Embættið er ekkert grín

Alexandra Briem mun fá að heyra það, bæði sem varðhundur Dags B. Eggertssonar og sem Píratinn í valdamiklu embætti í samgöngum Reykvíkinga á þeim tíma í sögu borgarinnar þar sem samgöngunum verður rústað.  

 

Sigurborg hættir í borgarstjórn vegna veikinda

Eldgos á svörtu

Kolefnisbókhald er byggt á falsi, en við erum skattlögð fram og til baka byggt á þeirri lygi. Eldgosið nýja er gott dæmi, mun ekki finnast í rassvasabókhaldinu og var ekki í neinum áætlunum, enda ekki til í 870 ár þar til nú. Losun koltvísýrings (CO2) þaðan er um 10.000 tonn á dag (10 milljón kíló), auk annarra mun öflugri  gastegunda. Eldfjallið losar því jafnt á einni viku og allir fólksbílar Íslands á einu ári! Um fimmtíu sinnum meira en fólksbílarnir á hverju ári. 

Losunartrúarmenn neita algerlega að taka eldgosin inn í bókhaldið fína, jafnvel þótt þeir telji að eldgosin verði algengari með léttari jöklum osfrv. Þannig sýndu rannsóknir við Kötlu árin 2016 - 2017 að tífalda ætti fyrra mat á kolefnislosun eldstöðva á Íslandi, enda losar Katla allt að 24.000 tonn á dag alla daga án þess að gjósa, þar sem gasið kreistist úr kvikunni er ofar kemur. 

Þannig að ef við leggjum Kötlu og Geldingadali saman, þá er losun þeirra 34.000 tonn hvern einasta dag, eða amk. 12 milljónir tonna. Síðan þegar Katla gýs fara allar tölur út úr korti og bókhaldið á haugana.

Skattar, álög, glötuð samkeppnisfærni og sá aðþrengdi lífsstíll sem þessi kolefnislosunartrú manna veldur á Íslandi verða að hætta. Tugþúsundir manna horfa á eldgosin og verða vitni af losuninni, en halda áfram að kjósa flokka sem njóta þess að banna, deila og drottna.

Borgarbúar fylgist með gasmengun á sunnudag

Notum Janssen strax á miðaldra karla

Við ættum að nota Janssen bóluefnið strax á miðaldra karla. Ekkert neikvætt hefur komið upp og aðeins þarf að bólusetja einu sinni. Þar með erum við tuðararnir orðnir frjálsir menn og getum látið okkur hverfa af sósíalista- landinu um tíma, á meðan samninga- Svandís finnur upp fleiri leiðir til þess að hefta eðlilegt frelsi landans.

Yngri konur í USA hafa líkurnar ein á móti milljón til þess að fá blóðtappa vegna Janssen bólusetningar. Öllu meiri líkur hafa þær á vandræðum með að fá Covid-19, með ofþyngd og undirliggjandi sykursýki, háþrýsting, hjartveiki osfrv. En lagaumhverfið fyrir framleiðandann er erfitt þar í landi og engin áhætta tekin, þó að sannað sé að það bjargi mannslífum.

Allavega er ég til í að samþykkja að fá strax bólusetningu með Janssen og eiga þá sumarið sem frjáls maður og tef ekki bólusetningarprógramm góðu ungu kvennanna.

 

Bíða með bóluefnið

Dauðans alvara

Hvað þarf eiginlega til að stjórnvöld fríi sig frá ESB í mikilvægustu málum Íslands? Er ekki nóg að vera með ónýt Schengen- landamæri, eyðilögð viðskipti við Rússland, rándýra hælisleitendur (með Covid- áhættu), Icesave- kúgun, valdaafsal orkupakka, sjálfsamþykkt tilskipanaflóð ásamt kolefnis- losunarkvóta með ofurskattlagningu og reglugerðafári? Nei, greinilega ekki, því að Svandís Svavarsdóttir heilbrigðisráðherra (sem er erlend samningatækni í blóð borin) kýs enn að fylgja ESB í einu og öllu, en þar með koma í veg fyrir að við einangraða fámennisþjóðin getum samið um þá skammta sem þarf til þess að bólusetja okkur öll á nokkrum dögum.

Vill ekki þegar hann fær

Evrópusambandið samdi um kaup á Astra-Zeneka/Oxford bóluefninu en samþykkti það ekki til notkunar, heldur níddi af því skóna í tvígang svo að hundruð milljóna Evrópufólks vilja ekki heyra á það minnst og milljónir skammta liggja hjá þeim undir skemmdum, enda ekki samþykkt af ESB fyrr en nú, þegar tugmilljónir Breta hafa fengið bólusetningu, sem reynsla milljóna manna sýnir hafa gefið 100% öryggi gagnvart tengdu andláti eða alvarlegum veikindum vegna Covid- veirunnar.

Fær ekki þegar hann vill

Á meðan Ísland bíður eftir Godot í bandi ESB var svo algerlega fyrirsjáanlegt að árangurinn með lokun þjóðfélagsins ynni gegn okkur, því að nýja regla ESB er að útflutningur frá ESB verður að taka mið af stöðu Covid- sýkinga í landinu sem bóluefni fara til. ESB- löndin eru í neyðarstöðu en við ekki. Kannski væla ráðherrar undanþágu út úr skriffinnum dauðans í Brussel, en ekki þykir það líklegt, enda reglugerðin sjóðheit.

Allir halda stöðu sinni

Alls staðar nema hér og í Brussel myndu hausar fjúka vegna svona vanhæfni. Í stað þess að vera bólusett og til í slaginn við fjórðu bylgjuna með nýjum afbrigðum veirunnar skellum við nú í lás aftur og fáum samt bylgjuna á okkur af fullum krafti.

Setjum landamærin við Ísland í stað Norður- Afríku og endursemjum við framleiðendur bóluefna vegna brostinna forsenda frá hendi Evrópusambandsins, sem riðar loks til falls.

 

 

 

Gengur í berhögg við EES-samninginn

Blásið í Borgarlínulúðrana

Enn ein staðfestingin á fylgni forystu Sjálfstæðisflokksins við Borgarlínu barst með Morgunblaðinu í morgun, þar sem Hildur Björnsdóttir borgarfulltrúi ítrekar afgerandi stuðning við hana og að þörf sé á fjölbreyttum samgöngukostum, þar sem ungt fólk líti á bifreiðina sem aðeins einn kost af mörgum í samgöngumálum. Þar virðist þó gleymast, að ¾ ferða í Reykjavík eru farnar á bílum, sem stendur ekki til að breytast.

„Einstrengingsleg nálgun“

Augljóst er að konur í yngri kantinum innan flokksins eru búnar að sammælast um það, að leiðin til aukinna áhrifa um málefni Reykjavíkur náist með því að staðfesta áfram skipulagsslysið Borgarlínu og að vinna með Samfylkingunni að uppbyggingu rándýra strætókerfisins, í stað nýrri tæknilausna sem nýta götur og vegi. Hildur segir m.a.: „Við náum takmörkuðum árangri með einstrengingslegri nálgun á menn og málefni…“. „Við þurfum að vera það mikilvæga sameiningarafl sem leiðir saman ólík sjónarmið“. Þessi lina afstaða gagnvart vinstri flokkunum vegna Aðalskipulags Reykjavíkur hefur verið dragbítur á gengi flokksins í fjöldamörg ár og skapað það eymdarástand sem nú ríkir.

Kosin gegn Borgarlínu

Fjöldi kjósenda sem kusu flokkinn síðast í borginni, gerði það í þeirri trú að Sjálfstæðisflokkurinn stæði gegn Borgarlínu, afstaða sem oddviti hans ítrekaði á fundum og í fjölmiðlum. Heilu hverfin hefðu tæpast kosið flokkinn ef fylgnin við ofurstrætókerfið hefði legið skýr fyrir. Stuðningur hverfa og alls landsins utan mið- og Vesturbæjar Reykjavíkur við bílinn og uppbyggingu vegakerfis er afgerandi, sem kemur skýrt fram í könnunum.

Kjósið til breytinga

Íbúar Reykjavíkur sem blöskrar hvernig keyra á fjárhag borgarinnar í þrot með óendanlegri sóun í afdankaða hugmyndafræði fortíðarinnar ættu að krefjast þess af fólkinu sem það kýs til almannaþjónustu að það breyti áætlunum um Borgarlínu í ódýrari, nýmóðins kerfi sem taki mið af breyttum tímum og aðstæðum.

Hvatar til að draga úr umferð